مشاهير اليوتيوب .. احمد ادريانو

= كتب : ابراهيم مرزوق

   = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( احمد ادريانو ) ..

=  تحدث احمد لـ ( أسرار المشاهير ) فقال : اسمي احمد محمد عبد العظيم واسم الشهرة احمد ادريانو .. عمري 25 سنة .. كنت ح ادخل هندسة لكن كانت من 92,8 وانا كنت جايب 92.6 وحالياً مخلص تجارة حلوان .. أهم هواياتي هي التصوير والتمارين الرياضية ( الجيم ) ..

= بدأت من سنة على اليوتيوب كان الموضوع مجرد فيديوهات هزار وبتعلم مونتاج لسه وكانت مشاهداتي لم تتخطي 200 مشاهدة وكنت عاملها للترفيه مع صحابي ومع الايام بدأت ناس كتير تحب فيديوهاتي وبدأوا يعملوا شير بطريقة كبيرة ووصلت من 1000 مشترك إلي 100 الف مشترك في 45 يوم فقط وطبعي كان زي ما هوه ماتغيرش لما نجحت بحب الناس ودا بالنسبة لى جميل وباحاول أرده بانى اعمل لهم فيديوهات كوميدية ..

= كنت في مكان بأكل فيه جيت ادفع الشيك لقيته مدفوع من الكاشير طلع يعرفنى ومتابعني .. وحصل برضه اكتر من مرة في الموصلات لقيت الأجرة مدفوعة من ناس تعرفنى ومتابعينى .. وحب الناس ده باعتبره كنز لا يقدر بالمال ..

= أصعب المواقف ان واحد بعت لى صور واحدة وكانت الصور غير محتشمة وقال لى دى صور هتشهرك وأظهرت له انى وافقت وعرفت ان البنت من المحلة فحاولت أتواصل مع بنات اعرفهم من المحلة ووصلت للبنت بالفعل واتدخلت في الحوار لحد ما خلص .. وصورها أتمسحت وهددت الشخص ده انه لو اظهر اى حاجه للبنت هانزل صورته في فيديو لو ماطلعش أد كلامه وانتهى الموضوع وعملت فيديو وعيت فيه البنات والأسر عن موضوع الصور وحوار المراهقين وجاب 250 الف مشاهدة في يومين ..

= جمهور اليوتيوب غير الفيس .. اليوتيوب اغلبه من 15 إلي 25 سنة النسبة الاكبر لما بتتكلم عن حدث او ظاهرة حصلت هما بيكونوا عارفينها زى التيك توك انما الفيس أغلبهم ناس كبيرة وكانوا بيغلطوا وكانوا بيحسبوا انى باسرق فيديوهات من ناس وفيما بعد لما عرفوا ان دا برنامج وهما بيعملوا كدا علشان الشهرة اتصدموا ..

= طالما نمت واتكتب لي يوم جديد أعيشه هافضل دايما باحلم وأحقق حلمي وانسي اليوم اللي قبله بالحلو والوحش اللي فيه ..

= اول تجربة للتمثيل معايا كانت في تالتة اعدادى وكانت مسرحية قصيرة وعلي كلامهم كنت بأمثل كويس وبالذات ريأكشن وشي في الموقف .. بس ماجربتش تجربة الإعلانات ولو حصل نصيب هاقبل بيها وبالذات إعلان للشعر علشان انا مشهور بالشعر الطويل والناعم ..

= حصل معايا موقف أن كان في بنت متابعني وكانت دايما بتدخل تصبح عليا .. واستمرت كده حوالي 3 أسابيع بعدها انقطعت .. بعد فترة لقيت البروفايل بتاعها عليه صورة البقاء لله دخلت وأرسلت رسالة استفسار وعرفت إنها توفيت وأختها كانت هي اللي فاتحة الحساب وعرفت إنها كانت مريضة بالسرطان وماتت وكانت منعزلة عن كل حاجة ماعدا فيديوهاتي اللي كانت سبب في فرحتها رغم إنها كانت بتبعد عن اى حد علشان كانت في أخر فترة في مرضها وماكنتش عايزة حد من أصحابها يشوفها بدون شعر بسبب الكيماوي ..

= مافيش فيديو محدد كان السبب فى شهرتي لان كل الفيديوهات اللي عملتها في حياتي كلها 15 فيديو والمشاهدات من 2 مليون لحد 100 الف بس اللي عمل تأثير حوار البنت بتاعة المحلة وفيديو انتقدت فيه التعليم ..

= قرأت مقولة اثرت فيا وهي انك تحقق حلمك مهما حصل علشان مايجيش اليوم اللي تشتغل مع حد عشان يحقق حلمك .. وكل يوم بيعدى من عمرنا يعتبر رصيد وخلص فمهما حصل حقق حلمك وزود طموحك .. ومايمنعش الانسان من تحقيق حلمه غير الموت .. واهم نقطة لازم يعرفها اى مشهور انه نجح بعد توفيق ربنا بحب الناس فمهما حصل لازم يكون متواضع وبسيط اذا اراد ان يستمر فى نجاح ..