مشاهير اليوتيوب .. ميدو يانج

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( ميدو يانج ) ..

= ميدو يانج شاب خفيف الظل لأبعد الحدود يتحدث بسرعة فائقة مثل طلقات الرشاش وهذه الطريقة فى الحديث جعلته فى فترة قصيرة من مشاهير اليوتيوب البارزين ومحبوب من المتابعين بشكل كبير ..

= تحدث ميدو لـ ( أسرار المشاهير ) فقال : اسمى الحقيقى أحمد صلاح .. لقبي ميدو يانج .. ميدو دلع أحمد ويانج عشان شكلي أصغر من سنى .. عمري 25 سنة  ودرست فى الجامعة الأمريكية فى دبى .. بس وقفت دراسة وبإذن الله ابدأ دراسة فى مصر ميديا حاجة أنا باحبها وعادى انا متأخرتش .. هوايتى هي الجيم وعلى الموبايل وقتى كله للجيمينج وباعمل لايف جيمينج كمان ..

= والدي هو اللى شجعني فى البداية لما كنت باعمل فيديوهات على الانستجرام .. كنت باعمل فيديوهات 60 ثانية ريأكت حاجة سريعة وده اللى خلاني أتعود أتكلم بسرعة وده النموذج اللى الناس حبتنى فيه .. باتكلم بسرعة فبنجز مش باتكلم كتير يعنى بلخص كل حاجة وباديهم الخلاصة مرة واحدة .. لأني شايف ان اليوتيوب فيه ساعات ناس ممكن تعمل محتوى ممل جداً لمجرد أنهم يعدوا 10 دقائق بحيث يحققوا دخل وربح أكبر .. بعد كده اللى شجعني يوسف الشاعر صديقى .. ويوسف القط اللى شجعني وقال لى لازم تفتح قناة على اليوتيوب وهو نفسه ماكنش لسه فتح قناة وكان بيحمسنى ووقف جنبى الصراحة ..

= أنا الحمد لله طموح وفيه هدف معين فى دماغى عايز أوصل له الفترة دى .. عايز أوصل له فى فترة قصيرة مش فترة كبيرة .. فأنا شغال على نفسى فى الحوار ده .. مش عايز أقول ايه هو عايز الناس تتفاجئ به .. وعارف انى مشتت بقالى فترة ومش مواظب على اليوتيوب بشكل كافى وعارف انى مزعل الفانز بتوعى لأنى مش ملتزم مع انهم مش مقصرين معايا الصراحة .. واللى باطلبه منهم بيعملوا اكتر منه كمان .. وفيه حاجة قريبة ان شاء الله تعجب الكل ..

= أغرب الطلبات اللى طلبها المتابعين فى الأول خالص على الانستجرام قالوا لى افتح يوتيوب وهم اللى شجعوني على ده .. وانبسطت لفكرة أن الناس هى اللى توجهك للصح واللى فيه خير وانك تشتغل حاجة تانية مش انستجرام بس ..

= أطرف موقف حصل لى انى كنت باعمل فيديوهات ريأكت فكنت باضطر أتكلم بسرعة .. ويوسف القط كان قاعد بيتفرج عليا وكل ما أقول جملة يضحك .. وماكنتش عارف أصور وبعد ما خلصت الفيديو اللى مدته عشر دقايق طلعت دقيقة كاملة كواليس .. يعنى طلعت منه فيديو ريأكت وفيديو كواليس .. وكان من أحلى الفيديوهات اللى صورتها وكان فيه تلقائية شديدة وكنا مبسوطين وإحنا بنعمله ..

= أصعب موقف كانت جدتى لسه متوفية وكان لازم أصور فيديو ريأكت للناس زى ما وعدتهم ونزلت نعى للوفاة استورى على الانستجرام ونزلت الفيديو فى ميعاده .. كانت أصعب مرة أعمل فيديو وطولت جداً فى التصوير وماكنتش قادر أصور ..

= انا لو زعلت شخص فى فيديوهاتي ممكن الشخص ده يقول لى وجهة نظر ماكنتش واخد بالى منها او حاجة ماكنتش فاهمها .. وقتها مش عيب انى أقول له آسف.. انا مش مستعد اسبب اى أذى نفسى لحد بمحتوى انا باعمله .. فيه ناس بعد ما باعمل الفيديو بيقولوا لى لأ شيل الفيديو بتاعنا مش عاجبنا فانا باشيله من اليوتيوب فورا .. وفيه ناس بيعجبها الريأكت جداً وعارفين انى واخد الموضوع هزار من غير ما نغلط فى بعض ..

= بالنسبة للتمثيل والإعلانات انا ماجربتش الموضوع أنى أمثل أو كده كل اللى عليا انى اشتغل على نفسى أكتر وانزل فيديوهات أكتر على اليوتيوب لأن أنا أشوف الناس اللى بيحبوه ايه اعمله فى نطاق المسموح .. أنا باعامل المتابعين زى اخواتى بناخد رأى بعض وبامشى رأيهم ساعات يعنى عادى واللى يجى بقى خير ..

= ماكنش فيه فيديو واحد هو اللى خلاني أشتهر .. كنت باعمل فيديوهات كتير ورا بعض ونسبة المشاهدات بتزيد .. انا حتى مستغرب من موضوع زى ده .. كله بيبقى له حاجة فارقة بيعدى بعدها الا انا .. مش عارف فيه ايه ..

= الافيهات اللى اشتهرت بها بتيجى بطريقة عشوائية وفيه حاجات بتثبت وتعلم مع الناس وبيحبوها وخلونى انى اثبت عليها زى الغمزة بتتطلب منى كتير .. وفيه كلمة ( وتشاااااااااع ) دى باقولها لما ابقى عايز اخض حد كده وهى مالهاش معنى .. وقلتها مرة فى فيديو أجربها وعجبت الناس ومن ساعتها وهي معايا فى اول كل فيديو .. يعنى كل يوتيوبر بيبقى له لازمة او دخلة معينة والكلمة دى بقيت اللازمة بتاعتى فى كل فيديوهاتي ..