يادوب اصحاب …. بقلم / عصام حسينى
يا دوب أصحاب
بقلم / عصام حسيني السيد مدين
و ليـه تصحيني من حلــمي الجمــيل بعذاب ؟
و قولتي إن إحنا في الرحلة يا دوب أصحاب
و قولتيلي الهوى في قلبك أمل كداب
غياب بغياب عـذاب في عـذاب
و قولتيلي لا أنا بهواك ولا عاشقاك
و لا حاساك و لا شايفاك علي الأبواب
ولا طيفك لمس قلبي وصدقني ماليش أحباب
أحب إزاي وأشعارك تمللي غياب ؟
دموع نازلين وطيف هارب كأنُه سراب
وما صبُرتيش تشوفي الحب في عنيا وهو شباب
رضيتي نكون كما الأموات ونتقابل كما الأغراب
نسيتي إن إحنا م الأول حروف في كتاب
وحِس رقيق وكام ضحكة على الأهداب
و ناس ماشيين و ناس راجعين و ليل و سحاب
و نور بيشق أوهامنا بشوق غلاب
صحيت م الحلم ع الواقع بأنى حزين
وحيد تايه ماليش مَرسَى و للا أحباب
و يكفيني الصداقة بجد لكين خايف
أمد الإيد وأندهلك ما ألاقي جواب
يتوه الصوت في وسط الزحمة ما تحسيه
و أجري عليكي و الخطوة ماليها حساب
فألاقي الخطوة مسبوقة بشجن ودموع
و ألاقي القلب جوايا في بُعدك داب
و ما صبُرتيش وللا قدرتي تسامحيني
على غيابي اللي ليلُهُ حزين
و هو صحيح بعاد جارح لكنُه أكيد مخبيكي
في نن العين في قلب سنين
بيتواعد مع العاشقين في نبض قصيدة
من قلمي بقالها سنين بتتوجع مع الدواوين
مع الحلم اللي كان قلبك بيتمناه
و أنا و إنتي كتير ياما بنستناه و أنا جواه
سجين عايش تمللي معاه
المزيد من المشاركات
صحيت الليلة من حلمي وسايب قصتك وياه
و أنا راضي لا أنا بابكي و لا باشكي
ولا بسأل عن الأسباب
دي حرية مفيش في الدنيا قصة حُب بالعافية
مفيش إتنين بيتواعدوا ويتعاهدوا وهما بعاد
و أصواتهم كمان خافية
و لا لمسة تجمعهم و أوصالهم ماهيش دافية
دا يبقى جنان و أنا الغلطان غلطت كمان
في وسط الرحلة في العنوان
رسمت الحلم جوايا و خليتلك حروفي غيطان
و كام وردة علي صدرك عشان خاطرك
عشان خاطرك كرهت زمان و كل مكان
بعيد عنك و إنتي ما فيه بيوت و حيطان
بحور و جسور و ناس مجاريح و كُله ضباب
وخليت الأمل إنتي رسمت عنيكي ضلايه
و سَطرتِك على الجدران
و أديني صحيت و حلمي أهو مات
علي صدرك كأنُه ما كان
ماهي الأحلام دي كبسولة بتسكرنا تنيمنا
تخدر كل أوجاعنا اللي كات فينا بتألمنا
و بعد ما نصحى نتألم و نتندم
و بعد الرحلة ما بتخلص لا بِنْحَرَم و لا بنفهم
لأخر العمر بنعافر و بنسافر
لرحلة جديدة تضنينا و حُب جديد ينسينا
اللي عاش فينا سنين و سنين مدفينا
مجرحنا بغياب و صدود مفرحنا بكلام لينا
و أتاري القلب لا بينسي و لا عمروش بيتعلم
وأهي أحلام عذاب في عذاب
غياب في غياب ملام و عتاب
أمل كداب وغيم و سراب
و قولتيلي ماليش أحباب
و أنا و إنت يادوب أصحاب يادوب أصحاب
عصام حسيني السيد مدين
