مشاهير اليوتيوب .. محمود الديب

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( محمود الديب ) ..

 

 

 

 

= تحدث محمود لـ ( أسرار المشاهير ) فقال : اسمي محمود عبده واسم الشهرة الديب .. عمري 22 سنة .. أهم هواياتي هي الرسم وكتابة الشعر .. بأقدم من خلال قناتي على اليوتيوب محتوي ريأكت بشكل كوميدي ..

= بدايتي في اليوتيوب كانت صعبة جداً ولقيت صعوبات كتير وعملت كل حاجة ممكن تتعمل علشان أوصل لهدفي .. وكنت بافرح جداً لما باجيب 50 مشاهدة في يوم وكنت باحس اني عملت انجاز كبير .. وكنت باقول لأصحابي يتفرجوا علي الفيديو علشان يجيب مشاهدات اكتر .. وكنت كل ما بامسك تليفون حد باعمل اشتراك في القناة بتاعتي علشان المشتركين عندي تزيد .. واقرب الناس كانت بتسخر من اللي انا باعمله وماحدش كان مقتنع تماماً .. ولما قناتي كبرت ووصلت لعدد كبير القناة اتقفلت واقرب ناس لي هم اللي كانوا السبب في قفلها واكتشفت انهم ماكنوش بيحبولي الخير .. وبرغم كل ده كان عندي طموح وكنت واثق ان هيجي يوم من الايام وأوصل لحلمي  وبدون مساعدة من اي مخلوق ..

= للأسف ماحدش شجعني علي انشاء القناة .. انا اللي من صغري كنت باحب الكاميرا وباحب المونتاج ..وكنت واثق اني ممكن اقدم حاجة الناس تحبها وتتقبلها .. ومن صغري وانا نفسي أوصل للدرع الفضي وبعد كده أوصل للدرع الذهبي باذن الله  .. ودي  مجرد خطوة في طريق طويل لاني ماعنديش سقف لأحلامي ..

= اغرب الطلبات اللي طلبها مني المتابعين كانت واحدة بتكلمني وبتبعت لي فيديوهات ليها وقالت لي أتكلم عني واشتم عليا وده أكيد عشان تشتهر ..

= موقف حصل لي كنت باصور بالليل وعندنا كلب في الشارع مش عارف أصور من صوته المزعج المهم فضلت قاعد مستنيه لحد ما سكت ولما جيت أصور لقيته بيهوهو أوقف تصوير يسكت اجي أصور يفضل يهوهو لما غلبت خالص روحت جايب له طبق مليان اكل ونزلته الشارع وقعد يأكل وانا فضلت أصور ..

= ناس كتير مش بتتقبل الانتقاد وبتكلمني بمنتهي الأدب والذوق وبتقول لي امسح الفيديو وانا عادي جداً بامسحه ومافيش اي مشاكل .. وناس كتير بأقدم لها نصيحة في الخاص وبتتقبل كلامي جداً ..

= انا هدفي الاول والأخير هو التمثيل وباتمني اني أكون ممثل .. ولا اسعي لجمع الأموال انا باسعي للشهرة وحب الناس وعندي أمل كبير في ربنا اني أوصل لحلمي ..

= الفيديو اللي حقق نقلة كبيرة وحسيت بعده بالنجاح فيديو عندي في القناة تخطي 2 مليون مشاهدة وبعد كده ابتدت الفيديوهات كلها عندي تزيد بالتدريج .. واكتر حاجة الناس حبيتها فيا التلقائية واللهجة الصعيدية ..

 

= نصحتي لاي حد مبتدأ علي اليوتيوب ونفسه يوصل لهدفه عاوز أقول له كمل في اللي انت فيه مهما كانت الصعوبات صدقني هيجي يوم وهتوصل .. اي حد هيتعب في حلمه هيقدر يوصل له مافيش مستحيل .. اشتغل علي نفسك اكتر واوعي يصيبك اليأس او حد يحبطك وخليك علي طبيعتك وماتحاولش انك تتصنع .. اعمل حاجة مميزة وماتحاولش انك تقلد حد .. وخليك ورا حلمك لحد ما توصل له ..