والله وكبرت … أيمن عبد الحميد

كتب الشاعر أيمن عبدالحميد
=================
وكبرت يا أيمن
ومسكت ف طرف النجم الشابط ف الملكوت
مفلوت!
طب قوللى غوازل شعرك فين ؟
فين الارغول
وغناوى الناي
حبات التوت
وحكاوى البت المصلوبة ف طوابير العيش … بقشيش
وعنيها البكر …..
شفايفها الناطة من البرواز
أزاز ………….. بسكوت
ورموشها الراشقة فى صدرك شوق
هتبور؟
هتموت ؟
راح فين الحلم المتزقطط ف كلامك نور
والجري اللى بروحه محير حواديت الدور
وحكاوي الموت
طب فين أغانيك … أحاديك
والبحة الحلوة ف صمدية كتاب الشيخ
ولفين مراسيك ؟
خرابيشك برة ببان البيت ………….
-أصلك نساى .. . فنسيت –
وكبرت يا أيمن
نسيوك
جرحوك .
والناس مش عارفة عيونك ليل ؟
مع إنك
كنت فى ليلهم ضي
ومشرخ جوه ازاز ملامحهم .. حي …….
ومجدر جوة حواشي القول …. أرغول
مسكين ………. مشغول
والشيب الغول ………….
مترشرش جوه فى صدرك ضيق مخاليق
طب قول ؟
ما تقول ………
وأنا كنت رقيتك م المشاوير
وفردت ضلوعي تضمك طير
وغزلت حبوب الفول عناقيد
فى رقبتك …….. طوق مبلول الريق …. عصافير.
بتعيط ………… طب معلشي يا واد …….. هتفوق
دا دموع الحر لآلىء نور ………..
ملاحة روق
والنبي لتروق … كفياك ……….
مش ناقصة همومك … يكفى ياواد
قنديلك لسة فى ضلع الليل منقاد
والفجر المر .. فى يتم عيونك زاد … مراسيل
طب قوم ………
مدد رجليك
وتعالى اخدلك شمس الخوف … هات المفتاح
واربط منديلك فوق … غمضللى عنيك
والنبي لارقيك ………… محسود
احكيلى يا واد ,,,,,,,,,,, هتخبي على
دا انا حافظة عيونك حفظ طريق لخطاوى رسول
عجناك
خبزاك
ما تقول ….
طب اقولك نام ….
قوم عطر نبع الحلم فى حبك ضوء
وارتاح فى شروق
واتوضى …كلام
جلابيتك لسه بدم هواك ……….
والوردة الناشفة فى جيبها أخضرت قول
طرحتلى ملاك
فى دولابك طرح الليل قناديل
طب ميَّل …….. ميل
راح اقولك سر فى ودن الليل مستور
( مخاليقك بور ………………
واوعاك تبدرها ف ارض شراقي تفور
خفافيش
خليك انسان … عصفور)
فهمان
شكلك صدمان ..
والله باقو لهالك من الف وحول
مقتول …. مقتول
هتروح فين
دى بلاد مجاريح ……… تباريح
ساكناها الغول
والله يا أيمن شايفة الخنجر جاي من خل
مش صاين حتى العشرة وملح الريق
فى خريف
ولا صاين لما قابلته بقلب نضيف
ولا حافظ حتى لحرف الوِرْد
العابر ضيف
تخاريف … عارفاك هتجولها فى نفسك عني …
ما انا اصلى فى حبك قلبي خفيف …
مش قادرة اكونلك قاسية خوف
ولا قادرة اسيبك للتصاريف
هادعيلك …
يمكن ربي يزيح
اعقلها ياواد
وتوكل عاللي مخبى الريح ….تفاريح
إرجع بنور
بتموت …. ما تموت
سمعني كثير … قولهالى حديت
ما تموت
الثورة ياواد معقودة فى حلق الحر زهور
بركان منثور
مقتولها مرفرف طير فى خضار الجنة بدور
وجريحها مهاود
شمس النور ملكوت
بيموت ؟ …
والله الموت ما بيعرف غير أبو قلب ضعيف مبتور
مكسور
عارفاك حساس …
متشرد جوة حواري الناس … منداس
خليك مستور حواديت
والله يا ولدى …. الكلمة الحلوة بتبنى قصور م البور
طب اقولك …. فارق غور
هو انت ما منك فايدة ياواد
على طول مشطور
نصك فى جلوبى معشش ورد
ونوارس حور
نصك مهدور
وبقيتك
طاير رمش فراش بيموت م الضى
وبينزف نور
بادعيلك ترسي ف مرسي ياواد وتعدي السور منصور
طب اقولك خد كردانى و رُدْ
كفايانا سكوت …
طب اقولك موت ….
والله الموت فى زمانا يمد
هتضلك ساكت كدة وعنيك محقونة بورد
طب اقولك هِلْ
وانا ها اقفل بابي عليك
وهارش الفل
وهاحضر كفني وكفنك .. شوف
فى زمان ما يسر
وهاهجز كل حداوي الموت
هانقول ما نمل
يمكن فى الموت نلمسها حياة
براكين الطل
خلينا نموت
وسلام ع الدنيا المليانة بكل
خد حضني وعشق ف الملكوت … واحضنى بذل
ودَّعها بكلمة مش ناسيين
وانقشها بفل ….
يمكن فى غيابنا … بيطرح نور
وزهور فوق سور
وبراح موشوم
ف جبين الكل
طب اقولك ……………………. انس كلامي وغور