مشاهير اليوتيوب .. عبدالله جامبو

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( عبد الله جامبو ) ..

= تحدث عبد الله لـ ( أسرار المشاهير ) فقال : اسمي عبدالله محسن كامل واسم الشهرة جامبو عمري 27 سنة .. حاصل علي بكالوريوس أخصائي رقابة جودة الجامعة العمالية .. هوايتي الغناء والتلحين وعندي فرقة موسيقية تتكون من مؤلف الكلمات حسن رمضان ( بزوكا ) والموزع عمرو خالد (  بيسو ) ..

= بدايتي مع اليوتيوب كانت في 2007 وكنت صغير أبلغ من العمر 14 سنة وكان نفسي اغني في بداية حياتي وكنت باشتغل علي نفسي وباعمل أغاني لوحدي في البيت والاغاني ماكنتش كويسة اوي .. وكنت بانشرها علي اليوتيوب علي القناة وكنت لسه صغير ومش فاهم في اليوتيوب كتير والقناة اتقفلت لانى نسيت الباسورد بتاعها وبعدها عملت قناة في 2009 ونشرت عليها أغاني وبعدها بدأت في الفيديوهات في 2015 ..

= تعتبر الشهرة بتاعتي بدأت بفيديو كان في 2017 الفيديو كان يعتبر أول فيديو انتقاد في الوطن العربي علي الأشياء الغير جيدة التي تحدث داخل تطبيق التيك توك يجيب 4 مليون مافيش يوتيوبر وقتها جاب 4 مليون .. والحمد لله يعتبر في اسبوع حققت 4 مليون مشاهدة .. وهذا الفيديو يعتبر سبب شهرتي وباشكر ربنا سبحانه وتعالي اللي من غيره ماكنتش عرفت اعمل حاجة ..

= ويعتبر مافيش حد وقف معايا غير صديقي اسلام سعيد وهو مشهور بأسم اسلام أسو هو اللي بيشجعني دايماً ويقول لي لازم تعمل فيديوهات كتير وتشتغل وهتوصل   والناس حبيتك .. وكان بيحفزني اني اعمل فيديوهات باستمرار ..

= بقيت كل اسبوع اعمل فيديو وأحاول أجدد الافيهات واعتمد علي ريأكشن الوجه وأغير نبره صوتي وأتكلم لهجات مختلفة أشهرها اللهجة الخليجية فكانت كل الحاجات دى بتعلق مع الناس وعملت فيديوهات باللهجة الصعيدية وعجبت الناس جدا ..

= أصعب المواقف اللي أتعرضت لها ان كنت بانتقد واحدة في فيديوهاتي هي أتضيقت ودخلت شتمتني بالوالدة والوالد .. واتعصبت عليها جداً وتم الرد بفيديو هي ماسكتتش وبعتت لي ناس وتهديدات ان هي هتعمل لي محضر مباحث الإنترنت .. وبعتت لي ناس في البيت والحمد لله حلينا المشكلة بشكل ودي وكان ده بالنسبة لي أصعب موقف حصل لي بسبب فيديوهات اليوتيوب ..

= أتذكر اني انتقدت شخص فزعل مني واتصل بى وقال لى انه كان سنه صغير لما عمل الفيديو وماكنش فاهم ان اللي عمله ده غلط .. وانا تفهمت الموقف ومسحت الفيديو .. وحصل قبل كده ان فيه ناس عملت عليهم ريأكت وقالوا لى ان الفيديو بتاعهم نزل بالغلط فاضطريت اني امسح الفيديو اللى انا عملته عليهم ..

= أحلامي المستقبلية اني أكمل في الموهبة بتاعتي وهي الغناء وان أقدم أغاني جميلة وهادفة ولها معني ويكون مودها لذيذ والناس كلها تحبها واني اشتهر اكتر في الأغاني لان انا بأحب الأغاني اكتر بكتير من الفيديوهات وأكيد اي حد يتمني انه يدخل عالم الشهرة اكتر والأغاني أكيد ح تحقق لي الشهرة ..

= انا كنت بامثل في فرقه مسرحية اسمها نهاوند والحمد لله جت لى عدة فرص كويسة والواحد بيحاول يسعي أكيد لتحقيق النجاح ..

= الحاجة اللي انا مشهور بها هى شخصية ( حماده ) فانا باعتبر كأن فيه شخص معايا والشخص ده وهمي مش موجود .. حتي الناس بدأت تهزر معايا من الجمهور وتقول لي فين حماده أصلا وكمان شخصية ( عماد ) وده شخص وهمي برضه .. ولى أفيه شهير دايماً أقوله وهو ( الشباب السيكي ميكي هاي ) والافيه ده علق مع الناس .. وازيكو ياحبايب قلبي علقت مع الناس جدا لانها الجملة دى طالعة من قلبي بالفعل ..