= كتب : ابراهيم مرزوق
= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..
ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( بلال عزت ) ..
= تحدث بلال لـ ( أسرار المشاهير ) فقال : اسمي بلال عزت وده مجرد اسم شهرة مش اسمي الحقيقي .. عمري 25 سنة .. دراستي ألسن عين شمس .. شغلي creative director وهو الشخص اللي بيطلع أفكار الإعلانات والتصور الكامل بتاعها .. هوايتي باحب الجيمز جداً .. والمحتوى اللي بأقدمه هو محتوى نقدي مش محتوى كوميدي عشان ناس كتير بتفتكر انه كوميدي .. هو محتوى ناقد شامل ممكن أتكلم فيه عن اي حاجة زي مشاهير السوشيال ميديا او حتى الأعمال الكبيرة جداً على التلفزيون وغيره ..
= بدايتي على اليوتيوب كانت سنة 2012 بعد الثورة كان نفسي اعمل حاجة مختلفة عشان رأيي يكون مسموع وحاولت كتير وفشلت اكتر لحد ما وصلت للإنجاز اللي انا فيه دلوقتي .. وكنت متأكد اني باذن الله ح يكتب لي النجاح عشان كنت ببذل مجهود كبير في كل حاجة باعملها وماكنش فيه حد بيعلمني ساعتها اعمل ايه او ابدأ منين بس أتعلمت بالتجربة ..
= اغرب موقف حصل لي كان من متابعة قابلتني في مول في التجمع وطلبت أنها تلمس شعري وكان الموقف محرج للغاية .. وحصل لي موقف مرة اثناء التصوير كنت باصور في غرفتي واخويا نايم وكان شخيره عالي جداً لدرجة اني فضلت أعيد التصوير كذا مرة ..
= من المواقف الصعبة اللي بتحصل بسبب التصوير هي الهجوم من بعض المتابعين مش بيفهموا ان ده مجرد محتوى هزار فيشتم صانع المحتوي بالأب والام ودي بتعمل مشاكل خصوصاً لما باشوف أمي بتضايق جداً من الكلام ده وفكرت كتير اني اقفل الكومنتات نهائي على اليوتيوب بسبب كده ولكن ده مش حل .. الحل ان الناس تفهم ان ده مجرد محتوى ولو ماعجبهوش ممكن يعبر عن رأيه او مايتفرجش على حاجة هو مش حاببها ..
= عملت حلقة في مرة عن احمد حسن وزينب وإكرامي هجرس ولما قابلتهم في الحقيقة قدمت اعتذار لإكرامي بسبب كلمة قولتها في فيديو ضايقته .. مش غلط إننا نعتذر لو تفهمنا الأمور بشكل صحيح ..
= أحلامي المستقبلية هي حلم كبير وأحلام صغيرة .. أحلامي الصغيرة اني أشارك في إعلانات وأتعلم التمثيل وأشارك فيه بشكل كبير .. وحلمي الكبير هو تقديم برنامج ويكون احسن من برنامج البرنامج ..
= انا من اول فيديو في البرنامج اللي بأقدمه ( عالم القرود ) سنة 2016 حسيت ان هو ده اللي كنت بادور عليه من زمان رغم ان قناة الحياة ساعتها مسحتهولي وحسيت ساعتها بيأس رهيب لكن كملت .. بس اكتر فيديوهات بأحبهم هو فيديو كنت بادافع فيه عن ابو تريكة وفيديو وائل غنيم ..
=عندي أحساس عموماً بالظلم بسبب اني لما بدأت انتقد ماكنش حد بيعمل المحتوى ده في مصر وفيه ناس اخدت الفكرة مني واتشهرت أسرع مني لحد ما كان بيتقال لي اني انا اللي سارقهم .. لكن اللي حصل دلوقتي اني لسه مكمل من 4 سنين في عالم القرود ولسه هاكمل وهما وقفوا عشان أفكارهم انتهت ..
= مش ممكن انسي اني لما كنت باعمل فيديوهات في الاول كنت باكلم اخويا وباقول له فيه ولد طالع جديد بيعمل فيديوهات بيجيب 1000 مشاهدة بالعافية اسمه شادي سرور وانا كنت ساعتها باجيب 5000 مشاهدة وكانت بالنسبة لي رقم كبير .. واخيراً الحاجة المهمة جداً اللي نفسي أوصلها لأي حد ماتشتمش حد بأهله لمجرد انه مش عاجبك ..