” رسائل لم تُقرأ” بقلم دعاء خطاب

“رسائل لم تُقرأ ”

كتبتها / دعاء خطاب

عن نعمه الأيام العاديه اللي كتير بنحس بملل فيها…ومن إنتظام رتمها
من الروتين اليومي بتاعنا..اللي لما بيتغير مش دايما التغيير بيعجبنا ولا بالضروره يكون للأفضل.. وبيحصل اللي يخلينا نشكر ربنا ونتمنى ترجع الأيام دي تاني والحياه تاخد شكلها الطبيعي مهما كان مرهق او يبدو ممل!!
طبعاً كلنا عشنا الشعور ده بقوه طوال
أيام السنه اللي فاتت بدايه من السيول وصولاً للكرونا ولسه مستمرين في حاله من عدم إنتظام الحياه بشكلها المعتاد لفتره لا يعلم مداها إلا الله.
كل اللي بيحصل حوالينا وكل اللي بنمر بيه.. بيقولنا حاجه واحده بس

عدم” إيلاف النعم” مهما كانت تبدو صغيره او معتاده أو متكرره لدرجه خلتنا نفتكر إن بقائها مضمون… إنك بقوتك وجبروتك ومالك ونفوذك كبني آدم.. لا شئ أمام تغير مناخي او عله او مرض او فيروس!!

إنك بتقف أمام تلك الأشياء عاجز ضعيف عديم الحيله.. حياتك حرفيا أصيبت بالشلل لما قطعت الكهرباء وتوقفت الحياه تماماً من شويه مطر!!!
إن كلنا حرفيا على ذمه يوم القيامه
اي وقت وكل يوم وفي كل لحظه
ودعنا ناس أكتر من اي وقت فات
و معرفناش ناخد العزاء فيهم
مش مهم حياتنا حتخلص امتى وازاي.. المهم.. حنقابل وجهه الكريم على أي حال وبأي شكل وهل حيكون راضي عننا هل حياتنا كانت في طاعته؟
هل عشنا لهدف… هل تركنا أثر؟
وأن لا حول ولا قوه الا به سبحانه.

اتمنى نكون اخدنا فرصه نفكر مع نفسنا الأيام والشهور اللي فاتت ونكون عيدنا حساباتنا ورتبنا أفكارنا وقيمنا أمور حياتنا بشكل أفضل وتكون الايام اللي فاتت واللي جايه علامه فارقه في حياه كل واحد فينا.. مش مجرد رسائل وعبر ودروس عدت علينا وماسبتش
أثر فينا… و افتكرنا إنها لغيرنا

ومش لينا!!