مصممة الأزياء ” منه رجب “: طموحاتى كبيرة وسعيدة بالجوائز التى حصلت عليها

مصممة الأزياء “منه رجب” : طموحاتى كبيرة وسعيدة بالجوائز التى حصلت عليها

بتصاميم مبدعة وإطلالات مختلفة بألوانها الجاذبة ولافتة للعيون تجسد الذوق الرفيع والمحتشم بأسلوب رائع ولا يختلف عنه اثنين و من اللمسات العصرية، هذا مصممة الأزياء التى دخلت عالم الموضة من اوسع الأبواب، شعارها البساطة و الرقي والرقة في التصميم ،عشق الطفولة. 

• حدثينا عن نفسك .. مين منه رجب ؟
أنا منة الله رجب ، من القاهرة، سنى ٢٩سنة ، حاصلة على بكالوريوس تجارة شعبة إدارة أعمال من جامعة عين شمس ، و Computer Science .

• كيف ومتى دخلتي عالم الموضة والأزياء؟

من صغر سني وانا بحب الرسم جدا والأعمال اليدويه من وانا في ابتدائي كنت برسم كتير واشارك برسوماتي فى المدرسة، وبعرف اشتغل كروشيه وتطريز يدوي وحاجات كتير زي الخياطه و شغل النول.

إحتراف المهنة

• وكيف تمكنتى من تطوير نفسك وادواتك ؟
حينما كبرت نسبيا قررت العمل بشكل احترافي .
حبيت اشوف ايه الجديد من القصات واعملها من اي نوع قماش او من اي خامة وكنت بعمل ملابس العروض فى المدرسة ولأصحابي من غير ماكينة خياطة .
لاني كنت صغيرة بس برغم من كده كنت بعمل غرز المكنه بأيدي. وبصراحة كنت بحب اطور من نفسي ومافيش اي شيء يقف قدامي رغم صغر سني ، ولأنى بحب المجال لانه مميز وفي جديد طول الوقت ده كان بيزيد شغفي به وإصراري اني اطور اكتر من نفسي مع اختلاف مجال دراستي، كنت دايما بقلد اي قطعه بتعجبني مهما كانت صعبه والحمدلله كنت كل ما ادخل مكان عشان اتعلم اكتر كنت بتفوق على المدرب نفسه وباخذ مكانه فى التدريب ولاني بحب اجرب دايما كنت بغير من اسلوبي فى التنفيذ، اوخدت اكتر من شهادة تقدير فى المدرسة فى مجالات مختلفة سواء فى القسم الفني وأول مكان استلمت إدارة قسم المشغل فيه كنت فى أولى ثانوي كان جمعية تنمية .
وبرغم انطوائي كنت بحب اساعد اللي حابب يتعلم حاجة بعملها و اوصلة المعلومة بأي شكل يسهل عليه فهم الفكره، وبالفعل بدأت انفذ شغلي جنب الدارسة، بعد كده بدأت ادرب اونلاين مجانى لما لقيت ناس كتير بيحاولوا يتعلموا تصميم الأزياء وغير قادرين يوصلوا لمعلومة مفيده تخليهم يطوروا من نفسهم ، والحمدلله وصلت لمكانه كويسة على مستوى الوطن العربي في مجال تعليم تصميم الأزياء، ومن طلابي في اكتر من بلد أقاموا اكاديميات واتيليهات خاصة بيهم ومنهم شاركوا في عروض أزياء بجد فخورا جدا بهم.

العودة للتدريب
• حدثينا عن طموحاتك وأحلامك؟
كان عندي براند خاص بأسم La reine واشتغلت به فتره وحصل للأسف ظرف بسببه وقفت العمل عليه ورجعت للتدريب من جديد كمدربة للتفصيل ، وإن شاء الله تعالى ارجع البراند تانى قريباَ واشتغل عليه ليكون اسمه يتردد في مصر من تاني وبقوة واتنمي بعد ذلك الوصول لكافة الدول العربية.

• بدأتي شغلك العملي ازي؟
بدات شغلي فى التدريب العملي أو على أرض الواقع فى أكتر من أكاديمية فى مصر، بعد مااكتشفت إن اغلب اللي بيدربوا منهم اللي مش فاهم ومنهم اللي بيوفر المعلومة ، يمكن انا مش شغوفه بالشهره والظهور بس شغفي الحقيقي توصيل معلومه جديده ومفيده لكل حد حابب يكون ليه مكانه محترمه فى مجال تصميم الازياء وهو اللى ساعدني فى ده اني اشتغلت فى اكتر من مجال مختلف ومتصل فى نفس الوقت زي تدريب الأطفال من سن ٤ سنين وحتى ١٨ سنة، ده عرفني طريقة تفكيرهم وابتكار اسلوب مختلف عشان اوصل ليهم المعلومة.

تكريمات وجوائز
• ومن هو الشخص اللي كان داعما لكِ وساندك في مجال عملك ؟
حبي الشديد للمجال تصميم وتنفيذ الأزياء، ده كان اساسه عائلتي أمى كانت بتحب المشغولات اليدويه وكنا بنتافس مع بعض وده شجعني انى اشتغل اكتر وبابا نعم السند لانه كان دائماَ بيوفرلي كل الأدوات اللي تشجعني ابتكر فى وقت فراغي جنب دراستي ، وأى مشكلة كان لازم يوجد ليها حل ، لأنه مؤمن دائما بأن الحاجه أم الاختراع وده ساعدني كتيير اني ابتكر مواد وخامات جديده بتساعدني في أفكار كولكشنز مختلفة ومميزه حتى الآن هما مصدر دعم ليا، ربنا يحفظهم ليا.

• في اي جوائز حصلتي عليها أو اتكرمتي على مجال عملك؟
الحمدالله اتكرمت من نقابة المهن التجميلية، وبعض عروض الأزياء ، على تدريبي فيها للمتدربين ومسؤلة عن اختبار القدرات لمصممي الأزياء ومدا مهارتهم للحصول على لقب مصمم أزياء.