مريم خليفة تهنيء جمهورها بـالعام الجديد وتكشف لـ”أسرار المشاهير” كيف تستقبل 2019

هنأت المطربة مريم خليفة جمهورها من الشعب المصري والوطن العربي بالعام الميلادي الجديد، وكشف عن جديد أعمالها بـ2019، قائلة : “أحب أقول لجمهوري كل سنة وانتم بخير، الحمد لله السنة اللي فاتت كانت سنة نجاح ختمتها بألبوم هفكر في نفسي، وكان في صدى كبير على الألبوم بشكل حلو أوي، والسنة الجاية إن شاء الله تكون أنجح وهيكون فيها حاجة جديدة برده بس مش هتكون مصري، احتمال كبير تكون خليجي وأتمنى تعجب الناس ودي هتبقا تاني تجربة ليا خليجي وإن شاء الله دي مجرد بداية بس للعام الجديد اللي إن شاء الله تكون سنة خير”.

وكشفت مريم خليفة في تصريح خاص لجريدة “أسرار المشاهير” عن الظاهرة السيئة التي لاحظت انتشارها بـ2018 وتتمنى اختفائها وعدم تكرارها بـ2019، قائلة: ” الظاهرة اللي ضايقتني وزعلت أوي من جوايا، إن حد يرد على أغنية حد تاني بأغنية، دي حاجة وحشة جدا، أتمنى متحصلش تاني، مش فاهمة احنا ليه بنقف قصاد بعض، الفن المصري فن راقي لا يليق به زي ما حصل، ومحبش يكون في مشاكل بالشكل ده بين الفنانين عشان نوصل للناس بشكل محترم وكويس، إحنا المفروض نكمل بعض مش نكون ظاهرة سيئة بالشكل ده قدام الناس”.

وتابعت “خليفة”: ” أمنيتي بالعام الجديد إن الفن المصري يتعملوا مهرجانات الفترة الجاية، والمهرجانات دي تبقا بتتكلم عن المزيكا والأصوات الحلوة، وتكرم الناس اللي حققت نجاح، أتمنى ده يحصل الفترة الجاية وهنكون فيه مميزين لإننا هنكون أول ناس عملنا كده”.

وأنهت مريم خليفة حديثها ، قائلة: “أنا بحتفل بالسنة الجديدة حفلة في الغردقة، وبستقبلها بكل حب وكل خير وزي ما كانت السنة اللي فاتت نجاح وخير هتكون السنة الجاية نجاح أكبر واستنوا ألبومي الخليجي إن شاء الله”.