يعنى ايه أنا كبرت !

.. بقلم / داليا حسام

كلمه بيقولها معظمنا من غير ما يفكر
يعنى ايه أنا كبرت وكبرت ليه
هو السن عمره ما كان مقياس للكبر السن عباره عن أرقام فى حياتنا.

كلمينى عن لياقتك اللى إذا مش موجوده هتكونى انتى السبب

كلمينى عن اهتمامك بمظهرك

كلمينى عن اهتمامك بشكل جسمك
كلمينى عن حديثك وضحتك وياترى انتى ودوده مع الناس

لما تكلمينى عن الحاجات ديه ساعتها ااقولك انتى كبرتى ولا لا

انتى ممكن تكونى 60 سنه بس مهتمه بلياقتك خفيفه فى حركتك وده توصليلو ازاى
هتقوليلى اصلى مبروحش چيم
تقدرى تعمل رياضه جوه البيت كل يوم الصبح ساعه .

مش قادره تعملى رياضه انزلى اتمشى كل يوم نص ساعه هتفرق معاكى جدا وهترفع من روحك المعنويه

بعد اهتمامك بلياقتك نشوف اهتمامك بمظهرك

طريقه لبسك واختيارك للملابس اللى تناسب جسمك عليها عامل كبير جدا انك تبانى اصغر من سنك بكتير أو اكبر
وانتى بتختارى اختارى الحاجه اللى متبينش عيوب جسمك اختارى الألوان اللى تليق على بشرتك متقوليش اصلى كبيره مينفعش البس بنطلون لا ينفع على فكره المهم تلبسيه ازاى متقوليش مينفعش البس شوز رياضى ميناسبش سنى لا ينفع طالما حاجه هتريحك اختارى اللبس اللى ترتاحى فيه نفسيا راحتك ديه بتبان على وشك خلى ليكى طله مميزه لكل اللى يشوفك خلى على وشك ابتسامه دايما تبقى معروفه بيها.

خلى حديثك مع الناس ممتع وشيق والناس متزهقش منه
شبابك فى روحك وروحك مبتكبرش الا بايدك
اخرجى واضحكى والبسى واشتغلى الحاجه اللى بتعرفى تبدعى فيها علشان تنجحى خلى دايما عينك على حلمك واسعى انك تحققيه علشان يبقى عندك هدف فى حياتك اعملى إللى نفسك فيه بس وانتى مبتسمه وودوده مع الناس .

ابتسامتك بتنور وشك ومظهرك بيسيب علامه فى نفوس اللى بتتعملى معاهم

خليكى عارفه أن سنك مجرد تاريخ ميلاد مكتوب فى شهاده ميلادك

لكن روحك ملهاش سن

مش هتكبرى الا اذا انتى قررتى تعملى ده
لكن نصيحه منى اوعى تعملى ده انتى هتعبشى مره واحده
عيشيها صح.