💢 حوار .. منةالله خليل :- على العروس أن تختار فستان زفافها حسب رغبتها

إعداد وحوار :- مي إسماعيل محمد

كما عودناكم قرائنا الأعزاء أن نبحر فى عوالم مختلفة لنتعرف على مبدعينها واليوم سنبحر معكم فى بحر الموضة والجمال مع إحدى مصممات الأزياء الأستاذة منةالله خليل فهيا بنا ..

فى البداية أحب أن أشكرك لتلبة دعوتى لعمل هذا الحوار معك هيا حدثينى عن نفسك بإيجاز ؟
– انا منة خليل خريجة حقوق اسكندريه وحاصله على دبلوم تحكيم دولى درست تصميم الازياء بعد التخرج اتولدت فى فرنسا بحكم ان والدى استاذ جامعى وكان بيعمل الدكتوراه هناك عندى اخ اصغر منى متزوجة وعندى بنوته 6سنوات بحب التصميمات و الالوان ودمجها والموسيقى .:

– من الذى ساعدك فى تنمية موهبتك؟ 

– اهلى اللى ساعدونى فى موهبتى وحبى للافلام الاجنبى ونظرتى دايما على كل جديد من صغرى سواء فى التصميمات والالوان دايما ليا ذوق مختلف حتى فى استايل لبسى ليا اسلوبى الخاص .

– ماهو برجك الفلكى ؟

– انا برج الاسد .

– ماهو أجمل تعليق حصلت عليه ؟

– اجمل تعليق حصلت عليه الحقيقى كتير بس دايما فى إجماع ان ذوقى مختلف وراقى وسهل ممتنع .

– ما هى الذكرى التى لن تنساها أبدا؟

– الذكرى اللى ما انساهاش لو فى مجال شغلى حقيقى كتير سواء كان تعليقات من مصممين هاند ميد او ازياء مشاهير بيعجبوا بشغلى وتصميماتى او من خلال الممثلين اللى اتعاونت معاهم فى السيشانات حقيقى احلى حاجة ان كل ما بعمل خطوة او كولكشن جديد بيبقى ليها معايا ذكريات حلوة جداااا بس عمرى ما حنسى اول مقال اتكتب عنى فى مجلة اخر ساعة او اول لقاء تلفزيونى .

– من مغنيك و ممثليك المفضلين ؟
– انا مغنينى المفضلين محمد عبد االوهاب ووردة واليسا واصاله وشرين ومحمد حماقى وايهاب توفيق وتامر عاشور وادم وبهاء سلطان وبوسى ..
والممثلين ياسمين الريس وكريم عبد العزيز وكريم فهمى وياسر جلال وياسمين عبد العزيز ومنى ذكى واحمد حلمى واحمد السقا .

– من قدوتك فالحياة ؟

– قدوتى فى حياتى والدى ربنا يخليهولى ووالدتى الله يرحمها هما قدوتى فى حياتى والدكتور ابراهيم الفقى رحمه الله عليه .

– مالأمنية التى مازلتى تتمنيها منذ الصغر ؟

– امنيتى انى يكون عندى مصنع لتصنيع الاحجار وانى اكون مصممة عالمية سواء فى مجال الازياء والاكسسوار وان اكون مصممة ازياء لفيلم اجنبى يحصل على الاوسكار .

– ماهو التصميم التى قمتى بتصميمة ولم تتوقعى النتيجة ؟
– الصراحة انا لما بعمل اى كولكشن ببقى غالبا بيبقى احساسى بنجاحى القطع فى محلها سواء نجاح قطع على حساب قطع تانيه برضه بيبقى احساسى غالبا صح .

– ماهى أقرب صيحات الموضة التى تحبينها ؟
– اقرب صيحات الموضه ليا الكلاسيك لانه دايما راقى ومش بيبطل مع اختلاف قصات معنية تتضاف عليها تديها طابع كاجوال وعصرى اكتر ودة السبب اللى بيخلى تصميماتى يتقال عليها السهل الممتنع.

– ماهى طموحاتك ؟
– طموحى التميز دايما لحد ما اقدر ان اسمى يوصل للعالميه وانى اعمل اكاديمية لتصمميم الازياء ويكون فيها مجالات مختلفه للهاند ميد .

– أعطينا نصائح لفتيات الجامعة ؟
– فتيات الجامعة المفروض يكونوا عمليين بس فى نفس الوقت يكونوا شيك ما يبقاش اللبس العملى لاغى كونهم بنات فى الاساس وما يمشوش على الموضه لمجرد الموضه ذوقهم هو الاساس لان هو دة الاختلاف علشان ما يكونوش شبه حد تانى .

– أعطينا نصائح للعرائس قبل الزفاف فى أختيار الفستان ؟
– اما لنصائح العروسة اهم حاجة انه يكون بذوقها مش ذوق غيرها علشان تكون مرتاحة وحاسه انها لابسه حاجة شبه روحها وذوقها مش،مجرد بس انها تمشى على الموضه .

– ماالنصيحة التى تقدميها لمبتدائى تصميم الأزياء ؟
– نصحتى للمصميمين المبتدئين يكونوا هما بذوقهم مش بالذوق السائد اكتر كلمة مش بحبها اعملى تصميمات الدارجة الناس اللى متعودة عليها لانى دايما بقول انا اللى اخلى الناس يحبوا تصميماتى المختلفة حتى لو كان الطريق اطول بس دايما لازم روحى وذوقى هما اللى يكونوا فى كل قطعة بتتعمل .

– هل تفكرين فى تصميم أزياء للأطفال تشبة أمهاتهم ؟

– لا ما فكرتش اعمل تصميمات اطفال تشبه امهاتهم اولا لانها اتعمل كتير خلاص غير ان مش ببقى حاسه ان تصميم الكبار بيتناسب مع تصميمات الاطفال الطفال ليهم ذوقهم على فكرة واسلوبهم اللى بيحبوه مختلف عن الكبار وبحس لما الطفل يلبس زى الام بحس انه مش حيبقى ليهم ذوقهم الخاص لما يكبروا .

وأخيرا لمن تريد أن ترسل له رسالة عبرنا وماهى الرساله ؟
– الرسالة اللى احب ارسالها اولا انا بشكر اهلى انهم دايما مساعدنى فى طموحى وعمرهم ما بخلوا عليا باى حاجة بحتاجها بابا ربنا يخليهولى واخويا ووالدتى من قبل وفاتها الله يرحمها واصحابى اللى دايما مسندنى وكل الناس اللى الصراحة بسمع منهم كلمه وتشجيع او حتى نقد لانى ببقى عارفة انهم عايزنى احسن دول احسن واغلى ناس عندى ومصدر سعادتى ربنا يخليهم وافضل عند حسن ظنهم بيا دايما .

وفى النهاية ..

أترككم مع بعض تصميمات الأستاذة منةالله خليل .. إلى اللقاء قريبا .