كذبة كبيرة يا وطن
الشاعر / سيد البالوي
ونقول بلدنا حلوة و جميلة
وأهي زي لوزة مقشرة
وسط البلاد اللى بتاكل بعضها
بلدنا بتحمي بعضها
وبتلقى بعضها زي الجسد
اللي بيجمع قوته بعد المرض
تسمع كتير وقت الزهق
وقت الغضب
وقت انفعال الناس
من سوء إدارة
أو سوق تجارة
أو سواقين عايشينها
فوضى بجعجعة
أو عنجهية مسؤولين
واحنا بنحمل كل شيء
حتى بنحمل نعشهم
لما يروحوا المقبرة
ونقول بلدنا حلوة و جميلة
وأهي زي لوزة مقشرة
ويشوف ولادنا الكذابين
طالعين بكل أشكال الضلال
اللي بدين واللي بذيل
واللي بديل واللي يدين
واللي بأدين ناهبة البلد
ومعاه حصانة
فى حزب أصحاب النفوذ
حطوه يشرع للبلد
حاجة دواعي المنظرة
ونقول بلدنا حلوة و جميلة
وأهي زي لوزة مقشرة
مقلوبة لكن متنورة
فيها التاريخ فيها الهرم
والكورة أشهر من القلم
وفضلنا نبني فى الشقق
لما بقت ضعف البنات
بس الأهم ، إنا بُناة
قادرين ونصرف على الحجر
أما البشر ، أموات
و أهي برضو حاجات
من دواعي الفشخرة
ونقول بلدنا حلوة و جميلة
وأهي زي لوزة مقشرة
لازم نحيي فى العلم
يمكن يشوفنا فى يوم
يسمع صراخ المظلومين
والفلاحيين والشقيانيين
واللي بتجري عالمعاش
واللي بتجري عاليتيم
واللي بتفرش بالخضار
فيجيها جيش من الانجليز
ازاي تخالف فى القانون
لازم تكون دافعة رشاوي للجهاز
تُشتم وتُضرب تنسجن
هى بسيطة المسألة
ونقول بلدنا حلوة و جميلة
وأهي زي لوزة مقشرة
أم الشهيد تاخد وسام
لكن كراسي البرلمان
للي بيدفع باليمين
وياخدها من دم الغلابة بالشمال
أخت الشهيد ملهاش مكان
زوجة الشهيد ملهاش حطان
ابن الشهيد ياخد هدية فى كل عيد
وابن الفساد يركب أعالي كل شيء
حتى البلاد
بتجيه كفرخة محمرة
ونقول بلدنا حلوة و جميلة
وأهي زي لوزة مقشرة
كذبة كبيرة يا وطن
واحنا كرهنا الكذابين
#سيد_البالوي