مشاهير اليوتيوب .. احمد كمال

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( احمد كمال ) ..

= تحدث احمد لـ ( أسرار المشاهير ) فقال : اسمى أحمد محمد كمال .. عمري 29 سنة .. درست بمدرسة الفرير الفرنسية .. واتخرجت من كلية الإعلام قسم الإذاعة والتليفزيون .. باشتغل حالياً فى شركة أورنج من حوالي 7 سنين .. أهم هواياتي هي حب الأفلام .. وده السبب اللى خلانى اعمل قناة ( بتاع أفلام ) .. بجانب حب الفن والأفلام بأحب البلاى ستيشن طبعاً وبأحب الكورة بشكل جنوني ..

= اللى شجعنى على اليوتيوب هو ( مروان سرى ) صاحب قناة ( أرزع ) للكورة .. طبعا قناة مشهورة جدا وتعتبر الثالثة تقريباً على مستوى الوطن العربى .. وهو برضه المنتج لقناتي ( بتاع أفلام ) .. وكنا أصحاب قبل ما هو يدخل على اليوتيوب أصلاً وبعد كده ابتدي يبقى مشهور .. وطلعت معاه فى حلقة عشان انا باشجع مانشستر يونايتد وهو بيشجع أرسنال وهما دول على طول اعداء فى الدورى الإنجليزى ..

= لما طلعت معاه فى الحلقة قال لي بص الكاميرا كأنها مش موجودة وأنت قاعد جنبى وكأننا بنتفرج على ماتش عادى وكان ريأكت وكنت على طبيعتي جدا لقيت المتابعين قالوا مين أحمد كمال ده طلعه معاك على طول يامروان .. احنا عايزين الحلقة الجاية يطلع معاك وفعلا طلعت معاه حلقة كمان .. فلقيت الموضوع نجح جدا .. فمروان قال لى طالما الموضوع نجح والناس بتحبك ما تعمل قناة وانا انتج لك برنامج برضه وتتكلم فيه عن الكورة أو أى موضوع أنت نفسك فيه .. قولت له بص الكورة بافهم فيها بس الكورة ليها ناسها .. أنا بأحب الأفلام أكتر ومتربى عليها أكتر ..

= من وأنا طفل عندى 4 سنين باتابع الأفلام الانجليش وبأحبها جدا ومش بأحب الكارتون ودى حاجة غريبة يعنى .. أتربيت على كده .. جدتي الله يرحمها ووالدتي بيحبوا الأفلام الانجليش برضه .. فبدأت في القناة من رمضان اللى فات .. طبعا النجاح ماكنتش متوقعه وان الموضوع هيحصل له طفرة .. خصوصاً ان القناة لسه معمولة أول السنة .. وابتديت 5 مايو قبل رمضان بيوم أو يومين .. مروان طبعا عشان كان فاهم فى اليوتيوب أكتر منى قال لى لو بعد سنة عملت 50 ألف مشترك دى تبقى حاجة حلوة جدا .. وهيبقى نجاح غير طبيعى وحاجة قوية .. لان فيه ناس كتير بيقدموا المحتوى بتاع الأفلام .. وعباقرة بالنسبة لى وبقالهم أكثر من سنتين أو ثلاثة كمان لسه لم يصلوا للرقم ده .. الحمد لله الموضوع نجح جدا .. وفى اول شهر وصلت لأكثر من 45 ألف متابع .. وبعد مرور سنة داخل إن شاء الله على 200 ألف مشترك .. وطموحي ان القناة تبقى أكبر قناة بتتكلم عن الأفلام انجليش وعربي فى الوطن العربى ونفسي تبقى الأكبر فى العالم .. فالأحلام من غير حدود ..

= أغرب الحاجات اللى حصلت لى واحد بعت لى وعايزني اعمل له إعلان على شقة إيجار عندي فى الخلفية .. الموضوع ده أتطلب منى من اسبوع تقريباً .. والحمد لله ما حصلش مواقف غريبة كتير .. المواقف الطريفة على طول فيها ضحك أثناء الحلقة .. على طول فيه مشادة بينى وبين ( على ) اللى ورا الكاميرا وهو المنتج المنفذ للبرنامج بتاعى وهو اللى شايل كل حاجة فى الاستديو والتصوير والناس عرفته بسبب اننا على طول بنشاكس بعض فى الميكنج ..

= أصعب المواقف اللى أتعرضت لها وبتبقى بايخة جدا لما أصور وفي نصف الحلقة النور يقطع والفيديو يتمسح فاضطر أعيده من جديد .. فيه موقف حصل لى برضه من أسبوعين كنت منزل ريأكشن على إعلان مسلسل النهاية وكنت عامل حسابي انه هيجيب مشاهدات عالية بس طبعا أتحذف .. حاولت أشيله وانزله بطريقة تانية برضه مانفعش .. اليوم ده اتضايقت جدا وعملت الحلقة من غير ريأكشن الإعلان .. وده خلانى أفكر انى ماعملش الفقرة دى تانى لأن الموضوع خلى الواحد يبقى على أعصابه طول اليوم رغم ان الفيديو الحمد لله جاب مشاهدات عالية ..

= كنت مرة باتكلم على مسلسل الضاهر بتاع محمد فؤاد وتامر عبد المنعم .. والحلقة دى ناجحة ومن أكتر الحلقات اللى الناس حبتها .. والناس عندى على القناة فاهمين انى مش مؤمن بموهبة تامر عبد المنعم كممثل ولكنى باعشق محمد فؤاد فهو مطربي المفضل .. وصل لى من مدير أعمال محمد فؤاد انه أتفرج علي الحلقة وماكنتش مصدق وكلمت محمد فؤاد وطلع عارفنى وعجبته الحلقة وقال لى جميل جدا وان ليك  مستقبل وأتضايق من كام حاجة كده بس كان رحب الصدر جداً وانا طول المكالمة مش مصدق نفسى انه بيوضح لى حاجات .. وده كان أكبر الأحلام بالنسبة لى انه يكلمني خصوصاً انى باعشقه جدا وبعد الحركة دى حسيت ان انا نجحت اوى ..

= فيه ممثلين عجبتهم حلقاتي لأنى أشدت بأعمالهم لأنها تستحق الإشادة طبعا الواحد مش فى دماغه ان الممثل يتفرج على حلقاتك أو أى حاجة .. عملت حلقة بروفايل الفنان احمد حلمي شيرها ستورى عنده .. وآسر ياسين على مسلسل بـ 100 وش شيرها ستورى برضه والفنانة منى زكى شيرتها على صفحتها على الانستجرام .. وايضا اللى بأحبهم من كل قلبى هشام ماجد وشيكو على مسلسل اللعبة وفعلا من الناس الجميلة جدا ..

=  من وأنا صغير نفسى أمثل جدا وأتمنى ان اليوتيوب تكون من خلاله فرصة .. لو إعلان برضه أكيد ح أكون مبسوط .. ومش عايز أبطل يوتيوب خالص .. والقناة تبقى أكبر موسوعة فى اليوتيوب للأفلام .. ولو بقيت ممثل وعملت فيلم اطلع وانتقد الفيلم برضه ودى هتبقى حاجة ماحصلتش فى العالم .. ونفسى اعمل كده الصراحة ..

= رمضان السنة اللى فاتت كان أول فيديو ليا فيه 35 ألف مشاهدة وده كان شئ قوى على أول فيديو .. آخر رمضان كنت عامل حلقات عن الأفضل والأسوأ كنت فى العادى باجيب 35 او 40 ألف تقريباً .. فيه فيديو جاب ربع مليون مشاهدة فبدأت احس أن الموضوع بيتطور وبياخد نطاق أكبر .. وماكنتش متخيل أنى أكون أسرع قناة نقد أفلام تطلع بسرعة كده ..

= الحاجة اللى بتخلينى حاسس انى ماشى على الطريق الصح لما حد يبعت لى يقول لى ترشيحاتك للفيلم حلوة جدا .. وانا أتفرجت على الفيلم وعجبنى .. اختياراتك حببتـنى فى الأفلام والتعليق ده باعشقه .. او واحد يقول لى مثلاً انا كل دماغي كانت فى شغلي او فى الكورة كنت باروح واجى مش لازم أتفرج على فيلم .. دلوقتى باشوف المسلسل والفيلم بمنظور تانى .. وبقى عندى قايمة للترشيحات بتاعتك .. ناس كتير بتقول نفس التعليقات وده شرف ليا طبعا ..

= أشهر الأفيهات بتاعتي هي ( أحلى مسا عليكم ) ودى اللى ببدأ وبانهى بيها حلقاتي .. و( كده كده ) و( حبشتكنات ) برضه باقولهم كتير وبنهزر بيهم فى الكومنتات .. وباشكر مروان سرى أنه أدانى الفرصة دى وأنه أدانى الشعلة انا كنت بافكر اعمل حاجة لكن مش عارف البداية .. وطبعا باشكر جمهور قناة ( أرزع ) ..

= فى الآخر أحب أقول للناس لو نفسك فى حاجة اعملها .. لو مين قال لك ايه اعملها وحط فى دماغك ان وقت فراغك تعمل فيه الحاجة اللى بتحبها واستغلها كشغل وهتحس بمتعة تانية بجد .. واتمني الناس تستغل وقت الحظر فى انها تفكر وتبدع وتزود دخلها عن الدخل الطبيعى .. لازم يكون فيه دخل تانى فى حتة تانية .. ماينفعش جو الشغلانة الواحدة ده .. اتمنى كل شخص يعمل اللى بيحبه ومايبقاش الشخص العادى اللى هو يصحى يروح الشغل يرجع وهكذا ..

= من فيديوهاتي المفضلة ترشيحات التسعينيات .. وفيديوهات أسوء عشر أفلام فى تاريخ السينما المصرية الجزء الأول والتانى .. والبروفايل حلو جدا لأن الناس بتحبه وبتبقى عايزة تعرف الفنان ده بدأ ازاى وايه أفلامه وايه أخر أخباره ..

= طبعا أتشرفت ان ( دير جيست ) دعتنى على الريد كاربت انى أتكلم مع النجوم الفائزين لعام 2019 .. أياد نصار وحلا شيحة واحمد رزق ومحمد سامي وزوجته مي عمر ونجوم آخرين .. وكانت مفاجأة لجمهوري بعد ما عديت 100 ألف مشترك فى 6 شهور .. والحمد لله القناة أعلى مشاهدات فى رمضان 2020 فى الوطن العربى كله فالحمد لله رب العالمين ..