مشاهير اليوتيوب .. الكابو

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( الكابو ) ..

= تحدث الكابو لـ ( أسرار المشاهير ) فقال : اسم الشهرة كابو او الكابو وعمري 25 سنة .. خريج فنون جميلة .. والهوايات الرسم والغني .. باقدم محتوي ترفيهي ..

= بدايتي من 8 سنين بس مش في الفيديوهات كان في مجال الأغاني لكن لم أوفق فيه .. واللي شجعني هو هدفي وحلمي اللي نفسي أوصل له .. وماكنتش أتوقع اي نجاح خالص بس عشان مش بأعرف اليأس ربنا وفقني .. وماكنتش حاطط خطوط او طريق امشي فيه عشان أوصل لحاجة كنت سايبها علي الله ..

= هو بما اني باتواصل مع المتابعين بشكل مستمر باحس ان كل الطلبات غريبة .. واغرب المواقف اللي أتعرضت لها اني أقابل حد طلع معايا في فيديو ويتصور معايا بس يطلع فى الآخر مش انا اللي كان هو قصده ..

= انا كنت كل فيديو بينزل علي قناتي لازم حد يخش يكلمني ويبقي متضايق وماينفعش اسيبه غير لما يبقي فاكك كده لان هدفي مش ان الناس تكرهني او اني أضايق حد .. هدفي اني اضحك الناس وارفه عنهم ..

= بصراحة مش بافكر ادخل الوسط الفني او الإعلانات لان مش شايف نفسي فيهم انا باحب الميديا .. واهم أحلامي تحقيق حلم المليون مشترك علي قناتي ..

= بصراحة انا ماعنديش فيديو واحد بينقلني لمرحلة أكبر من اللي انا فيها لان كل فيديو بيختلف عن الفيديو اللي قبله ومش باقيم نجاح الفيديو بالمشاهدات خالص انا باقيم الفيديو بوقت المشاهدة وعدد الليكات اللي علي الفيديو وطبعا الكومنتات فانا ماقدرش أقول ان فيه فيديو سبب في نجاحي لان كل فيديو بينقلني لمكان تاني عند متابعيني ..

= اكتر أفيه ليا علق مع المشاهد هو مشتااااااق .. وكملي يا طاهرة .. وانا مش باتعمد أقول أفيه عشان اشتهر به .. الافيهات بتيجي بشكل تلقائي جدا ..

= مش بأعرف أتكلم عن نفسي خالص بس انا باحب الهزار والضحك .. باحب الأغاني راب او شعبي وساعات غربي .. ونصيحتي لاي حد عايز يحقق حلم او هدف هو الاستمرار ومايركزش مع كلام الناس اللي النهاردة بيقول لك وحش بكرة هيحاول يقلدك ومش هيعرف ..