قصيدة غريب … للشاعر / سيد البالوي

قصيدة غريب

الشاعر / سيد البالوي

مابين الناس غريب لكن
ف كل الناس تلاقيله
قلوب تتمنى يتكلم
وتسمع صوت تراتيله

وتنده حسه يسبقها
صدى إحساسه جواها
ويبقى مش لاقي اللقمة
وع السلاطين بيتباهى
وفارس رغم ما عمره
ركب فرسه ولا قاتل
وعاشق ينكوى بجمره
قلوب عشاقه تتقاتل
بيمشى الأرض تتمنى
ما يرفع قدمه لسواها
ويشكر حتى لو نملة
جلس لثوانى وياها
رقيق احساسه ف الدنيا
بنات افكاره توحيله
عجائب جنة المأوى
وفى الفردوس قناديله

مابين الناس غريب لكن
ف كل الناس تلاقيله
قلوب تتمنى يتكلم
وتسمع بوح تراتيله

ورغم القسوة والضلمة
و أيامه اللى ليه ظالمة
تبص ف وشه يضحكلك
وتسمع منه تتسلطن
وتنسى الدنيا ومشكلك
وتتمنى يقول اكتر
ويحكيلك عن الاساطير
وعن عنتر وعن عبلة
وعن غصن الزتون بالليل
وعن نار الهوى القايدة
وتخرج من زمان لزمان
وترجع من زمن تالت
ويحكيلك عن الاحلام
و أيامه اللى بيه مالت
عشان رافض يكون إنسان
بشر عادى فى تفكيره
عشان قلبه انصهار بركان
يصحى الدنيا بنفيره

مابين الناس غريب لكن
ف كل الناس تلاقيله
قلوب تتمنى يتكلم
وتسمع بوح تراتيله