مشاهير اليوتيوب .. محمود السيد

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( محمود السيد ) ..

= تحدث محمود لـ ( أسرار المشاهير ) فقال : اسمى محمود السيد .. عمري 36 سنة .. حاصل علي بكالوريوس تجارة دراسات مالية وجمركية .. هواياتي هي الرسم والصيد دول اكتر حاجتين .. المحتوى اللي بأقدمه من خلال قناتي على اليوتيوب محتوي نقدي ساخر .. يعنى امسك حاجة سلبية وانتقدها زي عاداتنا وتقاليدنا والحاجات اللى بنعملها بأسلوب ساخر ..

= البداية كانت بالصدفة وماكنتش مخطط ولا عمري باسعي للشهرة كنت منزل رسمة في جروب والناس تفاعلوا معها وانا بأحب أرد علي الناس بتعليقات صور كوميكس كنت مشهور بيها في الجروبات ففي حد قال لي مش بتفكر تعمل فيديوهات أسلوبك مقبول في الهزار طبعا بقينا أصدقاء حالياً ..

= واستغربت الفكرة لاني عمري ما فكرت اعمل حاجة كده المهم نزلت اول فيديو علي الاكونت الشخصي ماكنش ليا صفحة ولا قناة ساعتها وكان أكونت عادي فيه 200 صديق تقريباً مش اكتر ..

= هزرنا وضحكنا تاني يوم طلبوا فيديو كمان عملت فيديو عن سواقة الستات بعدها بيومين كمان عملت فيديو المطاعم بتاعة بيتزا كتافاست قومت لقيت الفيديو جاب مشاهدات بالملايين وطلبات صداقة كتير والاكونت لقيت عليه آلاف من المتابعين ودي كانت البداية ..

= مافيش طلبات غريبة من المتابعين لان كل فيديوهاتي من أفكاري .. عملت القناة والبيدج علي الفيس والناس حبت الموضوع والدنيا كبرت لوحدها واكتر حاجة جميلة حصلت لي لما الأستاذة إسعاد يونس استضفتني عندها في برنامج صاحبة السعادة كان شرف كبير والأستاذ صلاح عبدالله شيرلي كتير برضه واتعرفت والحمد لله علي ناس جميلة من الوسط الفني ..

= مانتقدتش عمري محتوي حد بالعكس مابحبش اعمل ريأكت علي محتوي غيري انا مش حكم علي حد اياً كان المحتوي اللي بيقدمه لان اللي مابيعجبنيش ممكن يعجب غيري أكيد مع ان الريأكت بيجيب مشاهدات كتير بس انا مابحبش النوع ده نهائي ..

= أحلامي أكيد كتيرة .. نفسي امثل واكبر بس في حدود اللي بأقدمه وسايب ده للنصيب انا بانشر المحتوي بتاعي وبأقدم اللي باشوفه كويس وباحاول ارضي الناس اللي بتابعني وموضوع التمثيل او هروح فين ده للنصيب بإذن الله باجتهد في الحتة اللي انا فيها حالياً ..

= الفيديو اللي كان اول خطوة كان فيديو المطاعم وعملت فيديوهات كتير ولله الحمد جابت ملايين المشاهدات بس ده كان اول واحد اللي عرف الناس بيا ..