✒بقلم – انتصار احمد
سألتة بكام البيض قال لها “الواحدة ب جنيه و ربع ” قالت له “هاخد الستة ب ستة جنيه”
رد العجوز “خدى اللى عايزاه بالسعر اللى تحبيه .. انا ما بعتش النهاردة حتى بيضة واحدة .. يمكن ربنا يفتح عليا”
خدت البيض و حاسة انها انتصرت .. ركبت سيارتها الشيروكى .. و قابلت صديقتها فى الكافيتريا الفاخرة جدا .. طلبوا زى ما طلبوا و اكلوا اقل من اللى سابوه .. و طلبت الفاتورة قالها 170 جنيه .. دفعت 200 و قالت له من طرف مناخيرها شكرا و سابت الباقى اللى صاحب الكافيتريا .
يمكن الكلام دا عادى و بيحصل كتير جدا مع صاحب الكافيتيريا لكنه مؤلم جدا و منتهى عدم الانسانية بالنسبة لصاحب البيض.
ليه دايما الغالبية من الناس بتحب تظهر قوتها و سطوتها على المحتاج بإعتبارها شطارة ؟
و ليه بنظهر الكرم لغير المحتاج ؟
ولدى كان بيحب يشترى حاجات من البسطاء حتى لو سعرها أغلى من أماكن تانية و حتى لو مش محتاج كان بيشترى .. و كتير كان مش بياخد الباقى .. زمان و أنا طفله سألته (و كنت فاكره انه سايب الناس تضحك عليه)
قال لى “دى معونة للناس الغلابة بس بحافظ بيها على كرامتهم”