مشاهير اليوتيوب .. مستر سيد

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( السيد عبد الكريم ) ..

= تحدث السيد لـ ( أسرار المشاهير ) فقال : اسمى السيد عبد الكريم واسم الشهرة مستر سيد .. حاصل على ليسانس آداب وتربية جامعة سوهاج .. هوايتي القراءة والتمثيل .. وباقدم على اليوتيوب ريأكت نقد ساخر للأخبار الفنية والسلبيات الاجتماعية فى المجتمع ..

= البداية على اليوتيوب كانت من سنة وبصراحة ماكنش حد بيشجعنى لان نظرة مجتمعنا فى الصعيد بتعتبر صنع محتوى على اليوتيوب بشكل ساخر فيه نوع من الاهانة للنفس خاصة لو نوع ريأكت ولازم تقلد بعض حركات الفنانين او تقلد تسريحة فنان معين علشان تنتقده او تقلده .. وكنت متوقع انى هنجح لانى حسيت نفسى انى مختلف عن اللى بيقدموا ريأكت مع كل احترامي ليهم بس قررت انى اقدم نقد بطريقة مختلفة فى العرض وفى الافيهات وفى الألفاظ بحيث يشاهدني الاب والأم والابن والابنة وهم مطمنين انى مش هاقول لفظ خادش .. والحمد لله نجحت فى كده حتى ان فيه متابعين أطلقوا عليا اسم الساخر المحترم .. وانا رسمت لنفسي طريق بعرض الموضوع بشكل مختلف أقول حاجة ماتقالتش قبل كده واعلق بافيهات جديدة واعتمد على المونتاج فى صنع فكاهة ..

= اغرب طلب طلبوه منى المتابعين انى اعمل برنامج اعلامى وأحاور ناس فى الشارع عن موضوع معين يكون هزلي زى انى اسأل كيلو الزيت فيه كام نقطة بالمناسبة فيه 7 نقط .. طبعا اعتبرت الطلب ده غريب لان ماعنديش الحس الاعلامى ومش متخصص وده عايز دراسة ..

= أطرف موقف حصل لى انى قابلت ناس متابعين بالصدفة وماكنوش مصدقين انى مستر سيد لحد ما عملت ليهم مشهد من مشاهدي اللى اشتهرت بيها ساعتها صدقوا وقالوا ان شكلك فى الحقيقة غير اليوتيوب ..

= اغرب موقف انى عملت ريأكت عن نجمة مشهورة جدا وفجأة تواصلت معايا وشيرت لى الفيديو ومازعلتش وماكنتش أتوقع انها هتشوفنى ابدا على اليوتيوب ..

= حصل معايا مرتين انى انتقدت اتنين وطلبوا بعدها انى احذف الفيديو وطبعا ماكنتش اعرفهم .. اول واحدة هى شخصية مشهورة على التليفزيون وبعتت لى مدير أعمالها تواصل معايا وكلمني بكل ذوق وانا فعلا حذفت الفيديو واعتذرت والنجمة ساعتها قالت هى مش زعلانة من النقد لانها شايفة انه نقد محترم وفكاهى ومافيهوش اى تطاول لكن هى ماكنتش عايزة ان الموضوع حد يتكلم فيه على الميديا .. الموقف التانى لواحدة بتقدم محتوى طلبت احذف الفيديو واعتذرت لها وحذفته وبقينا أصحاب بعدها ..

= احلامى انى اظهر فى التليفزيون وأتعلم اكتر وادرس اكتر فى مجال التمثيل .. بأحب جدا الفنان اشرف عبد الباقى وباحلم أكون واحد من فريق مسرح مصر .. اما اليوتيوب بالنسبة لى باعتبره وسيلة للوصول للتليفزيون ..

= الفيديو اللى كان سبب فى نجاحي كان ريأكت عن مطربة مشهورة جدا والفيديو تخطى المليون فى اسبوع وصنع لى متابعين كتير لكن باعتقد سر نجاح الفيديو انه تقدم بشكل مختلف لان ساعتها قنوات يويتوب كتير اتكلموا عن نفس الموضوع بس كان من نصيبى انى أكون الأكثر مشاهدة ..

= بالنسبة لشخصيتي فانا شخص عادى جدا بأحب الفكاهة الضحك والكوميديا بدون إسفاف واحلامى بسيطة جدا يعنى تقدر تقول انى زى اى شخص بس ظهورى ونجاحي فجأة على اليوتيوب كان توفيق من عند ربنا ..

= بانصح اى حد بيقدم محتوى انه يصنع محتوى هادف يخدم المجتمع ويخدم الوطن لان مصر محتاجة شباب وأجيال واعية تقدر تساعد فى بناء الوطن ..