مين قال إن جوزك عشان يحبك لازم تتعلمي طبيخ أمه !بالعكس ممكن يكون جوازه منك مخصوص عشان يهرب من طبيخها الجميل ..ومين قال إنه عشان ما يبصش لغيرك لازم تكوني مهتمة ببشرتك وعاملة شعرك ومحافظة على وزنك! بالعكس ممكن يكون نفسه تطنشي نفسك شويه عشان هو مخنوق أصلا ًمن الحنتفة الي أنت فيها.. يكون حابب شكلك كأم وزوجة مبطبطة ورشقتك دي مش بسطاه لأنه شايف شكله جنبك غريب ومش متناسق !ومين قال عن الراجل أصلا ًإنك ممكن تربطيه جنبك بقورطة عيال بالعكس الجواز حاجة والخلفة حاجة تانيه خالص وعايزه استعداد نفسي تاني !ومين قال إنك لازم تبقي ست سوبر عشان ترضيه ! في رجالة يحبوا الشخصية القوية والست الي واثقة في نفسها وبيرفض بشدة حالة الرعاية الكاملة الي بتحسسه إنه متجوز ماما مش زوجة وحبيبة!ومين قال عن محاولتك إنك تكوني مثالية حيخلي الي حواليكي يحترموكي لا دول ممكن يتخنقوا منك ويبعدوا خالص عنك ولا محاولتك الدايمة على الحفاظ على نظافة البيت ودعكه بكلور عشان يتعقم ويبقى بيشف ويرف هو ده الي حيخلي صحة ولادك كويسه بالعكس انت حتجيبلهم حساسية وحتخلي مناعتهم في الأرض خاصة في كل مرة يخرج إبنك فيها للتلوث الي احنا عاييشن فيه ولا تكوني فاكرة إن ربطتك جنبه وهو بيذاكر هي دي الي حتخليه يتشطر ويفهم ويحفظ زيادة وتكوني كدة عملتي الي عليك معاه بالعكس استقلاليته هي إلي حتنفعه ومسكتك ليه ولو بتجيب درجات أكتر مش أهم من بناء شخصيته!
عارفه صحابك الي ملمومين حواليكي وشايفه إنهم الي ليك في الدنيا وبتحكلهم كل دخلياتك وفكرك إن بيتك الي مفتوح ليهم ليل نهار وودانك الي مليانة بكلامهم وتليفوناتهم لو فاكرة انهم بايقين تبقي غلطانة وتدخلهم الي فكراه في مصلحتك ونصحهم الي من القلب ممكن لو محكمتيش عقلك في علاقتك بيهم ياخدوكي للحضيض ويصبحوا ألد الخصام بين يوم وليلة!
أنا مش بخوفك ولا بفقدقك ثقتك في نفسك وفي أفكارك التي مؤمنة بيها بالعكس أنا قصدي إن مافيش ثوابت في الحياة ولافي العلاقات وكل واحد فينا وحياته الخاصة مختلفة عن الباقيين والثوابت ما بتكونش غير في الدين الي حتى تفسيرنا ليه بيختلف من جيل لجيل ومن ثقافة للتانية.
حبي نفسك وثقي فيها وماتوجعيش قلبك في لهث عشان ترضي الي حواليك اعملي الي تقدري عليه والي شايفاه صح وحاولي توازني فخيَر الأمور الوسط واستعيني بالي خلقك يرشدك ويوجهك للي فيه الخير وحكمي عقلك وقلبك وسلمي إن مافيش كمال لا في علاقة ولا في نظافة ولا في عمل وإن الكمال لله وحده.