مناجاة…صلاح عبدالحميد

خلااااااااااص … آن الأوان
الحشرجة بدأت تزيد حتى البصر أصبح حديد
وبقيت أشوف كل الحاجات من غير ستار
وآدي إيدي
بس منقوعة في جليد

يا هل ترى آخر نفس ؟
يا هل ترى ممكن أشوف أمي وأبويا من جديد ؟
خايف قوي قبري يكون ع الإنتظار
خايف قوي أفرد كفوفي تجيبلي نار
خايف قوي إنه يكون آن الأوان وأنا لسه مش عامل حسابي للطريق

حِلمك عليا يا ملاك
متودنيش أرض الهلاك
اطلب من الرب الزيادة في السنين
أو حتى رجعني جنين

عايز أكون جاهز قوي وآخد كتابي باليمين
يارب أنا عاصي أنا ومفيش مناص
متخلنيش خالي الأساس
الروح بتسري بدون هدى والقلب تايه في التراب

واهو كل يوم بيقول خلاص بكره ها اتوب
لا مرة تاب ولا قال خلاص متخليلوش أدني قرار
اؤمر خلايا القلب تسجد في محاريب الخلاص
صب الخشوع على روحي
وامسح قسوتي خليني أعيش كل الحياة بدون انغماس
خايف أوي إني أكون صورة لنواس

آخر كلام يارب
عارف إن أنا با اعصيك كتير
يا عارف إن أنا عايش تملي دنيتي فيها أسير
وان الذنوب زي الكلابش تهدني وتشدني

مهما حاولت اني أفوق
خدني الأمل للذنب طير
لكن كمان عندي أمل إني أتوب
وافرح قوي لما يكون آن الأوان

لما تفارق روحي جسمي اللي هلك
ألقى معايا تذكرة فيها الأمان
والقى الجنان فاتحة البيبان .
يارب