النفقة على المخرج
كتبت / غادة العليمى
وقت تصوير فيلم الشك القاتل كان المفروض ان مريم فخر الدين هتصور مشهد فى بيت راجل غنى .. بحيث انها تظهر وهى ماشية فى جنينة البيت لحد ما توصل للباب الخلفي للبيت..
فى يوم التصوير فوجئت مريم زى ما فوجئ باقى فريق العمل بهيصة وظيطه من الناس اللى واقفة تتفرج.. ولما لقوا ان مفيش فايدة أنهم يمشوا.. اكدوا عليهم أنهم ما يعملوش دوشة وقت التصوير ولا يكلموا الممثلين ويتفرجوا من سكات..
ودرات الكاميرا وكان المفروض انه فى كومبارس بيستقبل مريم ويحيها .. فالست مريم بدأت تجهز للمشهد والمخرج قال اكشن.. وبدأ التصوير واذ فجأة تصرخ واحدة من الناس اللى واقفين يتفرجوا وتقول يا عسكري يا عسكري…. وطبعا التصوير وقف والعسكري جه.. والست ادت له ورقة .. بص فيها ..وطلبت منه انه يقبض على الكومبارس اللى مع الست مريم.. ووقتها لقوا الكومبارس بيحاول يهرب بس العسكري كان اسرع منه وقبض عليه وعرفوا من الست انها واخدة عليه حكم بالنفقة وبيتهرب منها ولما عرفت انه هيصور فى الفيلم فى البيت ده جات مخصوص علشان تقفشه..ب
فريق العمل كله حاول يقنع الست بأنها تستني عليه لحد ما يخلصوا تصوير بس هى رفضت.. لحد ما اضطروا انهم يدفعوا لها تمن النفقة اللى عليه علشان تسيبه يكمل تصوير المشهد ..
ومن الفنون ماهو حقا جنون
