كشرى بالكبده مقدمه من الشيف شوشو عرابي
كشرى بالكبده
مقدمه من الشيف شوشو عرابي
اكيد زهقنا من اللحمة والفتة والفراخ طيب ايه رأيكم نضرب كشرى بالكبده
المكونات والطريقة
اول حاجة هنعمل الكبده الاسكندرانى فى طاسة على النار هننزل م ك سمنة + م ص ثوم مفروم واقلب وانزل بالكبده واقلب واضيف معلقه صغيره كسبرة + معلقه صغيره كمون + عصير ليمونة كبيرة + ١/٤ معلقه صغيره فلفل + معلقه صغيره ملح + قرن فلفل حامى واقلب واطفى عليها واغطيها
نبدأ بقى فى تجهيزات الكشرى خلينا متفقين ان شغله كتير بس النتيجة مبهرة ومرضية
اول حاجة هنقطع ٥ بصلات ابيض جوانح رفيعة ونضيفلهم ٢ م ك نشا ونخلطهم سوا ونقليهم فى زيت غزير سخن ونفضل نقلب اول ماتاخد اللون الدهبى الجامد ده نطفى ونصفيه فى مصفاه ونسيبه على جمب
نغسل كوب عدس بجبة ونسويه على النار فى ماء مغلى + م ص ثوم مفروم + م ص كمون + م ص ملح يادوب يستوى بنسبة ٨٠% ونطفى عليه ونصفيه ونسيبه على جمب
هناخد ربع كوب زيت من اللى عملنا فيه البصل ونضيفله ٣/٤ كوب شعرية ونقلب لحد ماتاخد لون دهبى غامق نطفى عليها ونضيفلها كوب ونص رز مصرى وملح + مكعب مرقة + كوب ونص ماء مغلى واول مايشرب المايه نهدى النار ونسيبه يكمل سواه
هنسلق كوب مكرونة صغيرة ونص كوب مكرونة اسباجتى فى مايه وملح
صلصة الكشرى بقى ودى اهم حاجة ( ربع كوب من زيت البصل نضيفله م ك ثوم مفروم + م ص كسبرة + كوب صلصة بوريه ونقلب + ملح + ربع كوب ماء ونقلب لحد ماتتسبك
الدقة ( كوب ماء مغلى + ١/٢ م ص كمون + ١/٢ م ص كسبرة + م ص ملح + ٨ م ك خل + عصير ليمونة ) هنقلب كل المكونات ونظبط الطعم حسب ذوقنا
كده الطبق اصبحت مكوناته جاهزة هظبطه زى الجاهز بالظبط ويتقدم
بالنسبة للحمص جبته معلب جاهز والشطة معملتهاش لان محدش بيحبها عندنا
بالف هنا
رئيس قسم المطبخ ا سمسمه سعد
تابع ايضا معمول مقدمه من الشيف مني رضا
تابع ايضا كب جلاش مقدمه من الشيف شوشو عرابي