مشاهير اليوتيوب .. بيدو سعد

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( بيدو سعد ) ..

= تحدث بيدو لـ ( أسرار المشاهير ) فقال : اسمي عبد الرحمن سعد .. واسم الشهرة بيدو سعد .. عمري 25 سنة .. بادرس تربية قسم فرنساوي جامعة طنطا .. عندي هوايات كتير جداً بأحبها بس اكتر هواية اني بأحب السفر جداً وبأحب دايماً أتعرف علي أماكن جديدة .. بأقدم محتوي ريأكت علي قناتي في اليوتيوب وان شاء الله الفترة الجاية هيكون فيه محتويات جديدة ومتنوعة لأني بأحب التنوع وبأحب الناس تشوفني في اكتر من محتوي ..

= بدايتي في اليوتيوب كانت بداية مختلفة شوية لأني ماكنش عندي اي نية اني ادخل مجال اليوتيوب أصلاً .. مجرد شوفت فيديو وحبيت اني اعلق عليه ونشرته علي الفيس بوك لصحابي بس والحمد لله الفيديو نال إعجاب ناس كتير فقررت اعمل فيديو تاني وكنت باقارن فيه بين البنت والولد في الحلاقة بشكل كوميدي .. وبعدها قررت اعمل قناة علي اليوتيوب وكان المحتوي في البداية اني باعمل فيديوهات باقارن فيها بين العرب والأجانب في مواقف حياتية بتحصل وبرضه بأمثل مقاطع بتحصل في حياتنا الأسرية وداخل كل بيت عربي ..

= فكرة اني اعمل قناة كانت مجازفة جامدة بالنسبة لي لان أصحابي شجعوني في البداية فقط ولكن بعد كده مالقيتش تشجيع .. ولكنها كانت محاولة ممكن تكون فاشلة وممكن تكون ناجحة بس كان عندي ثقة في الله قبل نفسي اني احتمال كبير انجح .. لكن برضه قابلت ناس كتير سببت لي إحباط وبطلت يوتيوب لفترة كبيرة ومن ضمن الحاجات اللي سببت لى إحباط اكتر ان قناتي بعدها اتقفلت وبدأت من الصفر ويومها قررت اني أعيش لتحقيق حلمي فقط واخدت النجاح تحدي مع كل اللي راهن علي اني هافشل .. فالإصرار أهم خطوة خلتني مكمل ولسه هاكمل باذن الله ..

= جالي طلبات كتير غريبة من المتابعين بس اكترها كان ان كل لايف أطلعه ناس كتير بتطلب مني اغني وانا أصلاً لما باغني أمي بتطردني من البيت ..

= اكتر موقف حصل لي تعبني اثناء التصوير هو اني فضلت قدام الكاميرا اكتر من ساعة الا ربع وفي النهاية اكتشفت اني أصلا ماعملتش start recording

= من أصعب المواقف اللي أتعرضت لها في اليوتيوب ان بعد ما قناتي تخطت حاجز 300 الف متابع اخدت اكتر من إنذار في يوم واحد وكان باقي لي فرصة أخيرة يومها كانت حالتي صعبة لاني للحظة حسيت ان مجهود سنين ممكن يضيع في لحظة وموقف تاني ان قناتي أتعرضت للسرقة وبالفعل اتسرقت مني مش هانسي اني فضلت ساجد لربنا ببكي ان مجهودي مايروحش علي الارض وفضلت متابع لحد ما رجعتها .. وانذارات القناة كانت بسبب ان محتوي التعليق في الأساس مخالف علي اليوتيوب ..

= حصل كتير ان فيه أشخاص من اللي بانتقدهم بيحاولوا يتواصلوا معي مش ح أنكر اني تعاطفت مع البعض بسبب اني حسيت انه فعلاً مظلوم ولكن كان فيه منهم ناس بتتكلم بأسلوب مش كويس وعشان كده مش كل الأشخاص اللي كلموني مسحت التعليق عليهم .. وحصل مشاكل كتير بيني وبين أشخاص لهذا السبب ..

= عندي أحلام كتير جدا في المستقبل وأحلامي مالهاش سقف لاني شخص طموح لأبعد الحدود وبسبب ده ان شاء الله مش هيكون اليوتيوب هو سقف طموحاتي لان من ضمن طموحاتي الدخول في مجال التمثيل .. ولكن ده مايمنعش اني عندي أحلام كتير حابب أحققها داخل اليوتيوب ومنها اني باتمني أكون اكبر يوتيوبر عربي فى المستقبل ..

= من اكتر الفيديوهات اللي حققت لي جمهور كان فيديو نقد علي سما المصري وده كان اول فيديو لي علي قناتي التانية بعد ما الأولي اتقفلت وكأنها كانت رسالة اني أكمل .. الفيديو كانت نتائجه غريبة جدا بالنسبة لي لانها بكل بساطة تخطت حاجز المليون في وقت قصير جداً ..

= اكتر الافيهات اللي اتشهرت بيها هي كلمة ( كوكب زوحلق ) استغربت جدا لاني لاقيت ناس كتير بتبدأ تقولها في كلامها وبرضه ( نخش في الموضوع ) دي كانت اكتر جمل بتتقال علي لساني في الفيديوهات وحسيت ان متابعيني بيرددوهم كتير ..

= اكتر ناس حطمتني في البداية كانت اقرب ناس ليا وهم جزء كبير من أصحابي .. حتي أهلي ماكانوش مؤمنين بيا في البداية او بكل حاجة باعملها الا لما جت فترة وحسوا اني باتقدم في حاجات كتير في حياتي سواء ماديا او نفسيا حتي في طريقة كلامي وثقتي في نفسي ..

= تعبت جدا في بدايتي لاني كنت باعمل كل حاجة لوحدي ماحدش ساعدني في اي حاجة .. تعبت اني اعرف أصور بشكل كويس لاني بدأت تصوير بموبايل بسيط جدا .. وفكرة اني اعلم نفسي المونتاج وتعديل الفيديوهات وكل الحاجات دي كانت بتاخد مني مجهود لدرجة اني جاتلي أيام اقعد قدام اللاب بالساعات عشان أحاول اطلع حاجة كويسة ..

= بوصل رسالة لكل شخص بيتابع بيدو سعد اني دايماً ان شاء الله هحاول أكون عند حسن ظن الجميع ودائما هحاول أكون في تقدم عشانكم انتم قبل عشاني ..

= أهم نصيحة حابب أقولها لكل شخص عنده حلم ونفسه يوصل له وكل شخص نفسه يبدأ في مجاله اللي شايف نفسه فيه بس خايف من انتقاد الناس .. أوعي تتنازل عن حلمك عشان اي شخص علي وجه الارض .. الناس عموماً مش بيحبوا حد ناجح الناس بتهد المبني ولكن عمرها ما هتهد في حاجة مهدودة .. واكتر جملة مأمن بيها في حياتي لكي تنجح يجب ان تكون رغبتك في النجاح تفوق خوفك من الفشل ..