مراحل التصميم أعمال السباكة

مراحل التصميم أعمال السباكة 
بقلم/نانسى الفار

اتكلمنا قبل كده عن توصيلات الكهرباء و فى المقال ده هنتكلم عن تانى مرحلة و هى أعمال السباكة..
في الخطوة دي بنوصل المياه للمطبخ والحمام عن طريق المواسير، وبيتحدد مكان الحوض، ومخارج المياه، والصرف الصحي، والسخان، وطبعا في المرحلة دي بنستعين بالسباك.

خطوات التنفيذ:

اول حاجة لازم نعرف مقاسات الأجهزة الكهربائية زي البوتاجاز، والغسالة، والثلاجة وتحديد مكانها أولا.
تكلفة المصنعية للسباك بياخد نصهم تأسيس ونصهم تشطيب.
اشتري خامات المواسير المناسبة لعملية السباكة زي “اكواثيرم” و”بولي بروبلين” لأنها عملية جدا ومش بتصدي أو تبوش مع الوقت زي مواسير الزهر والحديد، ده غير ان عمرها الافتراضي بيزيد عن 50 سنة لو استخدمتها في درجات الحرارة والضغوط المصرح بيها. وعموما دي أحسن أنواع المواسير الخاصة بالتغذية ونظام الصرف:
أفضل الأنواع لنظام التغذية بالماء: GI, Copper, PVC, , PPR, CPVC, PIPES.
أفضل الأنواع لنظام الصرف: PVC, RTR, CI, DI.
اشتري خامات البانيو المناسبة وأحسن الأنواع هي الصاج لأنه قوي وألوانه لامعة ووزنه تقيل وسعره كويس، والاكريلك لأنه قوي وأشكاله حديثة ومتاح بموديلات وألوان مختلفة.
لازم عند تركيب رخامة الحمام والبانيو نسيب مسافة 20 سم على الأقل بين البانيو والحائط.
و تركيب مواسير تغذية السخان.
و تركيب مكان دش الحمام.
لو شقتك دور أرضي، اتأكد ان الصرف عندك منفصل عن صرف العمارة، علشان مع أول خلل في صرف العمارة، ممكن تنفجر المجاري فشقتك و دى نقطة مهمة جدا..
اعزل الحمام بمواد عازلة زي (membrain)لضمان عدم تسريب المياه أو تكسيره مرة تانية و ده بيبقى قبل تركيب السيراميك..
دى المرحلة الثانية بالترتيب وبعد ذلك. هنكمل كيفية تشطيب شقتك لو كانت على الطوب الأحمر فى المقال القادم.