معاملة الخدامين
كتير مننا او يمكن اغلبنا اول ما بيعمل حاجه غلط بيبدا يعامل نفسه معامله الخدامين انتي فاشله ،انتي مش ببتتعلمي، انتي مش هتحققي حاجه…
كل ده بنقوله لنفسنا لمجرد اننا عملنا حاجه غلط طب جربتي تفكري الكلام اللي بتقوليه لنفسك ده بيأثر عليكي ازاي بعديه بتشوفي نفسك ازاي مجربتيش لاء انتي حسيتي ..
حسيتي انك فاشله حسيتي ان عزيمتك قلت عن الاول علي تحقيق احلامك وطموحاتك بقيتي تشوفيها شبه مستحيله لاء ومع الوقت هتشوفيها مستحيله بجد هتيأسي هتعيشي تنتفي في ريشك لما تغلطيوتغلطي تاني لحد ما يبقي عندك حاله لا مبالاة. .
دي نتيجه طبيعيه جداا لتأثير الكلام اللي بتنتفي ريشك بي كل ما تغلطي.
طب تعالي نشوف لو غيرنا طريقتنا مع نفسنا هيحصل اي؟ ؟
غلطتي قولتي كلمه حلوة لنفسك طبطبتي وحضنتي نفسك قولتلها معلش انا واثقه اننا هنتعلم من غلطنا وهنبقي اقوي انا واثقه فيكي انك هتتعلمي من غلطك اه والله بتكلم بجد متفكريش انك اتجننتي عشان بيقيتي بتكلمي نفسك ده علميا الناس اللي مبتكلمش نفسها معرضه للاكتئاب اتكلمي بس متزعقيش لنفسك اقفي جمبها زي كأنها صحبتك شوفي اللي مضايقها وقويها وقوليلها كلام حلو صالحيها بشيكولاته،حبيها.
هتفرق معاكي لما تصحي تاني يوم اقوي من الاول بكتير ،اتعلمتي من الغلط ،وبقي عندك امل في الحياه بشكل مش طبيعي ،وعارفه انك هتحققي حلمك مهما كان بعيد ،هتتعاملي بطريقه ايجابيه جداا مع الناس هتديلهم ،امل بابتسامتك واملك .
شوفتي الفرق بقي ،عرفتي لما تفضلي تنتفي ريشك هيطلع على دماغك وهتبوظي حياتك بايدك .
من الاخر هتحبي نفسك هتحققي المستحيل.
