يامين يوديني

بقلم الشاعرة: إنتصار حسين

يامين يوديني
لشطك الهادي
يامين يعديني
لنهارك النادي
واحكيلك وتحكيلي
واغني مواويلي
في ليلك الشادي
…..
يامين يوديني
عايزك تاخديني
وبموجك احضنيني
ويتحققلي مرادي
…..
يامين يوديني
لشطك الهادي
يامين يعديني
من ضلمة الأيام
نفسي ترسيني
لبر كله أمان
خَدوا مِني سنيني
وردموا ع الأحلام
وكان ضيا عيني
أعيش هنا الأيام
…..
يامين ينسيني
مرارة الحرمان
خديني وارميني
في بحرك المالح
خليه يداويني
مرارهم الطافح
…..
يامين يوديني
لشطك الهادي
يامين يسقيني
عذب أيامك
واحس يوم فيكي
طعم الشهد
ما أنا اللي ليلاتي
ماعرفت غير السُهد
قولولها تندهلي
هروح واسيب اهلي
ومهما تبعد المسافات
هجيلها طاير
علي جناح اليمامة
ماانا اللي ياما وياما
طول عمري حاير
مستنيها تندهلي
…..
يامين يوديني
و ف بحرها يرميني

والله ما راح اعود
راح أسبح بلاحدود
ولو يِحِن زماني
يوفي لية الوعود
يجعلي سكن فيها
واكون واحد من أهاليها
لكن يامين يوديني