= كتب : ابراهيم مرزوق
= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..
ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجمان ( احمد ومحمد البسه ) ..
= احمد البسه ومحمد البسه ثنائي خفيف الظل اشتهر من خلال اليوتيوب على قناتهما ( ساقية البسه ) .. قدموا العديد من الفيديوهات الضاحكة التى رسمت الابتسامة على كل الوجوه خاصة الحلقات المنفصلة لشخصية طنط فاتن التى لاقت نجاحاً كبيراً واستحسان كل من شاهدها .. واستطاعوا بالتلقائية والبساطة ان يمدوا جسور المحبة بينهما وبين المتابعين .. والكل توقع لهما مستقبل كبير فى عالم الفن فى القريب العاجل ..
= تحدثا احمد ومحمد البسه لـ ( أسرار المشاهير ) فقالوا : أسمنا احمد البسه ومحمد البسه .. واسم الشهرة لأحمد ( بسبوسة ) ومحمد ( البسه الكبير ) .. احمد طبيب بيطري .. ومحمد طبيب بشري .. واهم الهوايات هى التمثيل ..
= بدايتنا مع اليوتيوب كان بسبب الأغنية اللي عملناها لأختنا .. اسمها يالا نفرق لمتنا واللي عملت صدي كبير في مصر كلها والعالم العربي ساعتها وكان عندنا قناة عليها بعض فيديوهاتنا وكبرت بسبب هذا الفيديو ..
= قناتنا اسمها ساقية البسه بنعمل فيها برنامج اسمه لايف في المطبخ .. عبارة عن معايشة لحياتنا اثناء الطبخ بيعتمد على الحكاوي والنصايح للطبخ وكمان بنقدم أغاني للمناسبات اللي تخصنا ..
= احنا كنا بنمثل مسرح من واحنا صغيرين وده ساعدنا فى تقديم افكار جديدة ومبتكرة من خلال حلقات منفصلة لشخصية ( طنط فاتن ) .. والصراحة نجاح الصفحة بييجي من عدم التصنع .. والمحاكاة الحقيقية والحكاوي الحقيقية مش اللي متصنعة ..
= من اغرب الطلبات اللي اتطلبت مننا اننا نغني في أفراح الناس .. ومهما نقول ان احنا دكاترة ومش مغنيين بيتعرض علينا مبالغ بس احنا بنرفض .. بالإضافة لطلبات ناس كتير بأنهم نفسهم ييجوا عندنا في البيت ..
= الحمد لله ماحدش عمره زعل مننا خالص بالعكس معظم الكومنتات كلها حب وإعجاب وبنلاحظ ان فيه مشاهير بتابعنا لما بنقابلهم بالصدفة ..
= أحلامنا المستقبلية هى التمثيل المحترف في الأعمال الفنية .. وده اللي بدأه احمد بالفعل بشغله في مسلسل سوف يتم عرضه قريباً اسمه ( بيضة دهب ) بطولة هنادي مهني ونانسي صلاح ومحمد جمعة وسامي مغاوري وسليمان عيد والفنان القدير صلاح عبدالله واسلام ابراهيم واللي احمد بيعمل فيه دور معتز وهيكون مفاجأة ان شاء الله ..
= أشهر الافيهات اللي احنا مشهورين بيها ( جينا نصحيها الصبح صحيت ) و( ايه ده ايه ده ايه ده ) و( ناس ليها دماغ لوحديها ) ودول اكتر حاجة علقت مع المتابعين ..
= اكتر فيديو فرق معانا هو أغنية فرح اختنا .. أغنية يالا نفرق لمتنا .. والفيديو ده فرق معانا جداً وزود عدد المتابعين بشكل مش طبيعي .. وبنحمد ربنا على النجاح ده بكل تأكيد ..
= بما اننا دكاترة فروشتة النجاح اللى ممكن نكتبها للمتابعين سواء علي السوشيال ميديا وفي الحياة عموماً هي المصدقية والبساطة .. وانك تبقي علي طبيعتك ومش متصنع وماتحاولش تمثل شخصية مش حقيقية عشان الكدب مالوش رجلين .. فخليك على طبيعتك قدر الإمكان والنجاح بإذن الله ح يوصل لك أكيد ..
