كرستينا كرم لأسرار المشاهير : عشقت الطرب وأعتز بعملي بالسياحة
كرستينا كرم لأسرار المشاهير : عشقت الطرب وأعتز بعملي بالسياحة
حوار صحفي ليليان خليل
تهتم دائما جريدة أسرار المشاهير بالنجوم وبالفن والأصوات الشابة الجميلة وتحرص جريدة أسرار المشاهير، على أن تسلط الضوء في حياة الفنانين الذين يقدمون كل ما هو جديد في مجال الفن أو السياحة أو غيرها…
واليوم على موعد مع شخصية فريدة طموحة، جمعت بين حب السياحة والطرب الأصيل ، فتراها كثيرا في الزى الفرعوني، وتغني للسياحة، قدمت العديد من الأعمال في كثير من المحافظات وغنت بلغات مختلفة،لقبت بكروان البحر الأحمر وإيزيس القرن الحادي والعشرين . والآن نحب أن نطرح بعض من الأسئلة على حياتها سوى في مجال الغناء أو مجال السياحة…
كرستينا كرم
من هي كرستينا كرم ؟
هي إنسانة عادية بتحب الفن والحياة والموسيقى، والسياحة، إنسانة حاولت تستخدم أدوات إنها تعمل حاجة أو تحقق رسالة معينة في الحياة .
أهم المحطات في مشوار كرستينا كرم ؟
أهم محطة في الحياة لما بقيت أم . بقيت بفهم الدنيا والمسؤولية خلتني أعيد أفكاري وحساباتي وأكون مسئولة عن إنسان مسئولية كاملة. عايزة تعلميه وتربيه بشكل معين ودي محطة مهمة .
وأية المحطة المهمة في المشوار الفني؟
البداية كانت صعبة كان في خوف، من الأشخاص اللي حوالينا مش بنلاقي ألف حد بيدفعك لقدام بالعكس، أكيد كان فيه احباطات كثيرة ، كله دائما بيبقى كويس وتمام وأنت في إطار معين لكن تعمل حاجة كبيره بيبقى الموضوع صعب أو تدخل في المجال نفسه أنا بتكلم كفن بيكون في مخاوف سوى الأب أو الأم أو الأخوات، أول ما بدأت الدنيا اتظبطت كله بقى بيشجعني الموضوع فرق كثير ، ولما يشوفوا الصورة صح بيطمنوا .
مين مكتشف كرستينا كرم ؟
دكتورة مريم نعيم قائد كورال .
في مجال الغناء مين أكتر المؤلفين اشتغلتى معاهم أو كان نفسك تشتغلي معاهم بس هم راحلوا حاليا ؟
الله جميل السؤال !
كنت أتمنى أعيش مع ألحان بليغ حمدي، بحبه قوي .
وكان نفسي قوي أغني مع مطرب بحبه قوي محمد فوزي ، لأن صوتي راكب على الحاجات بتاعته وهو سابق عصره ب 100 سنه.
علشان كده غنيتى أغنية طير بينا يا قلبي ؟
آه فعلا بحبها قوي لكن الاثنين دول فعلا كنت أتمنى أعيش أيامهم علشان أقول حاجة من ألحانهم .
أنشودة حتشبسوت ماذا تمثل لك ؟
تمثل لي هي مش بداية هي انطلاقة جديدة وبروح جديدة في الفكرة والموضوع، يعني أنا عاملة موضوع معين بس بعمله في فكرة جديدة بعيد عن موضوع أنشودة إيزيس بروح تانية.
هتنقل معاكي للسياحة وأقولك كلمينا عن السياحة ودورك حاليا على الساحة ؟
السياحة في دمي انا درست سياحة وبشتغل مفتشة سياحة .
أنا بحب الموسيقى والفن وهو جزء لا يتجزأ مني، بحبه جدا فقلت أروج موهبتي في السياحة والحمد لله قدرت أدخل وأخلي الناس اللي في الشغل وفي كل مكان يحبوا الموضوع بشكل جديد ومختلف .
آه ما حدش عمل كده البداية كانت بالنسبة لي حاجة مجنونة ومختلفة . لكن بدأت الناس تقول إني بعمل حاجه ليها قيمة كبيرة قوي لأني بعمل جولات في الأماكن والمعالم الأثرية.
أيهما أقرب لشخصية كرستينا كرم السياحة بما إنك مفتشة سياحة ومنصب سياحي ولا كمطربة ؟
الاثنين أقرب ليا لأن السياحة ذوق وجمال وفن، بحب الاثنين قوي . الطرب برضه ذوق وفن وجمال فأي حاجة ليها علاقة بالجمال والذوق العام، بتمثلني علشان كده هتلاقي الأثنين أقرب من بعض .
مبادرة مصر تستحق يعني كتير كان بيسأل ايه الدور اللي بدأتيه وحاليا إيه الدور اللي بيتم ، عايزين نعرف المشاهدين على الساحة الجديد؟
أنا خرجت كتير في لقاءات قلت كده إن إحنا عايزين نصور مش معظم بقى.. نصور كل محافظات مصر لأن ليها قيمة سياحية وثقافية ، ونعرض المعالم والمتاحف من أماكن ومن شوارع من سمات للبلد بتعبر عن تراثنا المميز في مصر، عندنا أنماط السياحة جميعها موجودة.
كروان البحر الأحمر وإيزيس القرن الحادي والعشرين مين أقرب ليكي كلقب ؟
أي حاجه تربطني بالماضي كتراث بلدي بتمثلني كتير كملكات مصر العظماء.
لكن كروان البحر الأحمر بحبها لأنها أول لقب ليا .
لو جالك دور دراما أو سينما هتقبلي؟ اه هقبل، لأني بحلم إني أعمل دور ملكة من ملكات الفراعنة دراما أكثر. وعشان الناس حبوني أكتر في الشخصية الفرعونية .
مش حابه تنطلقي من الشخصية الفرعونية لأي دور جديد، أو لو أتعرض عليكى بشكل مختلف ؟
اه حابه لو دور معين مثلا زي دكتورة في الجامعة .
يا ترى آخر أعمال كرستينا كرم حاليا؟ في حاجات كتير في كليبات وفي حاجة مسرح .
ولما سألناها هتسافري فين بعد ما غنيتى لمدينة إسكندرية وأسوان ودمياط قالت إنتظرونى في الإسماعيلية .
