يا صايم يلَّا قوم… بقلم الشاعر كامل بدرخان
يا صايم يلَّا قوم
بقلم الشاعر كامل بدرخان
يا صايم يلَّا قوم
ما تكَمِّلش صومك نوم
ما تكَلِّمنيش عن البصل والتوم
قُوم إقرا قرآنك
بقلبك قبل وِدانك
وامسك لسانك ….. وصوم
صوم وامسك لسانك
وبلاش تِئذي جيرانك
كلام علشاني وعشانك
فَطَّر كل يوم صايم
وابقى في حب الحبيب هايم
يرفع الله قدرك ….. وشانك
بلاش في كلامك تزُق
وتيجي على جرحي تدق
إنت كلمانجي وبُق
العاقبة هتبقى وَخيمة
وبيتك ما يحصَّلش خيمة
بعد الوِسع يبقى ….. حُق
تعالى أقولك بحَق
يا اللي عمر قلبك ما رَق
يا شاقق صف الوِحدة شق
بلاش تمسكلي ع الوَاحدة
وخلي قلوبنا متحدة
قول طيب وبلاش تقول ….. لأ
المزيد من المشاركات
ولمَّا تحب تتسحر وتاكل
خليك على المعدة حِنَيِّن
وتبقى راسي كدا وعاقل
بِلا إمساك وبدون مُلَيِّن
ولمَّا تمسك عن الأكل
وعن المَية كمان
خلي عندك شوية عقل
وما تشتمش إنسان
ولو حصلت منك زَلِّة لسان
عوضها بحسنة لغلبان
ولو شتمك حد أو جاك لايم
استغفر وقول ….. اللهم إني صايم
وهي دي حكمة الصيام
ولازم يفهم العالَم
الدين المعاملة قبل صلاة القيام
والله العالِم
