نصائح زوجية وحياتية اوعي في يوم تطبقيها!
بقلم/دعاء خطاب
قرأت قصة الفتاة التي أستنصحت والدها عن:
كيف يحب زوجها وأهلها وجيرانها أن يرونها عليه بعد الزواج؟
فقال لها المثل الشائع:
( جوزك يحبك عفيه، وجيرانك يحبوكي سخية، وأهلك يحبوكي غنيه!)
وحقيقي لما فكرت فيه وازاي إحنا بنمرر النصايح دي لبعض بدون تفكير؛ فهمت ليه (الخيبه القويه) اللي كتير من بيوتنا عايشينها في علاقاتهم الزوجية والأسرية بشكل عام!
* جوزك يحبك عفية!!
نصيحه خلت ستات كتير تيجي على نفسها بزياده، ويبقوا بيتشقلبوا حرفياً لإبهار الزوج وأهله، ومهما عانوا وتألموا بيخفوا آلامهم ويكتموا جواهم وجعهم، وصعب جداااا يشتكوا إلا لما صحتهم تنهار بالفعل وكأنها شطاره، مبنعرفش ان فيها شئ إلا لما بتقع تمامااااا، يتقال لها من الستات قبل الرجالة اوعي جوزك يعرف انك بتشتكي من وجع، اوعي اهل جوزك يعرفوا انك عيانه، بلاش تحكي أدام أسرته ان عندك مشكله في جسمك، مترقديش كتير لما تتعبي، محدش حيشيلك ولا يستحملك، شغل البيت وإحتياجات جوزك وأولادك متستناش، اجلي عمليتك دلوقتي الناس تقول عليكي ايه..اتجوز واحده مخلعه!
الكلام والنصايح اللي من النوع ده؛ خلت الست تحس بالدونيه في درجتها الإنسانية، وبأنها أقرب لماكينه او أله مش المفروض تشتكي الا لما تعطل تماماً، ولما تقع يتقال لها لااااا جوزك ممكن يزهق ويبدأ يبص بره ويمكن يتجوز عليكي، قومي بسرعه انتي حملك تقيل، في الوقت اللي شوية برد ولا درجة حرارة واحده أعلى؛ يرقدوا أقوى راجل والست تشيله في عيونها وتسهر على راحته وخدمته وادويته وعمر ما شكله يقل في عيونها ولا ينزل من نظرها، ولا حبها له يتأثر مهما كان مرضه ومهما طالت رقدته.
الست اتربت تنسى نفسها وترضي الكل على حساب راحتها وتأجل زيارتها لدكتور ولا موعد أشعه او تحليل او جلسة علاج طبيعي على ضهرها ولا ركبتها؛ علشان اي سبب هايف تاني ممكن يتأجل او حتى يتلغي، بس علشان تقدر تفضل واقفه على رجليها زي الجبل ومتشتكيش إلا للشديد اوي.
دعاء خطاب
