كفاكم تراجع تحت سلم الاحباط …. يوميات متغرب

في يوم واحد 9 رحلات طيران من مصر على خطوط مصر للطيران، لنقل حوالى 3800 معتمر إلى جدة والمدينة المنورة،
بينهم 11 رحلة إلى جدة، و8 رحلات إلى المدينة المنورة

بشكل بسيط جدا
اقل تكلفة للفرد في رحلة عمرة طيران مع الاقامة ممكن تصل ل ٥٠٠٠٠ جنيه يعني تقريبا ١٠٠٠٠ ريال اللي هو ثمن التذكرة والفندق والاكل والشرب والمواصلات وشوية هدايا بسيطة.
يعني ٥٠ الف جنيه
* ٣٨٨٠ معتمر = ١٩٤ مليون جنيه ده يوم واحد فقط ..

يعني لو قلنا ان ٣٨٠٠ فرد افراد الرحلة في يوم واحد بس للعمرة يطلع زيهم كل شهر بلاش كل يوم
* ١٢ شهر يعني تقريبا بنتكلم عن ٣ مليار جنيه للعمره..

ما تنساش عندك حج وعندك سفر سياحة وعند استهلاك داخل مصر يفوق المبالغ دي بكتير من ١٠٠ مليون مصري..
يبقى مايجيش حد يقولي ان لسه في حد بينام جعان

في مصر للاسف الغالبية العظمى في مصر عايشين بس اللي عايز يستسلم للفقر ها يستسلم..
واللي اتعود على الاستقطاع هيعيش يستقطع في الناس..

انا اعرف ناس في الغربة والله ما بتعرف تكتب وتقرأ وشغالين عمال وسواقين وبيعملوا فلوس احسن من مهن عالية عشان هما عايزين يوفروا..
ايه الفرق بين الرجل اللي اتغرب والرجل اللي قعد في بيتهم ومافكرش يجتهد او يستلف او يشغل دماغه..

يا عالم ده سمسار العقارات في مصر ممكن جدا يكون امي مابيعرفش يقرا ويكتب وشغل دماغه بقى سمسار وطلع المحمول واللابتوب والسيارة بتاعت نقل الرمل وهو جاهل بس مناضل وعنده مخ احسن من اللي اخدوا شهادات ونايمين في البيوت بيعيطوا من البطالة او ماشاء الله قاعدين في بيت مامي وبابي على الفيس بوك بيعارضوا في كل حاجة بتحصل وهما اساسا حاقدين ومقهورين من نعم الغير ورزق اصحابهم اللي قرروا يشغلوا دماغهم وعملوا فلوس.

اللي عايز يعمل فلوس هايعمل واللي عايز يرمي بلاه على الزمن والظروف والوطن هايرميها..

وماتنسوش كم صاحب عربية فول بيطلع يعمل عمرة كل سنة..
عايز تعيش زي البني ادمين خليك ايجابي
وقوم اشتغل
وربنا أمرنا بالسعي في مناكبها

ماحدش هايفكرلك تشتغل ايه لان الحرفة اللي جواك انت بس اللي قادر تكشفها وتستفيد منها..

وعلى فكرة
حديثي هدفه اصلاح انفسنا للافضل والتعامل بشكل ايجابي مع نفسنا قبل الدنيا..
يعني انا باتكلم عن كل شخص تافه قاعد في بيته بيشتكي من قلة الشغل.. اللي عايز يخلق لنفسه مصدر دخل هايقدر..
بس مش لازم بالشهادة ولا لازم يكون في الحاجة اللي بيعرفها وبس..

كفاكم تراجع تحت سلم الاحباط
============

كتبها
مصطفى النفياوي
مصري متغرب