مشاهير اليوتيوب .. محمد وهبة

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( محمد وهبة ) ..

= تحدث محمد لـ ( أسرار المشاهير ) فقال : اسمي محمد وهبة .. عمري 22 سنة بادرس في كلية طب بيطري جامعة أسكندرية نعم دراستي مالهاش علاقة خالص باللي باعمله علي اليوتيوب بس ده لان صناعة الفيديوهات بالنسبة لي هواية انا باحبها جداً بجانب دراستي  للطب ..

= سميت قناتي ( وهباز ) بمحض الصدفة لاني كنت مسميها بأسمي قبل كده بس قولت عايز اسم القناة يبقي سهل بدل ما اكتب الاسم بالكامل .. والقناة حالياً عبارة عن مواضيع او احداث انا شايفها مثيرة وباطلع أتكلم عنها ..

= انا مهتم من صغري  بمجال صناعة الفيديوهات وده اللي اكتشفته بسبب مسابقة كانت أقامتها مكتبة الإسكندرية لصناعة فيديو عن أنشطة مكتبة النشئ وكان سني 12 سنه وكان عندي أصدقاء عندهم نفس الاهتمام ده ولمدة طويلة اشتغلت معاهم وكنا بنعمل فيديوهات كتيرة ووصلت ان عملنا فرقة لصناعة الأفلام والفيديوهات الدعائية وكان سننا صغير جداً ..

= بعدها لما كبرت شوية وانا في ثانوي عرفت موقع اليوتيوب وكنت بتفرج علي المحتوى الأجنبي ومنبهر به وده اللي خلاني أحب اطلع أتكلم عن مواضيع وأحداث بتحصل متعلقة بالمحتوي اللي علي الموقع او اي موضوع يشدني واتكلم عنه في صورة فيديو .. وبعد ما بدأت بشوية كان في كذا شخص علي اليوتيوب المصري انا كنت باحب أتفرج عليهم وكانوا بيعملوا نفس المحتوي وهم : مهاب شادي واحمد نجم وبيرجو وخالد حسام فيعتبر كان ليهم دعم في البداية لان اليوتيوب المصري كان سئ للغاية وهم حببوني فيه الي حد كبير ..

= لازم اذكر شئ مريت به في الاول انه كان حصلي مشكلة في القناة وشبكة من الشبكات اللي علي اليوتيوب تمت ابتزازي بإرسال مخالفتين لحقوق الطبع والنشر علي 2 من فيديوهاتي لإجباري للدخول للشبكة او بمقابل مبلغ مالي لحزف المخالفات وطبعا ساعتها كانت صدمة بالنسبة لي لان كانت القناة علي وشك المسح وده كان دليل ان السيستم الكوبي رايت علي اليوتيوب فيه خلل كبير والموضوع ده حصل لقنوات كتيرة علي اليوتيوب وتم ابتزازهم للدخول لشبكات بالغصب .. والحمد لله ناس كتير وقفت جنبي ساعتها ونشروا اللي حصل ولولاهم لكانت القناة مش موجودة دلوقتي علي اليوتيوب ..

= بالنسبة لي الصيف بيبقي فيه مشكلة كبيرة لان دايماً وانا باصور مش عارف بأعرق ليه وبتبقي الدنيا حر جداً ومافيش اي مصدر هوا وانا باصور وبأفضل اعرق كتير وباوقف التصوير فترة كبيرة لغاية ما العرق ينشف وبعدين أكمل تاني وده بيبقي شئ مرهق جداً ..

= بسبب طبيعة المحتوي اللي بأقدمه في فيديوهات كتير انا باطلع انقد او اعلق علي محتوي انا شايفه غريب او مثير ففي بعض الأحيان ردة فعل اللي في المحتوي اللي علقت عنه مش بيتقبل النقد وده بيدل انه ماعندوش ثقة في اللي هو بيعمله خالص وخايف اي حد يطلع يقول وجهة نظره في المحتوي اللي بيقدمه وده دليل علي ضعف محتواه ..

= الفكرة في الفيديوهات اللي فيها تعليقات علي المحتويات الاخري هي ان فيه محتويات كتير علي اليوتيوب سيئة جداً بتصل بعض الأحيان ان يبقي فيه محتوي الزوج بيضرب زوجته او عياله قدام الكاميرا عشان المشاهدات فلازم حد يبقي في المقابل ينقد المحتويات دي عشان علي الاقل يبقي في ردة فعل انها تقف او يحصل حاجة ضدها فالمحتوي النقدي بيكمل باقي المحتويات اللي علي اليوتيوب وهو محتوي لابد منه عشان الدايرة تكمل لان في قنوات كتيرة كانت بالشكل ده مثلا أب كان بيعمل مقالب في عياله انه بيضربهم والقناة بتاعته اتقفلت بسبب الناس الكتير لما أتكلمت عنه فكان فيه رده فعل حاسمة ..

= من قبل بدايتي علي اليوتيوب وانا باحب صناعة الفيديوهات بشكل عام وبأحب ان الناس تبقي مستمتعة باللي بأقدمه فانا حابب أكمل في المجال ده بدون قيود لان لو اتجهت الي مكان اخر غير اليوتيوب سيتم التحكم في اللي بأقدمه بشكل او بأخر زي مثلا في التليفزيون كل حاجه بتخرج بيبقي عليها قيود كتير وبيبقي فيه أشخاص كتيرة متحكمة في المنتج اللي خارج وانا مش حابب ده انا باحب الاستقلالية في الإبداع بدون قيود ..

= هو مافيش فيديو محدد كان السبب فى شهرتي لان انا لسه في البداية بس ان شاء الله الفيديوهات اللي جايه كتير وممكن يكون واحد منهم يوصل للناس اكتر انا ماعرفش المستقبل ايه بس مادام الناس الجميلة اللي بتابعني حابين الفيديوهات اللي بأقدمها فده بيدفعني اني اعمل حاجات احسن وأحسن ..

= في جمل من بتوعي معلقة شوية مع المتابعين زي المقدمة اللي باقولها اللي هي ( واتساب جايز ويلكم باك ) دي بداية الفيديو باقولها ففي ناس كتير عارفاني بيها فده شئ غريب .. وفي مثلا فيديو انا عملته عن يوتيوبر بيعلم الشباب أزاي يعاكسوا بنات فكان في بداية الفيديو بيقول كلمة ( يالا بينا ) وهو كان بيقولها من غير ما يفتح فمه فعلقت مع الناس كلمة يالا بينا فده شئ غريب برضه ..

= في النهاية انا فرحان ان بقي فيه جمهور كبير عنده وعي وبقي بيختار المحتوي اللي بيتفرج عليه بحرص ده غير طبعا الفئة الكبيرة من الأطفال اللي بيتفرجوا علي حاجات غريبة بس ده طبيعي بكرة يكبروا ويتفرجوا علينا عادي ..