هاله الدمراوى تكتب …أبن مين فى مصر انت علشان تتكلم عن ماسبيرو !

ماسبيرو .. هذا المبنى العريق .. تليفزيون الدوله .. مصنع الاعلام .. المصدر الاول لاهم القيادات الاعلاميه التى تقود دفة الاعلام المصرى و العربي اليوم ..
من افقدة هيبته .. من اجهز عليه .. من نهب خيرة .. من يتعمد اهانته .. من المستفيد من خرابه .. من يجلس و يضع رجلا علي الاخرى و يقول بكل ألاطه و ثقه اقفلوة .. حولوة فندق .. بيعوة .. اجروة .. !!!
للعلم انا لا اتهكم و لا اهاجم و لا ادافع ! و كل ما اريد ان اوضحه ان الموضوع كبير و شائك و خطير و ليس بالسهوله التى يدعيها البعض حينما يتحدثون فى هذا الشأن .. اصل ماسبيرو دة مش الاستاذ ماسبيرو نفسه اللي هتغيرة و نجيب واستاذ بداله .. دة مدينه صغيرة عايزة رئيس قوى محنك مبتكر شجاع قادر علي ادارتها و جلب الخير منها و لها !
ما هو مش كل ما مكان هيعطل هنقفله .. الشطارة مش فى الغلق ووضع القفل و دمتم !
الشطارة فى ايجاد حلول حازمه لتطهير كل مكان فى الدوله و تنقيته من الجراثيم البشريه التى تنهب خيرة او تعبث بمقاديرة او تتعمد هدمه !
ماسبيرو كأى منظومه حكوميه تواجه فسادا و تمتلىء بعواطليه !
طيب ما نقفل بقى كل مستشفى فيها تجاوزات بدلا من اصلاحها و ردع المسئول عن خرابها !
و نلغى بالمرة السكك الحديد تفاديا للحوادث !
و نعطل الطيران علشان ماحدش يعايرنا بحادثه طيران تانيه !
و فى سكتك بردة اقفل اى مدرسه هتعملك مشاكل او فضايح !
سياسة إحبس ابنك بدل ما تربيه ! دة سياسه جاهله عقيمه مخربه لا نبنى دوله ولا منظومه .. و الله و لا تنفع حتى فى ادارة كشك سجاير !
ابحثوا عن اسباب المشكله بأمانه .. ضعوا الحلول بجديه و نفذوها بحزم .. حاولوا الوصول الي حقائق و نتائج مقنعه حتى لو كانت قاسيه !
الناس تايهه و متلخبطه و مش فاهمه ..
المشكله خيانه و لا فساد و لا إدارة و لا زحمه و لا افراد .. و لا كل دول .. و لا ولا حاجه من كل دول !!!
لا انكر تعاطفى الشديد مع التليفزيون المصرى و حبى له و املي فى اسعافه و انقاذة و اعادته معافا .. علي الاقل الي كل محبيه و كل من مازال يدين له بالفضل و يحمل له العرفان !