ماتروحش لربنا لوحدك

ما تروحش لربنا لوحدك
في ناس كتير لما تقرر ترجع لنفسها وتراجع حياتها وتصرفاتها تمشي وتنعزل وتروح لربنا لوحدها …أيوه فعلا ! صحيح ماحدش وهو بيحاول يقرّب لربنا بياخد حد معاه ولا هو بيتوب ولا بيستغفر  ولا لما بنموت ولا نتحاسب بناخد حد معانا لأن دي علاقة خاصة (علاقتك بربنا)ولكن انتبه الدين حياة ومش حتقدر تحافظ على نفسك وتعدّل منها وتسيب كل اللي حواليك خاصة من المقرّبين منك كل واحد في ملكوت … وتفتكر نفسك من النّاجين وهم كفرة ومضلين ده شيطانك بيلعب بيك يا فالح وبيخدك للحضيض من سكة تانية  وانت مش عارف وطبعا المقصد زوجتك وولادك واخواتك وحبايبك المقرّبين …لازم يكونوا معاك خطوة بخطوة ويبقوا فاهمين انت رايح فين وانت محتاج لدعمهم وهم محتاجين يطمئنوا انك مش حتقرب لربنا وتبعد عنهم.
شدهم معاك بدل ما تنفرهم منك …في فرق انهم يشوفوك بتتظبط ويقولوا ماشاء الله او انهم يشوفوك ادروشت وانت عارف إنه ديننا معاملة وانه ديننا لا في رهبنة ولا انعزال … والدين نصيحة بس الإبداع مطلوب ولك مثل في  الرسول الكريم والصحابة شوف كان بيكلم الزاني ازاي ولا الكافر ،شوف برّه بأهله حتى اللي آذوه ودعواته ليهم لعل يطلع منهم ومن أصلابهم مؤمنين.
مهمتك انك تظبط نفسك وسط الضغوط اللي حواليك وهي دي اللعبة اللي حتفضل تلعبها طول حياتك وتحقق فيها (سكور) اللي تدخل بيه الجنة اللي تليق بعملك!  مش شطارة منك انك تبقى (سوبر) ولا تشوف نفسك كده وسايب عيلتك في وادي تاني بل وبتنفرهم من الجو اللي انت أصبحت فيه.
في ناس بتطفش من المساجد عشان وشوش عابسة بيفتكروها إنها هي دي وجوه المتدينين… وناس تانية بتهرب من كلمات ممكن يعتبرها متدين نصح بريء لكنه لم يختار كلماته المناسبة  فطلعت دفش منفر يفر منه السامعين.
دلوقتي انت مهمتك تظبط نفسك صحيح خلاص حاول ولكن اوعى تنسى انك مجرد طوبة صلاحه مش حيكون إلا بصلاح باقي السور فكن خير معين للي حواليك وأبشر حتقدر تعمل كتير بس اوعى تشوف نفسك عليهم وإلا حتقع  فعلياً مش بس حتقع من عنيهم