فضل صيام العشر من ذى الحجة
ممكن تركزوا معايا كويس وتدوني دقيقتين بس من وقتكم ممكن يغيروا حياتكم كلها !
فعلا والله ، انتم ممكن تغيروا مسار حياتكم في الكام يوم اللي جايين دول !
▪ من الهم للإنفراج !
▪ من الحزن للفرح !
▪ من الضيق لرحمة من ربنا ماتخطرش علي بالك !
▪ من يأس في استجابة دعوتك ليقين تام وحدوث الاستجابة بالفعل !!
واااضح كده ان اليومين الجايين مهمين اوي فعلا ! طب بمناسبة ايه ده كله !!
ده لانك مقبل علي افضل عشر ايام في السنه ! {العشر الأوائل من ذي الحجة}
فإن العشر الأول من ذي الحجة أيام مباركة، ولفضلها أقسم المولى سبحانه بها في كتابه الكريم
حيث قال: وَالْفَجْرِ وَلَيَالٍ عَشْرٍ [الفجر:1،2].
مفيش وقت في السنه كلها ربنا بيحب يري منك العمل الصالح فيها أكتر من الأيام دي !! تصور !!
ثوابك فيها لو اجتهدت هيفوق ثواب المجاهد في سبيل الله !
قال صلي الله عليه وسلم ( ما من أيام العمل الصالح فيها أحب إلى الله من هذه الأيام – يعني أيام العشر – قالوا : يا رسول الله ولا الجهاد في سبيل الله ؟ قال ولا الجهاد في سبيل الله إلا رجل خرج بنفسه وماله ثم لم يرجع من ذلك بشيء )
طب هانعمل اية فى الأيام العشر !
هقولك الأول انت المفروض تعمل ايه فيهم وبعدين هقولك هيبدأوا امتي ان شاء الله ..
اولا : صيام هذه الأيام أو ما تيسر منها وبالأخص يوم عرفة !
ومش معني الكلام انك تكسل وتصوم يوم عرفة بس !!
لكن في حالة حصلت ظروف حالت بينك وبين الصيام او تعبت او ماصومتش لأي سبب في الأيام دي .. اوعي اوعي اووووووعي تفوت صيام يوم عرفة !!
اليوم ده أكبر كنز دونا عن باقي الأيام !!
عارف ليه !!
اسمع الحديث ده كده ..
روى مسلم رحمه الله عن أبي قتادة عن النبي صلى الله عليه وسلم قال : {صيام يوم عرفة أحتسب على الله أن يكفر السنة التي قبله والتي بعده} !
يعني صيام يوم عرفه ده يا سيدي يكفر ذنوب سنتين !! سنه فاتت وسنه جاية !
يعني صيام 12 ساعه بس = يكفر ذنوب 24 شهر !!
يعني صيام الساعه = يكفر ذنوب شهرين 60 يوم !!
يعني صيام 60 دقيقه = يكفر ذنوب 60 يوم !!
يعني الدقيقه الواحدة بتغسلك من ذنوب يووووووم بحاله !! يوم فات بكل عكه وقباحة ذنبه واصرارك علي الذنب وغفلتك ! كل ده هيتمحي بأستيكه من صحيفة اعمالك بكل دقيقة صيام في يوم عرفة !!
واسمع الحديث ده كمان !
قال رسول الله صلى الله عليه وسلم : ( ما من عبد يصوم يوماً في سبيل الله ، إلا باعد الله بذلك اليوم وجهه عن النار سبعين خريفا )
كده خلصنا جزئية الصيام
نيجي علي باقي الأعمال
▪ – ذكر الله في كل نفس ! طول مانت صاحي تذكر الله ، وركز علي التهليل والتكبير والتسبيح بالذات لان النبي وصّي بيهم !
▪ – ختمة المصحف في العشر !
لو كل يوم قرأت ٣ أجزاء بس .. هتختم المصحف كله بإذن الله في خلال العشر ايام دول !! اوعي تكسل !
▪ – العلاقات الاجتماعية بقي يعني بر الوالدين وصلة الأرحام .. اغاثة ملهوف .. نصرة مظلوم .. كظمك للغيظ .. ابتسامتك في وجه اخيك .. هيا اعمال ممكن انت تستصغرها لكن ثوابها ضخم وخسارة يضيع في الأيام دي صدقني !!
▪ – الصدقة !!
تصدق كل يوم .. ولو بمبلغ صغير .. اللي تقدر عليه ! المهم اسمك يتكتب كل يوم في العشر من المتصدقين .. ولو برسالة لمستشفي خيري او جمعية خيرية !
▪ – يا حبذا لو شاركت في افطار صائم
هتاخد أجره وثوابه معاك
▪ – الصلاة هتكون علي الوقت بالمللي مش متأخرة دقيقة !
▪ – الأذكار اللي كنت بتكسل تقرأها حاول تجاهد نفسك وتقرأها انت اللي هنكسب !
▪ – جلسة الضحي للي ما يعرفش جلسة الضحي وجمالها {دي عبارة عن انك بتصلي الفجر وتنتظر حتي شروق الشمس بس بشرط تكون في الوقت ده بتذكر الله .. لحد شروق الشمس وتقوم مصلي ركعتين او اكتر ضحي} وكده تبقي ضمنت حجة وعمرة مع الرسول يعني كإنك روحت الحرم وانت في بيتك !
▪ – قيام_الليل مش ركعتين بس !!
ماتبخلش علي نفسك !
صل واستزِد من فضل الله وخليك طماع دول عشر ايام وهيمشوا بلاش نندم بعدهم !!
▪ – هتعرف كل اللي تعرفهم بثواب صيام الايام دي والاجتهاد في العبادة فيها وكن علي يقين ان اي عمل خير ولو بسيط حد عمله بسببك هيتكتبلك اجره في نفس اللحظة اللي بيتعمل فيها !
شلااال حسنات مابيوقفش !
طب بالنسبة لأهم جزئية واللي الكل منتظرها الدعـــاااااء !!
قال صلي الله عليه وسلم : {خَيْرُ الدُّعَاءِ دُعَاءُ يَوْمِ عَرَفَةَ، وَخَيْرُ مَا قُلْتُ أَنَا وَالنَّبِيُّونَ مِنْ قَبْلِي: لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ المُلْكُ وَلَهُ الحَمْدُ وَهُوَ عَلَى كُلِّ شَيْءٍ قَدِيرٌ}
العلماء استدلوا بالحديث ده علي ان دعاء يوم عرفة مجاااااب علي الأغلب ده النبي قال عليه خير_الدعاء !
ده غير ان دعوة الصائم مستجـابة بالفعل !!
طب هل الفضل ده لأي مسلم ولا للحجاج فقط !!
الإجابة : لكــل مسلم بإذن الله اجتهد ودعي الله في تلك الأيام !!
واغلب الصالحين العارفين بيقولوا ان والله لم يمر حول اي عام علي دعوة يوم عرفة الا وقد اجابها الله !
وانا بقول اهو علي موقف شخصي ليا دعوات يوم عرفة استجيبت اسرع من دعوات رمضان والله العظيم !!!
اوعي تكسل في الايام دي !! تخيل لما ربنا يعرفك انه بيحب عبادتك في الايام دي وانها افضل من الجهاد في سبيله ! ايه اللي ممكن يخليك تكسل غير ذنوبك و اللي انت راضي انه يغلبك
عاوزين نتقابل في العيد بإذن الله واحنا فرحانين ومش حاسين بالتقصير احبكم في الله
