محشي كرنب مقدم من الشيف ناهد ياسين
كتبت مايسه الطحاوى
بطريقة سهلة …
اولا طريقه سلق الكرنب. وتقطيعه.
فى حلة ميه بتغلي ع النار فيها ملح وكمون وسكر ودي تكه من عندي علشان ورق الكرنب يبقى مسكر وتكوني شايله الورق اللي على وش الكرنبه الأخضر وغسلاها كويس ومصفياها وغسله مايصلح من الورق الخارجي الاخضر لو بتحبي الورق الاخضر نرجع للحله بتاعة السليق هنحط الكرنبه ونسحب ورقه ورقه منها بعد ما يدوب تدبل لحد ما تخلص الكرنبه كلها ونحطها في ميه بارده ونغيرها كذا مره ونغسله كويس لحد ماتبرد تماما علشان نوقف السوا ولو بتحبي الورق الاخضر تسلقيه بنفس الطريقه بس تحطيه كله مره واحده وبسرعه طلعيه بس تتأكدي انه استوى علشان بياخد وقت اطول من الأبيض .
طريقه عمل تسبك الصلصه .
*********************
بصل مقطع مكعبات صغيره جدا بس كتير علشان الخلطه تبقى مسكره وفى حله تسخني زيت ذره وتنزلي بالبصل يادوب يصفر تنزلي عليه بطماطم بيوريه (صلصة طماطم ) علشان متحمرش كويس فهيه هتديله لون وكام تقليبه تنزلي بعصير الطماطم ويستحسن تكوني غلياه لحد ماينشف وتبقى شبهه الصلصه علشان البصل بيشيط بسرعه فبكده مش هتطول ع النار فمش هتلحق تشيط والخطوه ديه من عندي انا ولما تتسبك هتحطي التوابل فى الاواخر علشان ريحتها ماتروحش
توابل المحشى.
************
التوابل عباره عن رشه من كل من … ملح … فلفل… نعناع ناشف ناعم… كمون… معلقة توم مفروم …. رشة سكر علشان التعادل مع الطماطم والصلصه .
وتقطعي الكرنبه بالحجم اللي انتي عايزاه وتقلبي الرز مع التسيبكه والخضره تكون كتيره شبت وبقدونس وكسبره وتحشي بحيث يكون الرز قليل علشان لما بيستوي بيزيد الحجم واثناء الحشو تكوني غاليه شوربه يستحسن تكون شوربة بط او فراخ بلدي اوالمتاح بالنسبه لي عاملاه بشوربة بط وتسقي حلة المحشي بحيث تكون الشوربه تحت الصف الاخيرمن الكرنب وتحطي عليه طبق علشان ما يفكش وتغطيه بغطى الحله عادى وتحطيه على نار عاليه لحد الغليان وبعد كده وطي النار ع الاخر لحد ما يقرب يستوي تغلي حوالي كوباية شوربه وفيها شوية صلصه وسمنه او دسم من على وش الشوربه وترشيها على حلة الكرنب ولمايستوي تطفي عليه وتعري الحله وبألف هنا وشفا .
ملحوظه …. ماتحطيش صلصه ولا سمنه ولا وش الشوربه يعني اقصد ولا شوربه دسمه إلا بعد ما يدخل فى سوى علشان الحاجات ديه بتعطل السوى…
