لقاء خاص جدا مع الفنانه الجميله هند حسني”هالة حببتى”
لقاء خاص جدا مع الفنانه الجميله هند حسني”هالة حببتى”
حوار صحفى ليليان خليل
وكما تعودنا من جريدة أسرار المشاهير أن تقدم لنا المبدعين وتبدع في تقديم الفنانين والمواهب الشابة والصغيرة، التي تعطي وتقدم كل ما عندهامن فن جميل ومحترم.
واليوم معنا موهبة جميلة كانت وهي صغيرة بمثابة فيروز الصغيرة أيقونة فنية جميلة عشقت الفن ، قدمت لنا العديد من الدراما والمسرحيات الكوميدية.
وكان من اشهرها هالة حبيبتي مع الأستاذ فؤاد المهندس.
اليوم معنا الفنانه الجميله هند حسني في لقاء خاص جدا .
بعد طول غياب …
تفتكري تريند حوارك مع الراحل (مفيد فوزي)كان بمثابة إحياء لهند حسني للظهور من جديد ؟
دي حاجه شقلبت كل الموازين فكرت كل الناس تاني بيا .
والحمد لله هو تريند من وقت الكورونا ظهر، التريند من ثلاث او أربع سنين والناس بدأت تفتكرني تاني .
كلمينا عن هند حسني الفنانة الموهوبة؟
انا هند محمد حسني مواليد 1979 عندي 44 سنه متزوجة وعندي ولد وبنت دخلت التمثيل وانا عندي ثلاث سنين ونص في مسرحية مصنع شيكولاتة مع الأستاذ سيد راضي وهو اللي اكتشفني الحقيقة.
وكنت بعمل بروفات وهي كانت مسرحية لعيد الطفولة على مسرح التلفزيون المصري على مسرح الزمالك وده كان البيت الثاني للأستاذ ، فؤاد المهندس وكان بيعمل ورشة صغيرة للاطفال وتم اختياري من ضمن الأطفال وكنت أصغر طفلة، وبدأت أشتغل هالة حبيبتي .
وجالي فيلم قفص الحريم مع الفنانة الجميلة شريهان وعزت العلالي وجالي فيلم المطاردة الأخيرة أستاذ عزت العلايلي رشحني فيه . فالموضوع ابتدى من هنا كل الجرائد والمجلات ايه ده فيروز الجديدة… بترقص وبتغني وبتمثل وأصغر طفلة على خشبة المسرح، فإبتديت ابقى موجودة في معظم الأعمال في الوقت ده، الشغل كان بيسافر برة أكتر عملت أوبريتات مع الأستاذ هاني لاشين فيلم الستات مع الأستاذ محمود ياسين والطوفان وكمان البرلمان الصغير والسيزون
وكتير من الأعمال الدرامية ودخلت الجامعة آداب مسرح جامعة حلوان وتخرجت بتقدير جيد جدا مع مرتبة الشرف .
الفنانة هند حسني
مسرحيه هالة حبيبتي ماذا تمثل لكى ؟
هي اللي حطتني أون تريك يعني الورشة اللي عملها لنا الأستاذ فؤاد الله يرحمه، هي اللي إبتدأت تكون شخصيتي من الإلتزام ، والاحترام والحب، وعرفتني يعني ايه شغل وانى أوفق بيني وبين المدرسة.
كنتى مدركة وقتها إن أهم محاور في مصر والوطن العربي هو اللي قاعد بيعمل معاكي حوار ؟
كان عندي أربع سنين ونص وكنت لا أدرك أن هذه القامة الله يرحمه، انا قاعده بتكلم معاها بالطريقة دي والعفوية دي وكنت عادي جدا، وانا ما شفتش اللقاء ده إلا لما إتعرض من كام سنة، لأن الأستاذ جميل المغازي كل اللقاءات دي بتكون حصرية على قنوات معينه .
قولنا حاجة طريفة ما حدش يعرفها حصلت بينك وبين الأستاذ فؤاد المهندس ؟
هو كان بيتعامل معانا كلنا يعني كأب لكن انا الحمد لله كان بيعاملني معاملة خاصة وكان بيحبني جدا .
شايفة إن الموهبة في الطفولة ممكن تختلف بعد كده مع العمر ، وتفتكري ده ليه دور في ابتعادك ؟
كل لما كنتى وانتى صغيرة بتمثلي بتلقائية وعفوية تحت توجيهات الليدر بتاعك سوى المخرج أو مساعد المخرج، انتى بتبقي أون تريك، لكن لو بقيتي أكبر من سنك وبقيتي متكلفة هيطلع الموضوع فيك .
الابتعاد اللي حصل ده علشان وقت ما اتخرجت من الجامعة انا ماسعتش وكان ظاهر جيل جديد زي منى زكي ومنة شلبي، وغيرهم كثير أوى من الفنانين لكن انا اشتغلت في شركة وقعدت 14 سنه بعد كده .
مين من الفنانين تتمني تشتغلي معاهم؟
يا كتير أوى مع حفظ الالقاب..
“حلمي، مكي ، الأستاذ يحيى الفخراني، ماجد الكدواني، كريم عبد العزيز حنان مطاوع منة شلبي منى زكي”، في ناس كثيرة أوى أتمنى أشتغل معاهم .
ياترى أولادك موهوبين زيك ؟
عندهم السينز ، يعني عندي جومانا عندها السينز شوية ولو يقدروا يوفقوا الموضوع وحبينه اه طبعا.
لأن الفن اسمى حاجة ولكن أنا بتكلم على الفن الهادف المحترم .
تجربة الإذاعة حاليا شايفاها حاجة جديدة بالنسبه لك؟
الحمد لله ربنا كرمني بشتغل في ثلاث حاجات في الإذاعة ودي من أحلى الحاجات اللي حصلت لي في حياتي لأني وأنا صغيرة، ما اشتغلتش إذاعة، تجربة جديدة وبتبقي شيقة جدا، ولازم توصلي المشهد بصوتك .
بس الناس مش شايفاك فأنا شايفة انه من الحاجات الصعبةإنك تخلي اللي يسمعك يا إما يقفل الراديو ، أو يا إما يكمل ، والحمد لله الحاجات اللي بشتغل فيها دلوقتي من أنجح الحاجات في الإذاعة المصرية زي عائلة مرزوق، ودي عيلة بقى من سنين ، وفي: من الجاني،
مع د/ محمد لطفي وهمسة عتاب، إنك توصل الشكوى بصوتك للمسؤولين وبتبقى من أحلى الحاجات إنك تبقى عارفة إن في رد جالك على الشكوى فأنا مبسوطة لدخولي مبنى التلفزيون بعد غياب كثير أوى وإني اشتغلت في الإذاعة وده كان حلم من أحلامي .
في حاجة جديدة في التليفزيون الفترة القادمة؟
لغاية دلوقتي لسه وكرم ربنا أحسن بكثير .
أتمنى بس من المخرجين والمنتجين والناس القائمين، يبدأوا يبصوا إن في ناس كثير موهوبة موجودة في البيت .
يعني أنا مبسوطة بمسلسل 55 مشكلة حب، ونصيبي وقسمتك ، إن في دم جديد ، وإن في ناس بتبتدي ترجع تاني، وبقى في ناس كثير مش بتحط موضوع الحجاب عائق ، وأتمنى إن كل الناس تشتغل .
