فريد النقراشى يفتح قلبه لأسرار المشاهير: بميل للأدوار الإنسانية وبحترم النقد بكل أنواعه
فريد النقراشى يفتح قلبه لأسرار المشاهير: بميل للأدوار الإنسانية وبحترم النقد بكل أنواعه
فريد النقراشى يفتح قلبه لأسرار المشاهير: بميل للأدوار الإنسانية وبحترم النقد بكل أنواعه
فريد النقراشى يفتح قلبه لأسرار المشاهير..يعتبر التمثيل هو فن تحويل الكلمات المكتوبة على ورق إلى مشاعر حية وحقيقية من لحم ودم حيث إنه يتطلب من الممثل أن يكون قادرا على القراءة الجيدة للنص وفهم وتحليل الشخصية الذى يقوم بتجسيدها بطريقة تعكس الواقع أو تثير العواطف لدى الجمهور.
حوار ليليان خليل
فقوة الممثل المحترف تكمن فى قدرته على استخدام مشاعره بشكل يتماشى مع الشخصية التي يقدمها خلال العمل, ولذلك، يتعين على الممثل أن يمتلك القدرة على التجسيد الكامل للمشاعر الإنسانية في اللحظة المناسبة.
ومن خلال موقعنا أسرار المشاهير نحرص دائماً على استضافة نجوم الفن أصحاب البصمة المميزة ليفتحوا قلبهم ويحكوا لنا عن أهم محطات مشوارهم الفنى ومن هنا قررنا ان يكون ضيفنا اليوم فنان كبير بدأ رحلته من وقت ماكان طالباً فى مدرسة ابتدائى الى أن تطور الامر الى قصور الثقافة والمسرح الجامعى.
ضيفنا هو الفنان د/فريد النقراشى أحلا بحضرتك فى صحف ومواقع أسرار المشاهير
كيف بدأت رحلتك في عالم الفن ومن كان له الفضل في اكتشاف موهبتك؟
رحلتي في الفن بدأت من زمان أوى من أيام المدرسة ,إبتدت من أيام ما كنت في ابتدائي في مدرستي، وبعد كده كنت بمارس نشاط المسرح في الكنيسة في مرحلة الطفولة فى المسرح الكنسي يعني وبعد كده بدأت تتطور المسأله في قصور الثقافة والمسرح الجامعي وبعد كده في الجامعة وهكذا . الحقيقه مفيش حد بعينه كان ليه الفضل في اكتشاف الموهبة.
لكن أقدر أقول كان في شخص كان ليه فضل في تقديم الموهبة هو الدكتور (سمير سيف) المخرج الكبير هو أول حد يعتبر حطني على طريق الأحتراف في الأعمال اللى اشتغلتها معاه سوى سينما او تليفزيون
ما الدور الذي تعتبره نقطه التحول في مسيرتك الفنية؟
أنا للأسف تاريخي مختلف شوية لأن ممكن يكون حد، في دور عمله نقلة نوعية في حياته ومسيرته
أنا ده ما حصلش معايا، انا طول الوقت بيبقى عندي شخصيات بجتهد في تقديمها، بتنقل إعجاب الناس ساعات تنال إندهاشهم، ساعات تنال إعتراضهم ولكن مفيش دور بعينه أقدر أقولك انه عمل نقلة نوعية الا يمكن في الأفلام
وأفلام الدراما المسيحية كان في فيلم ( نسر البرية )عمل رد فعل غير متوقع كان انتاجه سنه 2014
كيف تختار أدوارك وما المعايير التي تعتمد عليها في قبول أو رفض الأعمال؟
في معايير كثيرة على أساسها بختار الدور اللي بعمله في معايير خاصة بالكاست، وده أول معيار عندي يعني، أنا بشتغل مع مين وده مختلف شوية عن مقياسات البعض الأخر، وسبب إن المعيار ده رقم واحد انه في الآخر أنت بتعمل فن للناس، مش لنفسك فلازم يبقى الفن ده كل ما هتضمنله مجموعة من الممثلين الجيدين الشطار النجوم اذا أمكن اللي هيوفرولك عنصر مشاهدة كويسة لتعبك، فده هيبقى اختيار كويس وبعد كده بتيجي فكرة نوعية الدور وطبيعته، وبعد كده بتيجي الاتفاقات المادية .
فلو الدور اجتاز الشروط دي خلاص تمام ممكن يتعطل في اي حتة فيهم فاميتمش أصلا يعني .
معيار رفضى للدور أنا ارفضه من غير ما ادخل في اي مراحل، يعني افتكر لما يكون مختلف مع مبدأى وأفكاري مش الدور ممكن يكون الدور شرير بس اقصد العمل ككل ممكن يكون بيقدم قيمة مغايرة لقناعاتى لا طبعا مش هعمله .
هل هناك عمل فني تتمنى أن تعيد تقديمه بطريقة مختلفة؟
للأمانة هي مش أعمال هي أدوار ودول بقى كتير جدا ومش هقدر أقول ولا اسم فيهم، لأني هبقى بطعن في حد من الأساتذه يعني اللي عملوه لكن في أدوار كثير للأسف وأنا بتفرج عليها بحس إن الدور تم إجهاضه يعني مات بالسكتة القلبية فببقى صعبان عليا بحس إنه كان ممكن يطلع منه حاجة عظيمة ومحصلش .
أي نوع من الشخصيات تجد متعه أكبر في تجسيدها؟ ولماذا؟
اه دايما بميل أكتر للأدوار الانسانية اللي فيها جزء كده إنساني بيحمل ضعف البني آدم وانكساره واحتياجه وتوتره وصراعه الداخلي، يعني كل ما كانت الشخصية بتميل لإنسانيتها أكثر ده بيجذبني أكثر للأختيار .
ما الجديد الذي تحضر له حاليا؟
الحقيقة الجديد حاليا بعمل بروفات لمسرحية في مسرح البالون اسمها ( الملك وأنا) مع النجمة الجميلة
داليا البحيري وإخراج الأستاذ محسن رزق عندي كذا حاجة الفترة الجاية المفروض تنزل يعني عندي فيلم اسمه ( العابد) ده بطولتي المفروض ينزل قريب وعندي كذا حاجة كده يعني انا منتظرها هعلن عنها بالتبعية قبل نزولها بشوية.
كيف ترى تطور الدراما والسينما في الوقت الحالي؟
انا بتصور إن الأعمال التليفزيونية اتطورت الفترة دي فقط من ناحية التكنيك، التقنيات التكنولوجي.
إنما من حيث عناصر الصناعة الأخرى، من حيث الأسكريبت او السيناريو أو الموسيقى أو باقي عناصر الصناعة، افتكر لا محصلش فيها تطور افتكر حصل فيها انحصار .
ما رأيك في تأثير المنصات الرقمية على السينما والتليفزيون؟
افتكر هو مش تأثير أد ما هو حالة صراع، بقى عندنا منافس قوي جدا لشاشات التليفزيون والسينما اللي هو بلات فورم، يعني وانا أفتكر ان ده لمصلحة الشغلانة، لمصلحة الصناعة مش ضدها.
حلو إن يبقى في تنافس بشرط أن يظل التليفزيون والسينما، واقفين على رجليهم ما ينسحبوش ما يختفوش، أفتكر ده كان حاصل قبل كده الصراع ده بين التليفزيون والاذاعة اول ما ظهر اختراع التليفزيون، كان في توقع إن الاذاعة هتندثر وتنتهي، لا منتهتش الإذاعة ما زالت موجودة وليها مستمعيها وبرامجها وليها مسلسلاتها وكل حاجة والتليفزيون كمان موجود هو الأهم فكرة البقاء .
هل ترى أن الفن قادر على تغيير المجتمع ؟وكيف؟
مفيش فن بيغير مجتمع هو العكس صحيح، الفن مش موجود علشان يغير مجتمع، الفن موجود علشان يشاور على المشاكل والعيوب والأوجاع، هو مش وظيفته التغيير في جهات معينة باتخاذ القرار.
إنما الفن بيقدم حالة شعورية معنوية فلسفية، إنما هو مش ماعني بالتغيير، نفس فكرة الكتاب يعني مفيش كاتب وهو بيكتب بيغير المجتمع هو بيكتب عشان يحط وجع يحط هم عنده، هل في جهات هياخده بكتاباته دي هينفذوها ويحولوها لأرض الواقع إلى قوانين ومناهج للتنفيذ ولا لا ده موضوع تاني علشان منحملش الفن أكتر مما يحتمل .
هل واجهت تحديات في مسيرتك الفنيه ؟وما أصعب موقف تعرضت له؟
اه طبعا انا واجهت صعوبات كتير في حياتي الفنية أصعبها وأهمها فكرة عدم وجود فرصة للتعبير، عن موهبتي وإمكاناتي وأعتقد إن ده أصعب حاجه بتواجه أي إنسان في أي مجال، انه يبقى مش لاقي فرصة إنه يعبر عن اللي ربنا مديهوله.
إنما لو تقصدي موقف بعينه واجهت فيه صعوبة أعتقد اه، في موقف مقدرش أنساه اني انا مرة في أوديشن،في مخرج كان طالب يشوف وجوه جديدة يعني وانا روحت قدمت زي أي حد وهو طردني من المقابلة دي، لانه شافني في كذا مقابلة قبل كده، انا لسه داخل قبل حتى ما الباب يتقفل في المكتب لقيته بيقولى: انت تاني خلاص شفتك وعرفتك لما تسمع إني أنا عامل مقابلة في أي مكان ما تجيليش خلاص أنا عارفك وطبعا أحرجني قدام الناس روحت لغايه المكان ده كان بعيد أوى عن بيتي وأنا بعيط صعبان عليا نفسي هو اللي كان طالب ناس كان بيعمل كاستنج لعمل ما، وانا روحت زي الناس بستخدم حقى الشرعي المتاح يعني مش بغتصب حق حد دي من الحاجات الكتير اللي كانت قاسيه يعنى .
من من الفنانين ترى انه يمثل الجيل الجديد بقوة؟
مبقتنعش انا بالفكرة دي لا مفيش حد سفير عن الفنانين أو عن الفن، كل واحد بيعبر عن نفسه، تجربته الذاتية في تجربة خاصة جدا لكل واحد في تجربة راقية، في تجربة مضمحلة سطحية كل واحد بيعبر عن ثقافته وبيئته، ووعيه، وتربيته وهكذا .
ما رأيك في حاله السينما المصرية حاليا مقارنة بالماضي؟
رايي في السينما دلوقتي أفتكر احنا خسرانين مخرج، بمعنى ايه لو عايزة تحددي المشكلة فين في السينما، فهي مشكلة المخرج مش مشكلة ورق .السينما مش مشكلتها الورق .
الدراما التليفزيونية قد يكون مشكلتها الورق، انما في السينما مخرج بالدرجة الاولى لكن كمان ينقصنا وعي: (داوود عبد السيد، محمد خان، خيري بشارة).
يعني إحنا كان عندنا ناس ليهم أو في جيلهم (عاطف الطيب) والسينما الواقعية بتاعة (صلاح ابو سيف) وناس كثير تاريخ السينما مليانة بالناس المهمة سوى على المستوى التراجيدي أو الكوميديا لا احنا ناقصنا منطقة الإخراج المخرج عندنا مشاكل فيه .
هل لديك طقوس معينة قبل دخول التصوير أو المسرح ؟
طبعا في طقوس خاصة بالتحضير للشخصية، ودي مسأله طويلة ليها علاقة بإختيار المنهج المتبع لتناول الشخصية وتحديد أبعاد الشخصية وسماتها أو التدريب على المشاهد وأدائها وفي اللوكيشن بقى، لازم يبقى في تفاصيل خاصة بدخولك في الشخصية والحالة اللي انت هتخلقها لنفسك، وبحاول أبعد عن مصادر الإزعاج والتوتر، وأحاول أخلق لنفسي المود المناسب اللي هيساعدني في تأدية الشخصية .
هل تفكر في الاتجاه إلى الإنتاج او الإخراج مستقبلا؟
لا طبعا معنديش أي توجه يعني انى أنتج لأن معييش فلوس أنتج ومعنديش توجه إني أخرج لأنى مش مخرج .
أنا بالدرجة الأولى مدرب تمثيل وأستاذ تمثيل في الجامعة وممثل وهو ده كفاية اوى .
كيف تتعامل مع النقد سوى كان إيجابيا أو سلبيا؟
أنا من الناس اللي بتحترم النقد السلبي أكتر من النقد الإيجابي، يعني أنا يهمني إن حضرتك تقولي، ده مش عاجبك علشان كذا علشان، أطور من نفسي بس المهم علشان دي لازم يكون السبب وراء إنه مش عاجبك ليه مش السبب إني مش مرتحاله، أو مش حساه الكلام المطلق ده.
النقد بيساوي تطور الممثل وخاصة لو كان نقد عن وعي، وعن فهم، وعن ادراك .
مؤخرا شاركت في مسرحية سيدتي انا على المسرح القومي كيف كانت تجربتك في هذا العمل؟ وما الذي جذبك للمشاركة فيه؟
أنا استمتعت بتجربتي في سيدتي أنا جدا كنت بقدم شخصية مختلفة عني من ناحية التركيبة النفسية والاجتماعية، والذهنية وكمان العمرية لأن هو كان المفروض شخص كبير في السن، لأنه كان أبو الفنانة داليا البحيري.
فكان عندي تحدي في كل الحاجات يعني ومساحة كوميديا وضحك يعني كان فيها تفاصيل كتيرة والحمد لله ربنا وفقني فيها، اللي جذبني في المشاركة في سيدتي انا حاجات كتيرة، أهمها هو الله يرحمه أحمد حلاوة.
الأستاذ ( أحمد حلاوة )كان بيعمل الدور اللي أنا عملته، ولما هو توفى لقيت أستاذ محسن رزق المخرج بيكلمني على الدور وأنا استغربت يعني ازاي الدور اللي بيعمله إستاذي في المرحلة العمرية انا اعمله.
حسيت إن الموضوع كله مش منطقي ولا ييجي على بال حد، اكتر منه انه استاذي بروحه عايزني أعمل شغل بداله خاصة اني كمان أخدت الجدول بتاعه في الجامعة، احنا بندرس، في جامعة واحدة كلية الآداب جامعة حلوان.
وهو كمان لما مات آخذت الجدول بتاعه يعني المواد بتاعته بقيت أدرسها فحسيت إن هو كأنه بيسيب لي التركة بتاعته الله يرحمه .
المزيد:تقابل حبيب الحلقة 23.. تصاعد التوتر بين يوسف وشقيقه فارس
أيهما أقرب لقلبك فريد الممثل؟ ام دكتور فريد أستاذ مادة التمثيل؟
مش عارف لا سؤال صعب لو حد قريب منهم اكتر من التاني يبقى إن حد عنده انفصام يعني، لا هما الاتنين انا، وأنا بمثل انا جوايا الاستاذ .
وأنا بحاضر أو بدرس أنا جوايا الممثل، ما بقدرش أخرج بره نفسي .
هل يشترط أن يكون مدرب التمثيل ممثل شاطر ؟
مش شرط يكون مدرب التمثيل يبقى ممثل شاطر خالص، أصل مدرب التمثيل حدوتة، مش أنه يمثل للممثل، لا حدوتة انه يوجه للممثل إنه يفجر طاقاته إنه يخرج أفضل ما عنده، ودي قدرة خاصة مش بالضرورة، إنه يتمتع بها كل المدربين ومش بالضرورة، يكون هو ممثل زي فكرة مدرب الكرة بيحط خطة لفريقه وتكتب الدوري أو الكأس لكن مش بالضرورة ينزل الملعب، نفسه ويلعب ويجيب أجوان ويحقق نفس الطاقة اللي بيحققها اللاعب .
الدراسة الأكاديمية وسلك التدريس ماذا أضاف للفنان فريد النقراشي؟
قدم لي الوعي، خدي بالك الممثل بالدرجة الأولى، هو وعي عقلي يعني أصعب ما في الشخصية، مش تقدمها هو تخططها هو تصميمها.
فدى كلها، مسائل عقليه هو ازاي تصمم الشخصية، ازاي تعمل
كراكتر ديزاين بشكل جميل زي فكرة مهندس الديكور اللي بياخد شقة حيطان على المحارة، ويحولها لحاجة تانيه بترتيبات وألوان وموضوع تاني خالص.
وتيجي بقى الجزء التاني مهارات تنفيذ التخطيط وده محتاج تدريب فأعتقد انه فكرة الدراسة والتدريس فادتني كممثل جدا يعني .
المزيد:إصدار أول صحيفة فى العالم مطبوعة بالذكاء الاصطناعي بالكامل
كيف قرأت تصريحات رئيس الوزراء نحو تقنين الدراما بما يخدم القيم؟
أنا شايف إن تدخل الدولة شيء مهم جدا يعني، لما كان في وزارة إعلام ووزارة ثقافة قوية، كان في إنتاجات عظيمة جدا للدراما التلفزيونية والسينمائية.
إنما أنا خايف بس، يتحول الموضوع لموضوع رقابة، إحنا مش ناقصين رقباء، الفكرة مش كده الفكرة إن لو في لجنة، اللجنة دي بتجتمع عشان تحل أزمات تحل مشاكل مش علشان تتضع قيود رقابية هو ده بس التخوف اللي عندي اللي هو لسه هيبان توجه اللجنة دي عامل ازاي .
وفى النهاية نود أن نشكر الفنان/فريد النقراشى على هذا الحوار الجميل الرائع متمنيين له مزيد من التألق والنجاحات
المزيد:وزيرة التضامن الاجتماعي تشيد بمسلسل «لام شمسية» .. شاهد ماذا قالت عنه
