وايه يعني اتخلوا عنك بقلم د. احمد اسماعيل
وايه يعني اتخلوا عنك بقلم د. احمد اسماعيل
وايه يعني اتخلوا عنك، هي يعني اول مره ؟!
ما انت عايش من ساعت ما وعيت ع الدنيا وحقيقتها عمال تطلع من تخلي تقع ف تخلي !!
بقا عندك حالة لا مبالاه رهيبه، ومبقتش تتصدم من ان حد اتخلى عنك، لانك بقيت بتتعامل وانت حاطت ان دا احتمال وارد وجدا كمان !!
حقيقه مُرّه مش كدا !!
بس عارف ايه اللي امَّر منها ؟! ان يكون طعم الخذلان والتخلي دا من اقرب ناس ليك !! اهلك اللي من دمك، اصحاب كنت عندك يقين انهم اخواتك، احباب كنت شايفهم توأم روحك
ومن بعد التجربه دي وغيرها وغيرها وانت الصدمات خليتك مريض نفسي بفوبيا التخلي والخذلان !! ومتوقع دا من اي حد ومش بتتفاجيء بيه من حد !!
بالظبط زي واحد اتضرب بالرصاص كذا رصاصه اول رصاصه هي اكتر رصاصه بتوجع لانه اول مره يحس الالم دا بعدها بيبدأ يفقد الاحساس ويصيبه الدوار والرصاص الباقي يا يبقا اقل الما او يمكن اصلا ميحسش بيه !!
انت دلوقتي كدا، مشاعرك للناس قلت احساسك وحساسيتك لكلامهم وتصرفاتهم قل .. لا بقيت بتضحكلهم بقلب اوي ومرتاحلهم زي زمان ولا بترتاح في الكلام معاهم وتقول كلام يطلع من قلبك من غير فلتره او تفكير كتير .
بقيت بتتعامل بحذر مع كل الناس اينعم هو احساس مش مريح ومتعب نفسيا الحذر من كل كلمه وتصرف وحتى نظره بس بيجنبك تعب نفسي اكتر !!
مبقتش اجتماعي زي زمان، ناس كتير بتتصل عليك بتفضل ما تردش، قعدت لوحدك بقى هو ستايل الحياه المفضل بالنسبالك عادتا مش لانك بتكره الناس بس لانك لا شايف نفسك قادر ف كل وقت تتعامل معاهم ومع معاركهم الكلاميه المؤذيه ليك ولا عارف تكون زيهم وحش من جوه، انا عارف انك حاولت تجرب تكون وحش بس فشلت وسعتها كان جواك صراع بين فكرتين الفكره الاولى انك انسان ضعيف مش قادر تواجه والفكره التانيه انك انسان نقي في عالم نضح انائه بالشر !!
زي فيلم جعلونى مجرما ، الذكريات المؤلمه والقلق من انها تكرر نفسها زي ما حصل فيك لما صدقت ان مش كل الناس شبه بعض خلوك منطوي بشكل مرضي وضحية مجتمع مريض !!
بس خليني اقولك حاجه
انت مش ف المدينه الفاضله، انت ف الدنيا والدنيا دار اختبار فطبيعي جدا انك تجد اكثر الناس جواهم شر وقلوبهم مريضه بس مش طبيعي عشان اتكررت معاك نفس التجربه كذا مره ف كل انواع العلاقات من اهل واصدقاء واحباب انك تقول كل الناس كذا، لان اكتر الناس اه جواهم شر بس دورك انك تدور على ناس صادقه، هاتتعب ؟! اه هاتتعب بس تعب فتره من الزمن ترتاح بعده كتير لو لقيتهم !!
وافضل من دا حاجه. انك تاخد دا بالمعنى الايجابي واللي ربنا حب يعلموهلك، ان الله هو الباقي هو الحبيب الباقي اللي لا بيخدع ولا بيكدب ولا بيتخلى عنك ولا بيخذلك ولا يفشي سرك ولا يجرحك بكلام !! سبحانه ليس كمثله شيء.
انقى علاقه وارقى علاقه واحلى علاقه علاقتك بالله. وصدقني والله العظيم لو عشتها بصدق وعزم هاتلاقي زي ما يكون ربنا بيكلمك بافعاله وتدابيره ومره لطفه يطبطب على قلبك ومره حنانه يحتويك ومره رحمته تظهر اوي ف موقف تبكيك ومره يقولك بتصريف معين انا بحبك فانته من نفسك تلاقي عنيك تدمع وتقوله انا بحبك اوي يارب، هاتلاقي دعائك ليه ردود ف تدابير حياتك مع الوقت تبينلك كان خير ولا شر، وتلاقي الونس وقت ما تذكره فيكون جليس من ذكره.
لعل ربنا شاء يعلمك انه هو الصاحب، النبي كان يقولها وهو مستشعرها اللهم انت الصاحب .. ومين صحيح الصاحب الحقيقي بكل ما تعني الكلمه غير ربنا، الله الكامل دون نقص سبحانه!!
ابدأ بقا فكر بالمعنى دا ووالله لو خدت معية الله بكثرة ذكره وطاعته والاستعانه الصادقه بيه وانك تحبه بقصة حب حقيقيه وعلاقه قويه وقرب صادق ووفاء واخلاص ورقابه ليه وانك ما تغلطش مش عشان خايف منه لا عشان بتحبه ومش عايز تغضبه
وانك تعمل الطاعه الفلانيه بدافع حبه مش بدافع انك تلم ثوابها بس او دافع دنيوي وانك تكلمه في كل كبيره وصغيره ف حياتك وتحكيله بحديث طويل وكأنه ابوك ولله المثل الاعلى ليس كمثله شيء صدقني هاتحس براحه نفسيه سبحانه ارحم بيك من ابوك وامك، دا هو بيقولك بتودد انه اقرب اليك من حبل الوريد” !!
ومين الدنيا تغلبه ومعاه ربنا، ومين الكون يقدر عليه وهو معاه ربنا ومين يحزن ويشيل هم وهو معاه ربنا، ومين يحس بوحشه وهو متونس بربنا، ومين يقلق من بكره ولا يخاف ولا يكئب وهو معاه ربنا .. قولي مين بالله عليك ؟!
