مش عايزة ورد يا ابراهيم

ما تضحكش علي المدام بوردة ..
هي عايزه الأجمل من الورد ..
رقته

صحيح الورد جميل ولغة رقيقة تعبر عن مشاعر جميلة
لكن في الزمن الحالي حاجات كتير قوي تحتاجها الزوجة أهم من الورد….
تحتاج تحس بالسند..
بالأمان ..
بأن لها رصيد في الحياة لا ينفد عند شريك حياتها

تحسه بكلمة حلوه
حتى لو الكلمة دي
تسلم ايديكِ حبيبتي .. إنت بتتعبي معانا .. ربنا يخليكِ لينا
الكلمة دي ممكن تمحي تعب اليوم كله

كتير من الزوجات تتمنى تفضل في بيتها لا تخرج للعمل ..
و لا تتعرض للتعب والمهانة من اللي يسوى و اللي ما يسواش
وترجع بيتها ملهوفة على المطبخ
تعمل غدا ولادها وزوجها . .وبعدها تذاكر لولادها وتنضف البيت
وتقوم بعملها كربة بيت في الفترة المسائية بعد ما انشغلت الفترة الصباحية بالعمل
وكل ده
لتوفر لبيتها وأولادها مستوى معيشة أفضل
حتى لو لم تكن تعمل خارج البيت .. أصبحت كثير من الزوجات الآن تلجأ لعمل من خلال بيتها .. صنع طعام مثلا .. سواء أكلات مصرية متميزة او حلويات

أعرف زوجات اخترن ان يقمن بتنضيف الخضار وتجهيزه مثلا وبيعه لمن يحتاج .. والتي لا تجيد ذلك لجأت بعضهن إلى موضوع التجاره الألكترونيه .. بكل ما فيه من متاعب وعناء ومخاطر وسخافات من بشر لايعون للإنسانية معنى

لا تُبالِ في سبيل رغبتها في أن تخفف العبء عن زوجها
وأن توَّفي طلبات أولادها
ولكنها المحاولة لتكون عونا لزوجها و بيتها
ليكون كما تحلم لهم وكما يتمنون

هنا هي لا تنتظر ورد
فالورد تكلفة بيتها أولى بها
وهي التي اختارت التضحية بما تحبه هي لترضي ولادها وزوجها

كلمتك الحانيه عزيزي الزوج هي المطلوبة
مش حا تكلفك حاجة
إلا مشاعر حقيقية تزيل من على قلب زوجتك عناء كل ما تعانيه
كي تسير بالمركب
ولا تشغلك بالهموم برغم أنك أحيانا قد تكون سببا في هذه الهموم

الستات مش عايزين ورد يا إبراهيم ..
عايزين تقدير ..
وكلمه طيبه من اللي بتقولها للستات بره يا إبراهيم

يعني ما تبقاش مغرق زميلاتك وكل حريم الكون حواليك رقة و كلام حلو
و تيجي عند اللي مفروض تقوله لها
و تعمل نفسك من بنها يا إبراهيم

الكلمة الحلوة صدقة
ياللي بتضحك في وش الكل .. إضحك في وش أهل بيتك تكسب ودهم
وتكسب سعادتك وسعادة بيتك
بدل ما تندم لما تعيش لوحدك

وما تقولش طب ويعني الستات مالهاش دور … أقول لك قلنا الستات كتير
لكن الإيد لوحدها ما تصقفش
صقفوا سوا يا إبراهيم

عذرا لكل إبراهيم إن كانت جت في حضرتك بس الفيلم بقى اختار إبراهيم عشان يتقال له عايزه ورد يا إبراهيم
ربنا يهدي سر كل البيوت وتبقى كل الحكايات وراء الأبواب حكايات محبة و سعادة وهنا

فاتن نصر