كنتِ ولا حاجه:

كنتِ ولا حاجه:

بقلم/ شيماء أحمد متولي

سمعنا كلنا من زمان النصيحة اللي بتقول ( متخليش حد يكون كل حاجة في حياتك وانت بالنسباله مجرد حاجة واحدة بس )، وكمان كانوا بيقولولنا ( خد اللي يحبك ) عشان كل انسان في حياته اولويات ، طيب امتى تعرف انك بالنسبة للشخص ده مجرد “اختيار  option ” ولا مش من ” اولوياته “؛ و  ايه هي الـعلامات اللي منها تتـأكد انك بالنـسبه له مش اكتر من انك شيء  مركون على الرف ، بيدور عليه بس وقت ما يحتاج له ،  بس مش اكتر من كده ، للأسف كتير مننا لما بيحب حد بيخليه هو اول واهم حاجة في حياته، ولو يطول يولع صوابعه العشرة شمع عشان ينور  حياته مش هيتاخر ، حتى لو كانوا  هم  بالنسبا له مش كده ، وبيحاول على قد ما يقدر يتجاهل كل العلامات اللي بتكشف ليه الحقيقة ويدفن راسه في الرمل زي النعام عشان ميشوفوش الحقيقة ، عشان يفضل عايش وهم جميل ، لانه اصلا مش عايز يشوفها، لكنه بعد فترة بيضطر يواجه الحقيقة بعد ما تكون العلاقة سواء كانت علاقة حب او صداقة، إنهارت واتدمرت وخسروا كتير من مشاعرهم ووقتهم مع شخص ميستاهلش بانهم يضيعوا حياتهم وحبهم عشانهم ، وعشان كدة انهاردة هقولكم مين هم الاشخاص اللي بتظهر عليهم العلامات اللي تدل علي انكم كنتم مجرد اختيار بالنسبه ليهم ومش من اولويتهم عشان تلحقوا نفسكوا بدري وتحاولوا تصلحوا الغلط وتنهوا العلاقة ديه من اولها.

• الشخص اللي بياخد كل حاجة بدون ما بيدي اي حاجة، يعني هو طول الوقت بيستناك تقف جنبه وتساعده وتهتم بيه وبمشاعره وتسمعه وتقدمله النصيحة والدعم، وبيلومك لو قصرت في حقه، في حين انه مش بيعمل عشانك اي حاجة من الحاجات دي، يبقي انت بالنسباله اكيد عمرك ما كنت واحدة من اولويات حياته، للاسف انت كنت مجرد وسيلة بيستخدمها عشان يوصل للي هو عايزه مش اكتر.

 

• الشخص اللي دايماً تكون محتاجة يكون وقف جنبك في اوقات تعبك وحزنك وفي كل مرة بيخيب املك وبيخليك تندم علي معرفته ، لانه عمره ما كان قد ثقتك ولا عمره حاول يعمل عشانك اي حاجة مهما كانت صغيرة، ده شخص مش بيقدرك ولا بيقدر وجودك وبيعتبرك مجرد “اختيار”  مش ” اولويه”  في حياته.

 

• الشخص اللي مش بيهتم بمشاعرك ،وطبعاً علامة مهمة من العلامات اللي تاكدلك انك مجرد ولا حاجة بالنسبة ليه و انه ميبقاش بيهتم بمشاعرك ولا بيخاف على زعلك او بيعملك حساب من اساس ، لان مفيش حد بيهتم بوجود حد في حياته هيفكر يجي عليه او يأذي مشاعره ويجرحها.

 

• الشخص اللي مش بيكلمك غير لما بيكون فاضي ومعندوش حاجة تانية يعملها وتكون انت  بالنسباله لشخص مجرد “خطة بديلة” مش بيلجألك ولا بيفكر فيك غير لما مبيبقاش عنده حاجة تانية يعملها، وعادة انت اللي طول الوقت بتكلمه وهو مش بيحاول يكلمك خالص غير لما بيكون فاضي، تبقي اكيد مش مهم بالنسباله،لان اللي بيحب حد وبيهتم بيه بيفضيله نفسه وبيكلمه مهما كان مشغول.

 

• الشخض الاناني ومش بيفكر غير في نفسه ، فــى ده اصلا مش بيهتم بحد غير نفسه ولا بيفكر في حاجة غير الحاجات اللي هو بيعوزها وبس، والاولوية الوحيدة في حياته هي “نفسه” وبس، اما الباقي فى كلها حاجات ثانوية سهل جداً يستغنى عنها. 
• الشخص اللي بتشوفه بيعامل غيرك بطريقة احسن من اللي بيعاملك بيها لما تبقى طول الوقت بتلتمس له الاعذار وبتقول لنفسك اصله مشغول ومش فاضي، وعشان كدة مش بيكلمك ولا بيهتم بيك، وبعد كدة تلاقيه بيعامل غيرك بطريقة احسن بكتير من اللي بيعاملك بيها، يبقي لازم تعرف وتتأكد انك مش شص مهم بالنسباله.

• بتحس انك مضغوط نفسياً طول ما هو موجود ، طالما وجودك جنبه وقريب منه بيسببلك ضغط نفسي، وهو مش بيهتم يحل معاك المشكلة اللي بتخليك تحس بانك مضغوط وتعبان كده، تبقي اكيد مش مهم بالنسباله ومش فارق معاه اصلا، لانك لو فارق معاه اكيد مش هيبقى مبسوط وهو شايفك مش مرتاح.

 

خلي بالك:

 لما تلاقي نفسك بتتعاملي مع شخص بيتعامل معاكي بعدم اهتمام واهمال دايما بعد ما ضمن وجودك في حياته ، فركنك علي الرف وقت ما يحتاجك تكوني جنبه يلاقيكي ، فلازم ولابد الانسحاب من العلاقة ديه ، لأنك غالية قوي ولازم تحفظي علي نفسك وعشان انت  خسارة في اي حد مش قادر يحافظ او يقدر الإنسانه اللي معاه.

واخيرا حابة اقولك دوري في احساسك من الاول  الشخص ده قادر يحتويكي ولا. اسالي نفسك كام مرة كنتي سعيدة معاه ولا ، واسلوبه  وشخصيته انت مرتاحه  في التعامل معاه ولا ، حابه تتكلمي معاه وهو بيستمع ليكي ولا كان حمل عليكي ومش مستوعبه شخصيته واسلوبه معاكي .

لو انت مش كنت مرتاحة من الاول في العلاقة ديه بلاش تيجي علي نفسك اكتر من كده وابعدي بكل قوتك.