هشام المليجي يتهم مرضى الإكتئاب بالخداع
هشام المليجي يتهم مرضى الإكتئاب بالخداع
كتبت : أحلام محمود سيد
حل الفنان هشام المليجي،ضيفًا مع الإعلامية ياسمين عز في برنامج “كلام الناس”، و الذي يعرض عبر شاشة ام بي سي مصر.
و نرصد لكم أبرز و أهم تصريحاته خلال لقائه:
حيث كشف عن تفاصيل أزمته الأخيرة مع رانيا شاهين،بعد إدعائها أنه يمر بأزمة نفسية و يعاني من الإكتئاب بسبب قلة أعماله الفنية، حيث قال:
-الناس بتحبني جدا ولاحظت في أزمتي الأخيرة ردود الجمهور وكأنهم يعرفوني شخصيًا ومش عارف أشكرهم إزاي، ورانيا شاهين ست جدعة و ب100 راجل وبتعمل دا من زمان بس التعبير فلت منها لأن كلمة مكتئب كلمة خطيرة دا مرض.
و تابع: رانيا عملت مظاهرة وقالت مكتئب وبيصعب عليا وهي شيك وجدعة وعملت كدا معايا من 6 سنين وقولتلها بلاش تدخلي في حياتي الشخصية لأني مبسوط زي ما أنا وعارف من أول ما دخلت مجال التمثيل أن ساعات مش هيبقى فيه شغل، وأنا عارف أني غالي عندها لأننا طول عمرنا بنرشح بعض لأدوار فنية وبندي بعض سجاير.
-الناس أعتقدت اني قريب الفنان القدير محمود المليجي، بسبب تشابه الأسماء ودا ظلمني أحيانًا لأن أي نجاح بينسب للأعتقاد دا.
-الدور بينادي صاحبه ومن أول ما احترفت التمثيل وعارف أن أوقات مش هيبقى فيه شغل وحياتي رحلة طويلة وأنا مبسوط بيها وفخور بيها وراضي جدًا.
-أنا محظوظ كممثل لأني بدأت مع عمر الشريف ويسرا وكنت لسه مخلص معهد، وقابلت ناس فنانين كتير في مجالي مكنش عندهم الحظ دا، وشوفت محمد رضا وهو بيشتغل لأني حضرت التصوير والناس كانت بتكلمني لما بغيب وحسيت بحبهم ليا.
كما تحدث هشام المليجي عن سبب عدم زواجه حتى الآن فقال:
لم أتزوج من قبل، الموضوع ده كبير، في 3 إجابات جاهزين ممكن أقولهم ونكمل البرنامج، لكن لو هنتكلم بجد فالموضوع كبير، ومكنتش فاضي والله، ولسه بكون نفسي.
و أضاف المليجي :مفيش نصيب دي حاجة بتاعت ربنا، لأن في ناس أتجوزت وفي ناس متجوزتش، الموضوع عادي، الجواز ده في خطأ شائع أنه حب ولازم نكون حاجة معينة، ولكن هو اشتراك بين اتنين عايزين يعملوا أسرة، فلازم يكون الأفكار والأهداف متقاربة، الشكل مش مؤشر لحاجة.
و تابع : ولكن الناس اللي مروا في حياتي طلعوا عنيا وده عمل مخزون، وعشان الجواز مهم جدا لازم الواحد يأجله آخر حاجة في حياته، المجتمعات عايزة مواطن ممنهج ونمطي يعيش، وأنا مش عايز أكون ممنهج.
-روحت مرة لطبيب نفسي، حد من صحابي قالي روح وشوف بس وأعرف وأتكلم، ولكن المريض ممكن يخدع الطبيب النفسي ويتوهه لأنه مريض نفسي، إحنا جزر منعزلة كل واحد عايش في دنيته، بينسج لغته على كيفه، أنا ممكن أجي أحكي موضوع ويكون هو أصلا حاجة تانية، وهزود من عندي حاجات تانية.
و الجدير بالذكر أنه قام بالرد على متابعيه عبر موقع التواصل الإجتماعي ، حيث وصفوه بالجرأة، فقال :معنديش حاجة أخجل منها، الموضوع جرأة وربنا يسترنا جميعا، أنا إنسان عادي، يعني كلنا بنعمل نفس الحاجات، طول ما إنبوكسك سليم أنت في السليم، بحب أهزر على الفيس بوك بلاش كأبة، كمان في ناس بتكون محتاجة توضيح، بس بحب أهزر، طبعا مضطرين عشان في حالات وفيات كتير، بس خلينا ننبسط.
يذكر أن آخر أعمال الفنان هشام المليجي، هو مشاركته في مسلسل “قيد عائلي” عام 2019، و هو من بطولة عدد من الفنانين منهم: ميرفت أمين، بوسي، عزت العلايلي،صلاح عبدالله،دينا فؤاد،كارولين عزمي، و المسلسل من تأليف محمد رجاء وميشيل نبيل، ومن إخراج تامر حمزة.
