= كتب : ابراهيم مرزوق
= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..
ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( محمود الوردانى ) ..
= الهستيرى محلل رياضى من طراز فريد فهو يحلل المباريات ويعلق عليها بشكل كوميدي ساخر وبطريقة خاصة جعلته مميز بين كل من يقوم بتحليل المباريات .. وأصبح فى وقت قصير احد أهم المحللين الرياضيين على اليوتيوب ..
= تحدث الهستيرى لـ ( أسرار المشاهير ) فقال : اسمي محمود الورداني وشهرتي الهستيري .. عمري26 سنه .. كنت ادرس هندسة وتركتها فى السنة الرابعة لظروف شخصيه وحالياً انا في ليسانس حقوق عين شمس فى السنة النهائية .. هوايتي المحببة لعب ومشاهدة كرة القدم ومشاهدة الأفلام الأجنبية ..
= بدايتي على اليوتيوب كانت منذ 3 سنين ولكن ماكملتش شغل على اليوتيوب الفترة دي لأسباب شخصية وأهملت القناة بسبب الظروف دي وقفلتها خالص .. اما البداية الحقيقية كانت في شهر يوليو 2019 واللي شجعني على ده أصدقائي المقربين من اليوتيوبرز البارزين ..
= مادمت انت بتتعب وبتجتهد وعندك ثقة فى نفسك طبيعي تتوقع النجاح ولكني ماكنتش متوقع اني خلال 7 شهور اكسر حاجز 100 الف متابع على اليوتيوب واستلم الدرع الفضي بفضل الله ..
= الخطوط اللي رسمتها لنفسي اني أكون انا بشغلي ومجهودي .. وزي مااتعودت فى بدايتي أكون انا مصدر الناس تنقل عنه وماابصش لشغل حد .. المهم انى أطور دايماً من طريقتي وأسلوبي وفوق كل ده أتوكل على ربنا سبحانه وتعالى ..
= اغرب الطلبات اللي طلبها مني المتابعين ان متابع طلب انى أروح أتصور معاه هو واخواته فى بيت أخته يوم صباحيتها عشان عيلتهم كلها تكون متجمعة لأنهم بيتابعوني وكنت فعلاً ناوي أروح والله وأنقط العروسة بس للأسف انشغلت جداً .. وأطرف المواقف دايماً بتحصل من المارة الجائلين سواء بتوع الخردة واي حاجة قديمة للبييييييييييييع اللي بيعدوا من تحت البيت وصوتهم بيطلع أوضح مني فى الفيديو..
= انا زمالكاوي جداً ولأبعد الحدود ولكن حب الأهلاوية لي دي حاجة تفرحني جداً والسر في كده اني باعطى الأهلي حقه زي الزمالك طبعا ما بياخد حقه .. الأهلي نادي كبير ومسيطر علي الكرة المصرية في العقدين الأخيرين بشكل كبير واي محايد هيقول كلامي ده .. وهو ده اللى بيزعل مني بعض الزمالكاوية ولكن الغير متعصب هيفهم كلامي كويس ..
= متابعين كتير بيكلموني وهما مبسوطين لانهم ضحكوا جداً وهما بيتفرجوا .. ومش بيزعلوا لانهم عارفين ان كلامي بهدف الكوميديا ومش بيكون هدفي التقليل من احد ..
= الأحلام المستقبلية كتيرة جداً أهمها اني أتخطى حاجز المليون مشترك على اليوتيوب في منتصف 2021 ان شاء الله .. وحلمي الاكبر هو ان يكون لي برنامج تليفزيوني رياضي ساخر على احد القنوات الكبيرة .. الإعلانات والتمثيل حاجات نفسى فيها طبعاً في المستقبل لأن عندي موهبة التمثيل من صغري وده بيظهر فى فيديوهات الريأكت اللى باعملها كل فترة وهم حوالى 13 فيديو عن مواهب التيك توك المستفزة ..
= الفيديوهات اللي حققت مشاهدات عالية كتيرة جدا الحمد لله وفيه منهم تخطي المليون والاثنين مليون وبعضهم تخطى 5 مليون مشاهدة .. ولكن اقرب الفيديوهات لي هي فيديوهات الكرة ومنها فيديو بعد حصول الاهلى رسمياً على الدوري وده جاب مليون مشاهد في 3 أيام فقط .. وايضاً بعض فيديوهات الريأكت على التيك توك ولكن الفيديو اللي مصر كلها تقريباً شافته وبعض الدول العربية وتم عرضه على قناة العربية هو فيديو كنت اسخر فيه من نزول اهل اسكندرية للتكبير في الشوارع لمواجهة كورونا ..
= انا لى افيهات اشتهرت فى فيديوهاتى منها ( كرة صاروخية ماروخية ) ونطقى لاسم الكابتن الكبير وليد سليمان ففى احد الفيديوهات كنت باعلق على ماتش الأهلي والزمالك اللي انتهى بفوز الأهلي بثلاث أهداف نظيفة وقولت فيه ( وليييييييد سووووليمان ) بطريقة كوميدية وعلقت مع الناس وبقوا يطلبوها كل فيديو .
= نصيحتي لكل شخص نفسه ينجح فى حياته انه يجتهد فى الشئ اللى هو متميز فيه ولا يحبط من نقد بعض الأشخاص طالما هو مؤمن باللى هو بيعمله وأكيد النجاح والتوفيق من عند ربنا .. فهو يجتهد ولكل مجتهد نصيب ..