ياللي بتحسدونا في كافة الأوضاع

ده الكل عنده مآسي وكفايته من الأوجاع

ماتسيبوا الناس في حالها، باصين لبعض ليه

ماتقولش الرزق ضيق وتبص عالجيران

دي راحت ودي جت، ودي عايشة حياتها جد

ودي عايشة في نعيم ، ودي مش هاممها حد

ده اشترى وده باع، وده عايش في الضياع

وده عنده وخد وجاب ، وده زاد منه وفاض

ليه بس بتحسدونا

عالصحة ولا المال، والخلفة والعيال

وساعات بقى عالخصال ، جايز عالخلقة كمان

ده الرزق مافيهش حيلة ولو له مليون وسيلة

وإن زاد في كفة لازم، الكفة التانية تنقص

وينعدل الميزان ،وأهو كله ليه أوان

ده الحلو بس باين، والمخفي يجيب جنان

وياللي بتحسدونا عالصحة وعالجنيه

ماتسيبوا الناس في حالها، عاوزين من الخلق أيه

طب أيه الفايدة أيه، لا حتبقوا في يوم مكاننا

ولا حالكم حيبقى حالنا، ده قدرنا وده قدركم

والكل نصيبه واخده ٢٤ قيراط، وافتكر انك في يوم راح تمشي عالصراط

ارضى بالنصيب والقسمة والمكتوب

واعمل اللي عليك ، واستغفر بس وتوب