ليليان خليل تكتب: الجندي المجهول

ليليان خليل تكتب: الجندي المجهول

بقلم: ليليان خليل

لو دورت، وركزت في حياتك لحظه كده .. هتلاقي إن ما فيش حاجه ،بتيجي صدفه ولا إنجاز شخصي متعمد، بس في حد بيأخد باله من تصرفاتك ،طول الوقت… بيشجعك من بعيد ،بيقول لك برافو ،لما تنجح ،وخلي بالك لو وقعت ،بيمهد لك..

الطريق لو في مطبات هتقابلك ،بيقول لك خد بالك انت حلو بس :في حاجه إعملها هتجملك أكتر .

بيديك الطاقه الإيجابيه المطلوبة، وقت ما بتكون طاقتك خلصت ،بيقدر يشحن باقه حياتك بكل طاقه تقدر بيها تكمل .

بيعرف يفرحك وقت ما الكل بيجي عليك, بيقدر يكسر حزنك، وقت ما يشوفك مرهق النفس، بيحاول يساعدك لما بتكون مش عارف تفكر ،أو دماغك تعبت من كتر الشغل بيديك إشاره، لما الدنيا تزدحم من حواليك.

 وبيقول لك ستوب: إقف هنا ريح وحاول تاني، إنت تعبت من المشوار، ولو تعبت بيعرف يطبطب ،من غير ما بيدي مواعظ ولا يتكلم.

بيقدر يوصل وجهه النظر إنك تفهم من غير أوامر ولا شرط، وفي عز المشاكل اللي بتقابلك بيقول لك نفكر بالراحه، ومش بيسيبك تهدى هو اللي بيهديك ،وقت ما بتبقى خلاص  يأست .

 بيقدر يكون المسكن، اللي يسكن الألم ساعه الخنقه والضيقه، ومش بيسيبك غير لما بيخفض حراره نفسك وألمك .

ولما بيضيق الطريق، بيخليك تنط في البحر ،علشان تشوف متعه الرحله اللي بجد ويقول لك: إتعلم منها من غير خوف ،ولو وقعت، كمل وحاول تاني من غير يأس.

 الجندي المجهول.. شخص في حياه كل واحد فينا ،من غير ما تأخد بالك منه أو تركز معاه هو شايفك ،وعارفك وأوقات بيكون فعلا في حياتنا وبيكون هو مرايتنا اللي بتحلينا وقت البهدله، اللي بنشوفها في نفسنا..

 مرايتك هو شخص حقيقي بيعرف يجملك، وبيديك الطابع الأصلي اللي بتستحقه.

 سلاما! لكل جندي مجهول مش  بيتعرف غير في المواقف، وبيبان لما تفرح بيفرح لك ،ولما بتزعل، بيعرف يكون هو دواء للحزن ،تحيه للجندي المجهول ! .