“نحن نزرع الشوك!”

قالوا زمان..

لا بإدينا زرعنا الشوك ولا روينا
علمونا الدنيا وحشة
طول عمرها قاسيه علينا
وكمان قالولنا لازم نعانى
والبخت لو مال ده مش بإدينا
وكتبولنا سيناريو الحياه
ومشينا على النص بجدارة والتهينا
أخدنا اوسكار دور الضحية
وقبل النهاية طلعنا احنا اللى افترينا
كل الشواهد ياعم ضدك انت وانا
الجانى .. مش مجنى علينا!!

شوف اد ايه جلدنا الذات وأنبنا في روحنا
شوف أد ايه قطعنا فيها واتجرحنا وادبحنا
طبطبنا على الكل .. ورحمنا
ماهى سُقنا فيها .. واستبحنا
بس انا صبوره ومثابر مش همل
حرام عليك حتى الجمل بيكل
ربك يحرم شئ وانت تيجى تستحل!!

حرم يكلف نفس فوق طاقتها
واحنا شيلناها هموم تشل
ماتفوق بقي لروحك أيوه خليك انانى
بمعناها الجميل مش بأى معنى تانى
أنا فى اول القايمة وأى شئ بعدها تانى
أنا الوردة وأوراقها وميتها
وجناينى ليها وبستانى

هكون ليها حبايبها وخلانها
وهعاملها بشكل لطيف وانسانى
وهقبلها بكل تفاصيلها.. وبهبلها

هحب فيها برائتي
هحب هدوئي وجنانى
بحبك ياللى جوايا
لكِ منى شكرى وتقديرى وامتنانى. كتبتها / ولاء محمد