كتبت/الشيف دعاء لاشين
بمناسبة ان العيد قرب ودا عيد اللحمة 😋😋 وكل سنة وانتو طيبين .. واللحمة هتبقي كتير الوقت دة .. ويبقى فى قطعيات لحمة احنا مش فاهمين هى اية . 😂😂 او بتتعمل ازاى
.
هنا بقى هيبقى فى شرح لكل حتة لحمة بتطلع …
زى الانتركوت الروزبيف الفلتو الريب اى الريش العكوة 😂😂 الموز التربينكو حتى الماشنكاح هنطلعه 😁😁😂 اصل اللحمة ليها وضع كدة ملوش مثيل ولو منبسطناش من شكلها مش هنستفيد من اكلها ولا فيدتها عشان تقريبا كل قطعة ليها طعم خاص وطريقة شغل وتسوية عشان ناخد أكبر قدر من فيدتها
في بعض قطعيات اللحم إللى مينفعش معاها حاجة غير الطواجن او السلق مثلا زى لحمة السند او الرقبة او العكوة او وش البطن أو وش الفاخدة. ودى كويسة فى الطواجن او السليق بتبقى حلوة وطرية. انما بقى قطعيات الشوى بتبقى فلتو ريش ريب اى انتركوت . وفى بقى الروستد إللى فى الفرن زى الروز بيف . التربينكو بقى تاخد منها شوية استيك عناااابى 😂😂😍😍😋😋 حجات كدة من إللى قلبك يحبها ونيجى بقى للصوصات. 😉 مش اى حاجة يتعملها صوص ومش اى ميرينة للحمة كل حاجة وليها تتبيلة لوحدها ودى بقى مولها طويل حبتين 😁
طيب دلوقتي هقولكم علي قطعيات اللحوم و استخداماتها علي حد علمي المتواضع مع الرجوع طبعاً للشيف مصطفي شريكي 😍😍
القطعية المظبوطة بداية الأكلة الحلوة لأن كل أكلة ليها القطعية اللي تناسبها
العجل بيتقسم لجزئين :
1- الجزء الأمامي و بيتكون من سمانة الكتف و بيت اللوح و صباع السمانة و الريش و الكوستاليتا و الرقبة و الموزة الامامية لكنه بيكون أقل جودة من الجزء الخلفي و مناسب للفتة و السلق و الخضار
– سمانة الكتف بتكون لحمة حمراء دهونها قليلة و مناسبة لوصفات : الاسكالوب و كباب الحلة
– صباع السمانة عبارة عن عضلة من الدراع و بتكون لحمة ناعمة و مناسبة لوصفات : الروستو في الفرن أو صينية
– الكوستاليتا هي جزء من الريش و بتكون لحمة ناعمة و مناسبة لوصفات : اليخني و الخضار
– الرقبة لحمتها حمراء و مناسبة لوصفات اللحمة المفرومة و الكبيبة و الخضار
– الموزة الامامية لحمتها حمراء و نسبة الجيلاتين فيها اعلى من الموزة الخلفية و مناسبة لوصفات : الفتة و السلق و الخضار
2- الجزء الخلفي و بيتكون من الفخدة و السمانة و عرق الروستو و عرق الفيليه و الانتركوت و مناسب للشوي و الاسكالوب و الستيك
– العرق الفيليه هو جزء من الريش و لحمته ناعمة عن العرق الروستو و مناسب لوصفات الشوي
– الانتركوت عبارة عن الريش الخلفية و بيكون من بيت الكلاوي و الكوستاليتا و مناسب لوصفات الستيك و الشوي
طيب ممكن حد يسئل ازاي نفرق بين حجم العجل كبيرة او صغير !! ؟؟
هقولكم من لون اللحمة … لو غامق يبقى الحجم كبير و يلزمه وقت طويل عشان يستوي… لكن لو لون اللحمة فاتح بيكون الحجم صغير و اللحمة بتستوي بسرعة
دا بس مقال سريع يمكن يفيد رواد المطبخ ومحبي وعشاق اللحمه واللي معندهمش خلفيه كافيه ب قطعيات اللحمه واستخدامتها المثالية عشان نستمتع ب احلي طعم وأجمل نتيجه 😍😍
