” مريم سعيد صالح ” حقي مهضوم ولم أنال المساحة الكافية ولا الأداور المتنوعة لتقديم ماعندي
إعداد وحوار /دعاء سنبل
مريم سعيد صالح
سعيدة باللي وصلت له لكن حاسه أن حقي مهضوم
أحمد مكي قالي “جت تطل غلبت الكل”
مولد “غرام الفيس بوك “بداية السنة الجديدة
فنانة على درجة عالية من الثقافة تمتلك خفة ظل و تتمتع بروح الدعابة وتعشق الإرتجال، سقف طموحها لا يقف عند حد معين ،عندها إصرار لتحقيق هدفها ،بالرغم ان معظم أدوارها ثانوية ،ومشاهدها قليلة لكن دائماً ماتترك بصمة في أي عمل تشارك فيه ،استطاعت بعفويتها الوصول لقلب مشاهديها هي “مريم سعيد صالح”
في البداية ممكن تعرفي للجمهور مين مريم ؟
أنا مريم سعيد صالح ،أساساً أنا مترجمة فورية فرنساوي بدايتي كانت مع سمير العصفوري وأثنائها اشتغلت في مسلسل العيادة مع الحاج عمرو عرفة هناك تعرفت على الأستاذ فاضل الجارحي اللي قالي أنتي ممثلة شاطرة ونصحني بالدراسة وكان وقتها عمري كان 38 سنه مش هينفع أدخل المعهد خلاص أخدت المشاهد اللي هدخل بيها الأختبارات من تامر القاضي ودخلت اختبار جامعة الأسكندرية قسم مسرح وقبلت من أول مرة أقدم في حياتي.
التمثيل كان من طموحاتك ولا جاء عن طريق الصدفة ؟ وأيه الصعوبات اللي قابلتك خلال مشوارك ؟
كان حلمي من زمان بس الأسرة وكانت رافضة نهائي وزوجي كمان رفض لأني أتجوزت وانا عندي 16 سنة وزوجي كان ضابط شرطة أصدقائه كلهم كانوا في المسرح ومنهم محسن حلمي كان بيخرجلهم عروض الجامعة وماهر سليم بعد ما اتجوزنا ب20 يوم جاله تذاكر لمسرح الطليعة علشان نروح نحضر عرض مسرحية كانت مسرحية القاهرة 80 لسمير العصفوري وبالصدفة ، البحتة قومت في الأستراحة فلقيت بروفات شغالة للمخرج أحمد هاني فوقفت اتفرج لقيت أحمد هاني بيقولي أنتي ياقمورة ياحلوة تحبي تشتغلي معانا قولتله طبعاً بس أقول لجوزي الأول قالي جوزك انتي متجوزة لأن كان عندي 16 سنة وقتها وصغيرة أووي، هروح أقول لجوزي و أجي أقول لحضرتك روحت قولت لجوزي قالي مالناش دعوة بالمسرح تاني ومنعني من أني أروح لمدة 20 سنة
و لما حبيت أدخل الجامعة جوزي رفض أني أدخل جامعة مشتركة فدخلت جامعة الأزهر بنات ترجمة فورية فرنساوي كان نفسي أوي أدرس ألسن بس رفض علشان أدخل بنات بس ،أنا أصلاً خريجة مدارس راهبات ، لما دخلت الكلية كنت كل سنة بخلف حد من ولادي أنو معايا أربع أولاد وبعدين قعدت في البيت وأقنعت جوزي لفترة أننا ندخل كلية حقوق ونفتح سوا مكتب محاماة علشان أنا تفوقت عليه غار ورغم أني كنت ناجحة ومن الأوائل لكن قعدني ومكملتش في يوم كنت قاعدة لقيت في الجرنال ورشة لسمير العصفوري وعايز فنانين جداد وكان بيعمل عرض أسمه الطرشجي الحلوجي رحت قدمت أنا وبنتي كانت في أعدادية وقبلنا وأول عمل شاركت فيه كان مسلسل العيادة وبعدها تامر وشوقية وبعدها أتعرفت على الحاج عمر عرفة اللي تقريبا اتبناني وعملت معاه أكتر من إعلان وزهايمر مع عادل إمام وفي نفس السنة عملت بلبل حيران.
حسيتي بأيه أول مرة وقفتي قدام الكاميرا ؟
أول مرة وقفت قدام الكاميرا عيطت كان في مسلسل العيادة لان كان المشهد قدام خالد سرحان وللاسف هو من الممثلين الجادين اوى مكنش بيضحك ، عبدالله مشرف الله يرحمه هداني وقالي مالكيش دعوة بحد ومتخافيش أنتي كويسة بطريقته ، بعدها أديت الدور كويس وأعتبر اني الممثلة الثانوية الوحيدة اللي صورتي أتحطت على التتر بشكل كاريكاتيري، بعدها الحاج عمر عرفة أخدني عملت أكتر معاه من 15 اعلان .
حضرتك تعرفي أن في شائعات كتير بتقول انك ابنة الفنان سعيد صالح ،وفي تقارير عنك بيربطوا أسمك بيه ؟
أنا ماليش علاقة خالص بسعيد صالح وبقول كده دايماً وسعيد صالح أصلا في الحقيقة ماأسمهوش سعيد صالح لكن أنا اسمي في البطاقة مريم “سعيد صالح محمود صالح “واللي بيكتب كده ده خطأ فادح وأنا بأكد دايماً على أني ماليش علاقة بيه .
حضرتك قومتي بدراسات متنوعة غير الترجمة والمسرح كلمينا عن دراستك ؟
بعد ماخلصت أداب مسرح كنت هعمل ماجستير في جامعة القاهرة في المسرح نفسه لكني لقيت أن المسرح مش هيحقق لي طموحي فحولت دراستي بعد ماعملت تمهيدي الماجستير سبت كل ده وروحت دخلت الجامعة الفرنسية بدرس أنا وبنتي هيا خريجة أعلام القاهر وبتدرس معايا حالياً إخراج سينمائي حاليا فضلي ترمين وأخلص وبالفعل أخذت الكارنية وأخذت أول تصريح ليه بالإخراج كمساعد مخرج وعملت أول مشروع إخراج ليه بالفعل وبكمل بقا .
تفتكري تصنيفك كممثلة كوميدية ظلمك ؟
مدام روحك حلوة في الطبيعة تقدري تأدي الدور الكوميدي بشكل كويس والتراجيدي كويس مدام الموهبة موجودة تقدر تأدي الأثنين وأنا عملت أدوار تراجيدي زي دوري في مسلسل الكابوس وفي أنا شهيرة أنا الخائن ، وحالياً بعمل دور في مسلسل بحر مع ماجد المصري تراجيدي جداً.
أيهما تفضلين ولماذا المسرح ، السينما، التلفزيون ؟
السينما تاريخ لا ينسى، وانا عاملة حوالى 47 فيلم سينما غير الأفلام القصيرة و 98 مسلسل خلال 11 سنة الحمد لله عملت تاريخ لطيف معقول بس بحس اني حقي مهضوم ومش باخد مساحة كفاية ولا أدوار متنوعة تديني حقي اللي من خلاله أطلع كل اللي عندي بس انا مبدئي لو بختك نقطة سودا نوريها ولو حظك عضمة أقرشيها .
يعني زي دورى في أمير البحار كان جملة هيا ياواطي يأبن الواطية وكان في الحوار آفيه كنت هرميه على هنيدي لكن هنيدي مرضيش ورفض.
الإنسان اللي بياخد نقطة واحدة ويقدر ينور في وسط عمالقة ده في حد ذاته نجاح والواحد بيطلع لوحده مع ربنا بدون ماحد يسانده.
أكتر دور بتحسيه سبب معرفة الجمهور بيكي ؟
أكتر دور عرفني بجمهوري كان بلبل حيران علشان شهرة أحمد وأخذت مساحة في الفيلم شوية ،أنا دايماُ بحب أجتهد وارتجل وأرمي أي آفيه بس مش الكل بيديني الفرصة لأني شايفة أن دور الممثل أنه يسعد المشاهد مش يكآبه.
طيب بعد رفض زوجك الشديد لدخولك الفن وطبعه الشديد حتى في دخولك كلية مختلطة أيه ردة فعله حالياً وهل بيدعمك هو وأولادك ولا لا؟
الحمد لله مفتخر بيا و بيدعمنى حالياً هو وأولادي وسعداء بيا جداً لأني بقدم حاجات هادفة ومحترمة وبنتي كمان زي ماقولتلك خريجة إعلام وبتدرس معايا حالياً إخراج سينمائي.
حضرتك بتقدمي البرنامج الإذاعي “كلم ماما” ممكن تكلمينا عنه ؟وأيه اللي أستفدتيه من التجربة دي ؟
“كلم ماما” برنامج أونلاين وببلاش على فكرة أنا بعمله للمتعة الشخصية، وأستفدت منه عملت حاجة بحبها وكونت صداقات تعتمد على موهبتي في إدارة الحوار ومش بحضر الأسئلة أنا برتجل في وقتها .
ماهو أكتر عمل شاركتي في وكان قريب لقلبك ؟
عملت عمل خدت في مساحة حلو أوي وكان دور جميل أوي بس للأسف مخرجش للنور وأتعرض لمشاكل كتير إنتاجيه وتوقف وبعد ما تامر عبد المنعم ما أخذ التصاريح وكله تمام ،أخذ حكم في قضية شيك و كنت براهن على المسلسل ده كان هيفرق معايا جداً في تاريخي الفني ككل لأني كنت واخدة في مساحة مختلفة و واخده دور بيتنوع تنوعات رهيبة جداً لكن مظهرش للنور الحمد لله على كل حال.
قومتي بتقديم دور الأم العديد من المرات أي أم فيهم هيا مريم الأم في الحقيقة ؟
ولا دور من دول كل دور في حتة من مريم لكن ولا دو مريم الحقيقة،أنا أم مصرية جداً وعادية خالص وبضرب بأي حاجة في أيدي عادي و أضحك وأهزر زي أي أم مصرية .
مين أكتر صديقة ليكي من الوسط الفني ؟
الوسط الفني ممكن تصحبي في راجل لكن ست لا في صديقات بس نادرة يعني ويعتبروا زميلات لأن الست بتغير من الست اللي زيها وبتخاف انها تتفوق عليها .
مين الممثل اللي وقفتي قدامه وتحبي تقفي قدامه تاني وعطاكي مساحة ؟
أحمد مكي في مشهد في الكبير أوي رغم ان كان ليه مشهد في حلقة بعد ما خلصت قال عليه جملة عمري مانساها “دي جايه تطل غلبت الكل “هو بجد ممثل جميل ومتواضع وأنا فخورة طبعاً وسعدت لأن ممثل في حجمه يقول كده ، لكن في ممثلين بيتنططوا عليكي و يستقلوا بيكي و يقللوا منك من غير مايعرفوا قدراتك وميدوكيش مساحة ترتجلي أو تطلعي كل اللي عندك .
طيب لو في يوم بقيتي نجمة هتعملى زيهم ؟
لو ربنا كرمني عمري ما أعمل كده أنا بسيطة وشفافة جداً ورغم أني ممثلة لكن أنا لا أجيد الكذب وأكتر حاجة بكرها الغش والكذب وعلى مدار 11 سنة اللي أشتغلت فيهم عمري ما أتعوجت على حد ولا أتغيرت.
أيه الأعمال الجديدة اللي بتشاركي فيها حالياً؟
مسلسل بحر مع ماجد المصري وأحمد صالح والمخرج طالعة فيه أم صعيدية مقهورة من جوز بنتها وبيحصل لبنتها حاجات كتير ودايماً حزينة عليها وعلى اللي بيجرالها وبنتها اللي هيا الفنانة”فوزية ” والدور بعيد عن الكوميدية خالص.
حضرتك ذكرتي على صفحتك الشخصية في مواقع التواصل الاجتماعي انك بتكتبي كتاب ودى اول تجربة ليكي في الكتابة ممكن نبذة عن الكتاب ومحتواه ؟
انا بكتب فيه حالياً هو عبارة عن 10 قصص صغيرة و بتكلم فيها عن العلاقات اللي بتتكون على الفيس بوك، وعن علاقات الحب والخيانة والغدر والهجر والكذب والعشق والوفاء والزواج وبأذن الله هيكون مولد كتابي غرام الفيس بوك بداية 2019.
