قصيدة قالوا بنت بقلم الشاعر احمد والي
قصيده قالو بنت
قالو بنت
عادي يعني مش سند
ولا برضه ف جدعنه الولد
ولا حتي تقدر تصد عنك حبه هوا
علي ايه فرحان اوي كدا ؟
عمال تشيل
عمال تغني
عمال تتأمل في تفاصيلها
عمال تغيب عنها ثواني وترجع تجيلها
عمال تطوف حوالين سريرها
كأنه كعبه ولا مزار
دي بنت
في تربيتها وخوفك عليها مرار
وانت اصلا اب تافه
طول حياتك ضحك وهزار
قلبي سد ودني عن كلامهم
محتاجين سنين افهمهم
ان البنت
هي هديه الجنه مش الولد
ما ياما ولاد اهلهم بيدعولهم بالبعاد
منهم انا
لسه برضه حمل علي ابويا وانا فوق العشرين سنه
لا كنت طلقه دافعه
ولا استنفعو مني بنفعه
وف شماعه سوء الظروف مسكت
فمتفضلوش الولد ع البنت
البنت ❤
شجره تديك ضلها وخيرها لو ف مره ف صحراء الدنيا تهت
البنت
سنام جمل
بتخزن الفرح لاهلها وقت الجراح والكبت
البنت
رزق الاسبوع اللي ف الغيب
بتظهرو من يوم السبت
البنت بتدقلك ف رزق الدنيا وفي الجنه وتد
شيلو ضباب الجهل اللي في عقولكم اتولد
